Read Yimchungru Naga Jer 10 Bible Online

Jer 10 - Yimchungru Naga bible

Jer 10

¹ATUNGPUHNÜ nü ki asukkhi yu aniang, O Israel yamkhün.

²ATUNGPUHNÜ ha thachoh: Trükshihbo limro dümükheah, yungsho thüning ching amütsanbonü dümüyinsah; tümüde trükshihbo arü kheahbah müyinsah-a lah.

³Tümütüsho mihtsürü jipü-yakli amülimkhi lah: murung ching sangdung khülang kiushakdo, tüsho sangrhimosorü khahnü awü shuhbah rhimodo;

⁴mihtsürübonü ju kheak shotoyinchi tüsho sunanü züt thsüchoh; arünü yümlung tüsho yümru-yinchinü yümkihchoh, junangde ju maphap.

⁵Arü sangthsübo ju liuheak lu ching wuhnu-dütrütbe nangde lah, tüsho arünü masukachihkhuk; arübo ahanbeah, tümüde arünü mütsahkhuk. Arü ki dütre, tümüde amütsü müthsükhuk, yungsho arü kheak atsü thsüpü müla.

⁶Nü nangde she müla, O ATUNGPUH ; nü ato ah, tüsho wu-sühmüh ching nü mung tolah.

⁷Shenü nü mütrepü, O trükshihbo kiulongthsüpuh? Tümüde hoju nü khuh lah; trükshihbo lümlung larü alala bolung tüsho arü kiulongthsübo alala ching sheshe nü nangde müla.

⁸Arü chido keakeashahshah-a tüsho makhaa lah; mümokhi sangthsübo kheaknü arünü tümü anikhitpü?

⁹Akingkhi shotoyinchi Tarshish chingnü handarü, tüsho Uphaz chingnü suna handarü. Arübo ju sangrhimosorünü rhimokhi tüsho sunakingrü khahnü arhimokhi; arü khimmih ju biyi tüsho mürümmuchu; arü alala ayeanzo rhimorünü arhimokhitkhi lah.

¹⁰Tüshe ATUNGPUH ju thiyuro Thrünpuh; api arhang Thrünpuh akheam mülakhi kiulongthsüpuh. Api bukakhiukkhinü alomi ajanchoh, tüsho trükshihbonü api bukakhiukkhi marümkhuk.

¹¹Nünü arü ki ha thaang: Thüningbo tüsho alomi müthrünkhi thrünpuhbo alomi chingnü tüsho thüningbo khüpnü adükheakbah.

¹²Api wu-sühmüh hode alomi thrünkhi ju api ah, shepünü api lümlung hode alomi thrünkhit, tüsho api anikhitkhi hode thüningbo thoshang.

¹³Küyimki api düsheak alankhea, thüningbo ching ke arung tüsho apinü alomi akheam chingnü amo yükihshihchoh. Apinü tsüng thsungkheak chinchobe phürapshihchoh, tüsho apinü zowupung chingnü apung bekhitchoh.

¹⁴Mihbüm aban keakeashahshahlah tüsho mükheahmudu müla; sunakingrübo alala arü sangthsübonü achih ngüshih; tümüde arü sangthsübo akeangyu tüsho arü kheak sheak müla.

¹⁵Arübo müthülün, alakmihkhi rhimo lah; arü thsümüchichoki arübo dükheakbah.

¹⁶Jakob Thrünpuh a harü ruk yung, tümüde nü kukruk alala thrünkhi ju api lah, tüsho Israel ju api yamrüplurüp trük ah; Wuto ATUNGPUH ju api mung lah.

¹⁷Alo chingnü nüsa kukruk lumukhungang, O nüsa ayandokhi khüp larübo!

¹⁸Tümüde ATUNGPUHNÜ ha thachoh: Ha kim ching inü lomi mihtsürübo lahkhita bahpü thsülah, tüsho inü arü kheak thsümütsü handarübah; junangde arünü angübah.

¹⁹I yurikhi dünkheaknü I ayokhe! I mü mütsüdak. Tüshe inü tha, “Tsükjide ha I thsümüchi lah, tüsho inü arümbeah.”

²⁰I khimyam thsümünimdo tüsho I liubo alala zhakdo; I tsührübo I kheaknü tsodo tüsho arü kheaküa müla; I khimyam thsülopü she müla tüsho khimbo zhindorü müla;

²¹Tümüde namfimihnu neakrübo makhalah tüsho ATUNGPUH müyim; jumonü arü mümüngüh tüsho arü mihnu alala hiumüzüta lah.

²²Kheahang, düsheak khülang, alankhi ato khülang dukulim lomi chingnü, Juda kiutobo zhikrangkhündo shirung lapung kamshihpü arüa lah.

²³Inü mükheahlah, O ATUNGPUH , mihtsürübo limro arü danyukkhi ching müla, mihtsürübonü atsahkhi ching arünü jing düküpü khuhlanga muhuhkhuk.

²⁴I thsülangang, O ATUNGPUH , tüshe thiyuro akekhi chingnü; nü bukakhiukkhi ching yung, jude yungsho nünü I akeangkeang kamshihbah.

²⁵Nü mümükheahkhi trükshihbo tüsho nü mung müjikhi mihtsürübo kheak nü bukakhiukkhi dungkihang; tümüde arünü Jakob muyuabahdo; arünü api shahde muyuabah tüsho api lapung thsümünimjih.