Read Yimchungru Naga Jer 11 Bible Online

Jer 11 - Yimchungru Naga bible

Jer 11

¹Ha yu ATUNGPUH kilimnü Jeremia kilim arü:

²Ha tangzüng yubo aniang, tüsho Juda mihtsürü le Jirusalem ching larü ki asukang.

³Nünü arü ki thaang, ATUNGPUH Israel Thrünpuhnü ha thachoh: Ha tangzüng yubo manirü muthrumünean yükihshang,

⁴küpü nüsa jipürü Ijip lomi yinchi motru chingnü bekhitchoki inü arü ki thade, I yu aniang, tüsho inü nü ki thiyukhüm jihkhi alala rhimoang de thiyukhüm jih. Junangde nüsa I mihtsürü thsübah,

⁵junangde khihni lakhi nangde nüsa jipürü ki niuhke tüsho mukhuke bukkhi lomi jihpü thiyuchihchimkhi inü arhimobah. Judüki inü alo, “Jude thsang, ATUNGPUH .”

⁶Tüsho ATUNGPUHNÜ I ki tha: Ha yubo alala Juda kiutobo ching, tüsho Jirusalem kiudunglimrobo ching zhiyukjang: Ha tangzüng yubo soang tüsho jurübo rhimoang.

⁷Tümüde inü nüsa jipürü Ijip chingnü bede akhiukchoki düshihde arü ki thado, khihni khiungde arü ki kim aban, I yu aniang de thade lah.

⁸Tütüshe arünü mihyu mani yungsho arü nükhün manguh, tüshe mihbüm abannü amütsü lümkhi ching nihnihde tsahdo. Jumonü inü arü ki arhimoshihpü thiyukhüm jihkhi ha tangzüng yubo alala arü kheak handarü, tüshe arünü mürhimo.

⁹Tüsho ATUNGPUHNÜ I ki tha: Juda mihtsürü tüsho Jirusalem ching larü bolung rük amütsü asahchoh.

¹⁰Arünü adüso arü jipürü I yu anipü reanglorü amülimbo lim rholode yüdo; arübonü püpürü thrünpuhbo dunglim tankihpü yüabahdo; Israel yamkhün tüsho Juda yamkhünnü inü arü jipürü ki tangzüngkhi thsümünimdo.

¹¹Jumonü, ATUNGPUHNÜ ha thachoh, lungdode inü arü kheak arünü mutsokhikhukpü thsüde thsümütsü handarübah; arünü I ki zhizhi she inü arü ki mani.

¹²Judüki Juda kiutobo tüsho Jirusalem ching larünü angübah tüsho arünü rhümthüneabe kingaünkhi thrünpuhbo ki zhibah, tüshe arünü küyimkishe arü küpkhukkhi kim ching arübo mükhümkhit.

¹³Tümüde nü kiutobo hihkhi nangde nü thrünpuhbo hihde kamdo, O Juda; tüsho Jirusalem kiudunglimrobo hihkhi nangde achihbe Baal kingaünpü kingaün sadambo thsüa lah.

¹⁴Jumonü, ha mihtsürübo thsungkheak dümushu, yungsho arü thsung thsüde düzhi yungsho dütamkhüntamnü, tümüde arü küpkhuk kim ching arünü I jikhi inü mani.

¹⁵Inü amuzhokhi mihtsürünü amütsü rhimochoki, arübo I arüngyam ching tümü alim la? Thiyuchihchim tüsho shiwüh kingaünkhinü thsümütsü zhipdobah de arünü lümcho shi? Junü arü asühshihba de?

¹⁶ATUNGPUHNÜ khülang ki nüsa ki, “Aphüyak oliv sangdung aso tsüde asokhi” de jido tüshe tsüngmuk nangde arungde apinü mo thsahkihbah, tüsho akhahbo aniuabahbah.

¹⁷Wuto ATUNGPUH , shepünü nü khimkheanü, nüsa azhihde amütsü thado, tümütüsho Israel yamkhün tüsho Juda yamkhünnü amütsü rhimode, Baal kilim kingaün jihde I bukakhiukshih.

¹⁸Kheakü ATUNGPUHNÜ I kilim mükheahmudu jih tüsho inü mükheah; junangde nünü arü amütsü rhimobo I ki huh.

¹⁹Tüshe I a azhihayihkhi namfimihnunu alaksahpü bede yükhi ruk lakheah. Tüsho ha I azhihkhi ah de inü mümükheah, junangde arünü amütsü lümkhi thsüde tha, “ Isanü sangaso kihde sangdung kiushakanü, isanü api rhangdung lomi chingnü lipkhianü, junangde api mung kheaküa mülümkhit!”

²⁰Tüshe nü, O Wuto ATUNGPUH , shepünü lungkide mahkhapcho, shepünü mulong tüsho lümkhi rükakicho, nünü arü kheak nü royimkhi inü kheahanü, tümüde I lümkhilümduh nü ki thakhita huhchoh.

²¹Jumonü Anathoth mihtsürü dünkheak ATUNGPUHNÜ ha thachoh, sherünü nü rhangdung yimkhea, tüsho tha, “ Nünü ATUNGPUH mung chingnü mümüchit, yungsho nü isa khahnü ashebah,”

²²jumonü Wuto ATUNGPUHNÜ ha thachoh: Inü arü thsümüchipü lah; athunu mihtsürübo nukshangnü ashebah; arü tsührübo tüsho arü tsührübebo khümzungnü ashebah;

²³tüsho arü asheaning sheshe müla. Tümüde inü Anathoth mihtsürü kheak, arü thsümüchikhi kam, thsümütsü handarübah.