Read Yimchungru Naga Jer 12 Bible Online

Jer 12 - Yimchungru Naga bible

Jer 12

¹O ATUNGPUH küyimki inü nü azhihde athabanü nü alim labah; tüshe thiyuro dünkheak inü nü ki keokhianü: Tümüde amütsürü limro müngühmühicho? Tümüde mihyu manirübo tsüshihcho?

²Nünü arü khimkheah, tüsho arü aying chinyuk; arü asürü tüsho sangaso aso; nü a arü münbo thüninde lah tütüshe arü mulong kheaknü limshulah.

³O ATUNGPUH , tüshe nünü I mükheahlah; nünü I ngülah tüsho I rükakia kheahchoh, I lümkhi nü kilim lah. Namfimihnu nangde alaksahpü arübo züngkhitang, tüsho alaksahpü nimung thsungkheaknü bemuwuhang.

⁴Külokhüh alonü tüzhoba tüsho thulu sangrungbo mukuhba? Ju ching larü mihbukmuyuk lakhinü shiwüh tüsho wuhnubo shekhamdo, tümütüsho mihtsürübonü tha, “ Isanü arhimokhi Thrünpuhnü müngü.”

⁵Nünü jingnü alihrü lung alihbah keaksho, küde thsah nünü khorabo lung azhihba? Tüsho müsürikhi mükeak ching nü angaksho, Jordan mütüm ching nünü küde athsüpü?

⁶Tümüde nü keoniorü tüsho nü yamkhünnü she nü kheak mihyu manide rhimodo; arünü nü azhihde azhikhi lah; arünü nü ki müyamrü yu thatha she arü kheak akin düla.

⁷Inü I yam mihabahdo, inü I yamrüplurüp bahyukdo; inü I menü amuzhokhi anihbe riri khah ching jihdo.

⁸I yamrüplurüp I ki murung ching kekhüzü nangde kamabahdo; anihbenü I azhihde anihbe düsheak shuhkihdo jumonü inü anihbe thraneankheah.

⁹I yamrüplurüp ju I ki shihtsüh wuhnubonü zündokhi wuhnubo ruk yung de? yüang, mütüm shiwüh alala kitmukhungang; tsühabahshihpü arü bedarang.

¹⁰Namfimihnu neakrü ahihdonü I yo kurungasolu thsümünimdo, arünü I shihcham junakdo, arünü inü asühkhi shihcham azhikkhi sunglo kamshihdo.

¹¹Arünü ju abahkhi lo kamshih; azhikmonü, I mitripchoh. Alomi alala loshelo kamdo tüshe shenü müküm.

¹²Loshelo ching awung achangbo alala kheak athsümünimrü arüdo; tümüde ATUNGPUH nukshangnü alomi akheamnü thripkhüh khiungde muyuchoh; sheshe akhimahe ching müla.

¹³Arünü wheat hi yang tüshe ayangbo yimludo, arü keakzungdo tüshe tümü alü müla. ATUNGPUH bukakhiukkhi hode arü yimlukhi ching arü achihbah.

¹⁴ATUNGPUHNÜ ha thachoh: Inü I mihtsürü Israel kilim jihkhi yamrüplurüp jangkhirü I phünirü mihbukmuyuk alala inü arü lomi chingnü arukkhitbah tüsho arü bolungnü inü Judarü khümkhitbah.

¹⁵Tüsho inü arü rukkhita bahshu kheaküshe inü arü ki mihmuzho labah, tüsho arü mihbüm abande arü lo tüsho arü yamrüplurüp lim belodarübah.

¹⁶Tüsho arünü I mihtsürü limrobo düshihde amükheahbah, I mung tamde thiyuchihchimbah, “ATUNGPUH lale,” arünü khülang ki Baal tamde thiyuchihchimpü I mihtsürü ki thsangyua lalashe, arübo I mihtsürü bolung laabahbah.

¹⁷Tüshe trükshih khürünü manisho, inü shahde arukkhitbah, tüsho athsümünimbah, ATUNGPUHNÜ thachoh.