Read Yimchungru Naga Jer 13 Bible Online

Jer 13 - Yimchungru Naga bible

Jer 13

¹ATUNGPUHNÜ I ki ha tha, “ Yüang tüsho nünü khimthünak thuloang, tüsho nü chim kheak rümang, tüshe ke ching düthsam.”

²Jumonü ATUNGPUH yu yande inü chimrümbe khim thulo, tüsho I chim kheak rüm.

³Tüsho mahne kipü ATUNGPUH yu I kilim arü,

⁴“ Nünü thuloa yihkhi chimrüm khim luang, tüsho kheakü Euphrarü kilim yüang, tüsho ju lungkhün ching rama zoang.”

⁵Jumonü inü yü, tüsho ATUNGPUHNÜ I ki thiyukhüm jihkhi nangde Euphra ki rama zo.

⁶Tüsho nimung ahihdo dunglim ATUNGPUHNÜ I ki tha, “ Kheakü Euphra lim yüang, tüsho inü ju ching rampü thiyukhüm jihkhi chimrüm khim luang.”

⁷Judüki inü Euphrarü kilim yü, tüsho kiu tüsho inü rama lakhi dangpung chingnü chimrüm khim lu. Tüshe chimrüm khim ju thsümünima lakheah; ju tümü atsü mülade alakheah.

⁸Judüki ATUNGPUH yu I kilim arü:

⁹ATUNGPUHNÜ ha thachoh: Hanangde inü Juda kükheangkhi tüsho Jirusalem tode kükheangkhi thsümünimbah.

¹⁰Ha amütsü mihtsürü, sherünü I yu anipü thsunglocho, sherünü nihnihde arü lümkhi ching yancho tüsho püpürü thrünpuhbo dunglim arü tankihpü tüsho kingaünpü yüdünü, atsü thsungkheak tümü mülakhi ha chimrüm khim nangde alabah.

¹¹Tümütüsho chimrüm khimnü khürü chim kheak kapkihkhi nangde, inü Israel yamkhün abümnü tüsho Juda yamkhün abümnü I kheak kapkihshihbah, ATUNGPUHNÜ thachoh, jude athsükhinü arübo I thsungkheaknü mihtsürü khülang, mung khülang, mungshi khülang, tüsho müretahkhi khülang labah. Tüshe arünü mani.

¹²Nünü arü ki ha yu asukbah: ATUNGPUH , Israel Thrünpuhnü ha thachoh: Yukhu phüh abande yukhu yukbah. Tüsho arünü nü ki thabah, “ Yukhu phüh aban ching yukhu yukpü isanü mümükheah de nünü lümla de?”

¹³Judüki nünü arü ki thabah: ATUNGPUHNÜ ha thachoh: Ha lomi ching larü, David kiulongthsübinkiu kheak binrü kiulongthsürübo, amükeamrübo, wukihrübo tüsho Jirusalem ching larü alala inü amüshangshihbah.

¹⁴Tüsho inü arü khülangnü khülang, berübuhrü tüsho tsührübo rukhühnü mütrütachihshihbah, ATUNGPUHNÜ thachoh. Inü arü thsümünimchoki amuzho yungsho aningshihpü yungsho mihmuzho mülade alabah.

¹⁵Aniang tüsho nükhün muphoang; dükükheang, tümüde ATUNGPUHNÜ asukdo.

¹⁶ATUNGPUH nüsa Thrünpuh kilim apinü amiting mühandarüyide, tüsho shuhyini ching awungbo kheak nüsa jing mümükheyide müretahshang; nüsanü ayin kheahchoki, apinü ju bünangdo kamshihchoh tüsho mükjikhünkhit thsüde mitingshihchoh.

¹⁷Tüshe nüsanü manisho, nüsa kükheangkhi thsungkheak I menü jikde atripbah; inü düsüknimde atripbah tüsho chikebo bukbah, tümütüsho ATUNGPUH namfimihnubo rammüzütdo.

¹⁸Kiulongthsüpuh tüsho kiulongthsüberü ki thaang, “Abobe binkiu luang, tümüde nü ku kheaknü akheahakhamkhi kuthran ayokhido.”

¹⁹Negeb kiutobo shenü mükhimshuhpü thsüde rihdoa lah; Juda alala ramtso ching lude tsodo, abümnü ramtso ching lude tsodo.

²⁰Nü mük rheakbah sherü dukulimnü arüchonü kheahang. Nü kilim jihkhi akheahakham namfimihnu boto kükheak la?

²¹Nünü nü müyamrü thsüpü lümkhi nü kurungkheak lachoki nünü tümü thaba? Azoberü thsünükhi nangde, thsününü nü müramloba de?

²²Tüsho nü mulong ching, “Tümüde hadürü I kheak arücho?” de thasho, ha nü mülimkhi ato hode nü rungthsün lahkih, tüsho nü thsümünim.

²³Ethiopiarünü arü küp müthrikhukba de, yungsho sangtsungbonü arü yak müthrikhukba de? Jushu lang nünü she amütsü rhimode alakhi atsü rhimobah.

²⁴Inü nüsa loshelo ching apungnü hitsüt yünde atsokhi nangde hiumüzütshihbah.

²⁵Ha nü shihcham, inü nü kilim akhukhitkhi shihcham, ATUNGPUHNÜ thachoh, “Tümütüsho nünü I mihabah tüsho akeangkeang ching kin.

²⁶Inü nü rungthsün nü miro kheak lahkihbah, tüsho nü achih ngübah.

²⁷Inü nü athraneanbebo, nü müzammüram, shihkünde alankhi awungbo tüsho mükeakbo ching machihde shihyinkhi ngüdo. Nü are, O Jirusalem! Külokhüh nü mümüsühde alaba?”