Read Yimchungru Naga Jer 14 Bible Online

Jer 14 - Yimchungru Naga bible

Jer 14

¹Akungkhi dünkheak ATUNGPUH yu Jeremia kilim arü:

²Juda tüzhochoh tüsho anihbe chipiripitbo keamchoh; arübo masühde alo kheak yaplah, tüsho Jirusalemnü azhikhi yükihchoh.

³Atorübonü arü yamlarübo ke thsungkheak yüshihchoh, arübo kekhip ching arüchoh, arünü ke müngü, arübo kesopung akeangkeang tsolochoh. Arübo achih ngüdo tüsho mulong thsümünimdo tüsho arü ku muhiuchoh,

⁴tümütüsho alo jukrüpa lah. Tümütüsho alo kheak tsüng mülamonü thulu thsürübo mulong thsümünim; arünü arü ku muhiuchoh.

⁵Thulu ching shihmüchinü she anunu aso adrekhi bahkhichoh tümütüsho rim müla.

⁶Mütüm khorabonü awung achangbo kheak zhipchoh, arünü shirungbo nangde sheak suaneanchoh; rimlopung mülakhinü arü mük mürheakkhuk.

⁷Isa mülimkhibonü isa azhihde thiyumütsan thsüthsü she, O ATUNGPUH , nü mung chingnü rhimoang; tümüde isa ashitlokhi tode lah tüsho isanü nü azhihde neak yihbeakdo.

⁸O nü Israel mulonglam, küpkhuk kim ching khümkhitbuh, tümüde nü a isa lomi ching hanrü ruk, hantsahrü tsüngrekhüh thsungkheak lakhi ruk a le?

⁹Tümüde nü a mihtsürü nangde müyinnima, akhümkhitkhukpü wumülakhi thirithsürü nangde alaba? Tütüshe, O ATUNGPUH , nü isa bolung lah, tüsho nü mung chingnü isa jikheah, isa dübahyuk!

¹⁰Ha mihtsürü dünkheaknü ATUNGPUHNÜ ha thachoh: Tsükjide arünü rümde atsahpü muzhodo, arünü arü jing mutuklo; jumonü ATUNGPUHNÜ arü müleangkhi, kheakü apinü arü mülimkhibo lümkhitbah tüsho arü neakbo dünkheak thsümüchibah.

¹¹ATUNGPUHNÜ I ki tha: Harü mihtsürü arung thsungkheak dütamkhüntamnü.

¹²Arünü khümkeak thsüthsü she, arünü azhikhi inü muso, tüsho arünü taka kingaünkhi tüsho hi kingaün jihjih she, inü arü müleangkhi; tüshe nukshangnü, khümzungnü, tüsho arüm-tukthsünü arü sheshihbah.

¹³Judüki inü tha: “Ah, Atungpuh T H RÜ NPU H ! Ha ching wukihrübonü arü ki thachoh, ‘ Nüsanü nukshang müngü, yungsho nüsa khümzung müla, tüshe ha dangpung thiyuro mungtsü inü nüsa kilim jihbah.’ ”

¹⁴Tüsho ATUNGPUHNÜ I ki tha: Wukihrübonü I mung ching akeangyu müchitchoh; inü arü müthiyi, yungsho arü ki thiyukhüm müjih yungsho arü ki masuk. Arünü nü ki akeangyu michih, müthülünkhi müchityu, tüsho arü nihbuh akeangyu lümkhi müchitchoh.

¹⁵Jumonü inü arü müthiyide I mung ching müchitrü wukihrü dünkheak ATUNGPUHNÜ ha thachoh, tüsho sherübonü tha, “ Nukshang tüsho khümzung ha lomi ching marü.” Nukshang tüsho khümzungnü arü dükheakshihbah.

¹⁶Tüsho arünü sherü mihtsürü ki müchitkheanü, khümzung tüsho nukshangnü ashekhi hode Jirusalem wungdo phulung ching jipa bahbah. Arü kiuyuka bahrü she mülade alabah — arü, arü niuberübo, arü tsührü, tüsho tsührübebo. Arü mihbukmuyuk inü arü kheak dungkihbah.

¹⁷Nünü arü ki ha yu thaang: Azhing tüsho ayin I mükbo ching chike bukkhishang, tüsho jurü dükheamshih, tümüde atsangkhit tsührübe — I mihtsürü — mülangde dama kinga yapshihlah, khide sükde yurijihdo.

¹⁸I thulu ching wukhiuksho, nukshangnü alaksahkhibo inü ngüchoh; I kiuto ching yüzahsho, khümzungnü tukthsürübo inü ngüchoh. Wukihrü tüsho amükeamrü chido arünü mümükheahkhi ching yüdo.

¹⁹Nünü shahde Juda bahyukdo de? Nü mulongnü Zion thraneanabahdo de? Isa thsungkheak athsüngu mülapü thsüde tümüde nünü isa shika lungshihkhea? Isanü mungtsü thsungkheak kheahchoh, tüshe atsü müngü; athsüngupü kim kheahchoh tüshe ju müthri atrebe lah.

²⁰O ATUNGPUH , isanü isa yo mihbukmuyuk, isa jipürü mülimkhibo thakhitchoh, tümüde isanü nü azhihde neak yihbeakdo.

²¹Nü mung chingnü, isa düthranean; nü müretah kiulongthsü-binkiu wüntre müjihde düla; lümkhitang tüsho isa kheak trükshih tangzüng düthsümünim.

²²Sangthsübo khürünü tsüng arüshihkhukba de? Yungsho thüningbonü wungpütsüng akishihkhukba de? O ATUNGPUH isa Thrünpuh, ha nü yung de? Isanü nü kheak isa mulonglam zojihchoh, tümüde ha alala nünü rhimochoh.