Read Yimchungru Naga Jer 15 Bible Online

Jer 15 - Yimchungru Naga bible

Jer 15

¹Judüki ATUNGPUHNÜ I ki tha: Mosa tüsho Samuel I miki zhipzhip she, I mulong ha mihtsürü kilim murholo. I mikinü arü wukhiukshang, tüsho arübo tsoshang!

²Tüsho küyimki arünü nü ki thaba, “ Isa külim peang yüba?” nünü arü ki thabah: ATUNGPUHNÜ ha thachoh: Sherü arüm-tukthsü akhulanü, arüm-tukthsü lim, tüsho sherü nukshang akhulanü, nukshang lim; sherü khümzung lim akhulanü, khümzung lim, tüsho sherü arampü akhulanü arampü lim.

³Tüsho inü arü kurungkheak thsümünimrü mungji phüyi zojihbah, ATUNGPUHNÜ thachoh: alaksahpü nukshang, adütrünpü khihnubo, thüning wuhnubo tüsho alomi shiwühbo amuyupü tüsho athsümünimpü labah.

⁴Hezekia tsührü Juda kiulongthsüpuh Manasenü Jirusalem ching rhimokhi hode lomi kiulongthsü alala ki inü arübo mihtrebe kamshihbah.

⁵Shenü nü ki amuzho laba, O Jirusalem, yungsho shenü nü kheak tüzhojihba? Shepünü nü tsüde lanah de akeopü rholoba?

⁶Nünü I bahyukdo, ATUNGPUHNÜ thachoh, nü dunglim peang yüchoh; jumonü nü azhihde I khah chungkhitkheah tüsho nü thsümünim — tümütüsho I bukakhiukkhi danlopü keaka lakheah.

⁷Inü arübo phürünü lomi chipiripitbo ching yüna bahdo; inü arü tüzhoshihdo, inü I mihtsürü thsümünimdo; arünü arü limrobo ching murholo.

⁸Arü khimoberübo keto loyi kheaknü hihdakde kamdo; animuro inü athunu mihtsürü berübo azhihde athsümünim handarübah; zukleangnü inü arü kheak thsünü tüsho atrebe handarübah.

⁹Alibe shepünü thüne zübekheanü sheabahdo. Animungnü anihbe ni yüzahbah; anihbe achih ngübah tüsho wüntre mülade alabah. Tüsho aningkhi inü arü riri miki nukshang kilim jihbah, ATUNGPUHNÜ thachoh.

¹⁰I are aba, nünü I zübea lah, lomi ching mihtsürü ki inü rukachihde tüsho atsangachihde lah. Inü sho tümü müzüng yungsho münip, tütüshe alalanü I athruchoh.

¹¹ATUNGPUHNÜ tha: Tsükjide nüsa asheaningrü lung tsüde alabah, tsükjide inü thsümütsü tüsho küpkhuk kim ching nü riribonü nü ki mushushihbah.

¹²Dukulim yo shotolung ju yinchi khürünü ayihshakkhukba de?

¹³Nüsa lakhit tüsho nüsa rahpungbo lomi alala ching nüsa münean dün adün müjihde yankhia lushihbah.

¹⁴Nüsanü mümükheahkhi lomi ching inü nüsa riri tankihshihbah, tümüde I bukakhiukkhi ching lünnü aniupü thsüde mo khülang takkih-a lah.

¹⁵O ATUNGPUH nünü mükheahlah; I lümkhitang tüsho rhuakheahang, tüsho I thsümüchirü kheak I royimpü hande akijang. Nü arümkheamkhi ching I hande dütsoshih; nü dünkheaknü I mükhemükim ludo de mükheahjang.

¹⁶Nü yubo ngüdo, tüsho inü tsüh, tüsho nü yubo I asühkhi kam tüsho I mulong asühkhi kam; tümüde nü mung chingnü I jia lah, O ATUNGPUH , Wuto Thrünpuh.

¹⁷Kithsükilangrü bolung inü mübin, yungsho inü masühachih; nü khah khüp I langzü bin, tümüde nünü I bukakhiuknü mishih.

¹⁸Tümüde I thsünükhi mükheam le, I mü müngu le, athsüngupü thsunglocho? Tsükjide, nü a I ki mülapyukkhi keyung nangde, buksapke ngahkhi nangde lah.

¹⁹Jumonü ATUNGPUHNÜ ha thachoh: Nünü rholosho, inü nü beloa lubah, tüsho nü I miki zhipbah. Shoto küpüanü nünü thasho tüsho müthülünkhi müthasho, nü I yu tharü thsübah. Arünü nü kilim rholode arübah, nünü arü kilim rholode müyü.

²⁰Tüsho harü mihtsürü ki inü nü müwayinchi chipi nangde akamshihbah; arünü nü bede keochihbah tüshe arünü nü mukuk, tümüde nü khümkhitpü tüsho nü bekhitpü I nü lung lah, ATUNGPUHNÜ thachoh.

²¹Inü nü mihbukmuyuk khah chingnü bekhitbah, tüsho mihmukhiuh khah chingnü rhokhitbah.