Read Yimchungru Naga Jer 16 Bible Online

Jer 16 - Yimchungru Naga bible

Jer 16

¹ATUNGPUH yu I kilim arü:

²Hadürü dangpung ching nünü niuberü dülu, yungsho tsührübo yungsho tsührübebo düla.

³Tümüde ha dangpung ching zübekhi tsührü tüsho tsührübebo dünkheak, tüsho ha lomi ching arü zübejihrü berü tüsho trükkhitjihrü buhrü dünkheak ATUNGPUHNÜ ha thachoh:

⁴Arübo ashebe tukthsübonü ashebah. Arübo mütüzho, yungsho kiuyuka mübah; arübo alo mi kheak müneanmuru nangde alabah. Arübo nukshang tüsho khümzungnü ashebah, tüsho arü ashemibo thüning wuhnubo tüsho alomi murung shiwühbo jim kambah.

⁵Tümüde ATUNGPUHNÜ ha thachoh: Mitrip yam ching düyüzah, yungsho atüzhopü düyü, yungsho arü dütüzho; tümüde ha mihtsürü kheaknü I mungtsü, muzhodakkhi tüsho mihmüthsüm inü hande tsodo, ATUNGPUHNÜ thachoh.

⁶Ha lomi ching ato tüsho anini chido ashebah; arübo kiuyuka mübah, tüsho shenü arü thsungkheak mütüzho; arü thsungkheak tüzhode mütsüt yungsho ku mühüt.

⁷Ashekhi mitriprü shukheamde ajihpü shenü yikhap müyihnak; yungsho shenü arü buhrü yungsho berü thsungkheak shukheamkhi pung muduh.

⁸Nünü arü lung binde atsühpü tüsho ayungpü tsakamrü yam ching düyüzah.

⁹Tümüde Wuto ATUNGPUH Israel Thrünpuhnü ha thachoh: Nüsa nimungbo ching tüsho nüsa mük kinü, asühako düsheak akheam thsüshihbah.

¹⁰Tüsho küyimki nünü harü yubo ha mihtsürü ki thabanü, tüsho arünü nü ki thasho, “Tümüde ATUNGPUHNÜ ha amütsü ato isa azhihde athakhea? Isa mülimkhi tümü a? ATUNGPUH isa Thrünpuh azhihde isanü ayihbeakkhi neak tümü a?”

¹¹Judüki nünü arü ki thabah: ha tümütüsho nüsa jipürünü I bahyuk, ATUNGPUHNÜ thachoh, tüsho püpürü thrünpuhbo dunglim yübah tankih tüsho kingaün, tüsho I bahyuk tüsho I yakzan muzo;

¹²tüsho nüsanü jipürü kheaknü amütsübe yakli huh, tümüde nüsa mihbüm abannü I ki anipü thsunglode, nihbuh lümkhi anihnih amütsü yanchoh.

¹³Jumonü inü ha lomi chingnü nüsa yungsho nüsa jipürünü mümükheahkhi lomi ching jipkhita bahbah, tüsho ju ching nüsanü azhing tüsho ayin püpürü thrünpuhbo tankihbah, tümüde inü nüsa ki amuzho muhuh.

¹⁴Jumonü, tsükjide nimungbo arado, ATUNGPUHNÜ thachoh, küyimki ha müthade akamba, “ Ijip lomi chingnü Israel bekhitbuh ATUNGPUH lale,”

¹⁵tüshe “Dukulim lomi tüsho apinü yanmüzütkhi lomi alala chingnü Israel bekhitbuh ATUNGPUH lale.” Tümüde arü jipürübo kilim inü ajihkhi arü nihbuh lomi chingnü inü arü belode arübah.

¹⁶Kheakü inü thüngüh-ramrü ahihdo yüshihchoh, ATUNGPUHNÜ thachoh, tüsho arünü arübo rambah; tüsho ju dunglim inü shihjimrü ahihdo yüshihbah, tüsho arünü arübo awungbo tüsho awung mujukbo tüsho lunghübo chingnü ajimbah.

¹⁷Tümüde I mükjibo arü limro alala kheak lah; arübo I mikinü müjik yungsho arü mülimkhi I mük kinü ramkhia müla.

¹⁸Tüsho inü arü mülimkhi tüsho arü neak alü thsüde ajihlobah, tümütüsho arünü athraneanbe sangthsükhi ashemibonü I lomi müneanjihdo, tüsho athraneanbebonü I yamrüplurüp mishihdo.

¹⁹O ATUNGPUH , I sühmüh tüsho I tsunglopung, küpkhuk nimung ching I tsoyukpung, trükshihbo alomi akheam chingnü nü kilim arüchoh tüsho thachoh: Isa jipürübonü tümü yamrüplurüp mulu tüshe akeangyubo, alü mülakhi müthülünkhi kukrukbo lang lu.

²⁰Mihtsürübonü küju thrünpuhbo yungnü arü thsungkheak thrünpuhbo thsakhamkhukba de?

²¹“Jumonü tsükjide inü arü ki thsangyupü lah, ha kim ching inü arü ki I wu tüsho I sühmüh thsangyubah, tüsho I mung ju ATUNGPUH de arünü mükheahbah.”