Read Yimchungru Naga Jer 20 Bible Online

Jer 20 - Yimchungru Naga bible

Jer 20

¹Kheakü Immer tsührü amükeambuh Pashhur, shepü ATUNGPUH yam ching atobuh lakhea, Jeremianü harü müchitkhibo so.

²Judüki Pashhurnü wukihbuh Jeremia shik, tüsho ATUNGPUH yam Benjamin Chipiripit akube ching lakhi rihyam ching zo.

³Ashido yapsu küyimki Pashhurnü Jeremia rihyam chingnü dükhekhea, Jeremianü api ki tha, ATUNGPUHNÜ nü mung Pashhur de müji tüshe “Alalamükamde-atrebe.”

⁴Tümüde ATUNGPUHNÜ ha thachoh: Inü nü tüsho nü müyamrü alala ki nü atrebe kamshihchoh; tüsho nünü kheahde alachoki arübo arü riri nukshangnü akeambah. Tüsho inü Juda alala Babilon kiulongthsüpuh khah ching jihbah; apinü arübo rama lubah Babilon ching tsobah, tüsho nukshangnü arü laksahbah.

⁵Inü ha kiuto lakhit alala, hi alala, shoto kukrukbo, tüsho Juda kiulongthsüpuh rahpungbo arü riri khah ching jihbah, arünü ju yankhia lubah, tüsho rama lubah, tüsho Babilon ching hande ayübah.

⁶Tüsho nü, Pashhur, tüsho nü yam ching larü alala, rama hanbah atsobah, tüsho nü Babilon ching yübah; nü ju ching shebah tüsho nü le nünü sherü kheak akeangyu müchitkheanü nü müyamrü alala ju ching kiuyuka bahbah.

⁷O ATUNGPUH , nünü I mülapyukdo tüsho I mülapyuka lakheah, nünü I zhihodo tüsho nünü kukdo. I nimung amuyung münedung kamdo; alalanü I ki münejihchoh.

⁸Tümüde küyimki inü asukkheanü, inü zhikhit, inü zhi, “ Khahleakleak tüsho athsümünim!” Tümüde I thsungkheaknü ATUNGPUH yu nimung amuyung mükhemükim tüsho keangrümüne kamdo.

⁹Inü tha, “ Inü api mütam, yungsho kheaküa api mung ching masuk,” judüki I mulong ching mo nangde takchoh, I robo ching mükhipchoh; ju ching ramlokhinü I khilah, tüsho inü mukuk.

¹⁰Tümüde jikjikyu ahihdo inü solah, “Atrebe alala mükamde lah! Api yusheak jihang! Isanü api yusheak jihanü!” I müyamrükhung alalanü I jing mükhelim kheahchoh. “ Khükia api mülapyukbah, tüsho isanü api kukbah tüsho api kheak isa royimbah.”

¹¹Tüshe ATUNGPUH ju atrebe thirithsürü nangde I lung lah; jumonü I thsümüchirü jing mükhebah tüsho arünü mukuk. Arü tode achih ngübah,tümüde arünü akuk müngü. Arü akheam müla achihkhi küyimkishe mümih.

¹²O Wuto ATUNGPUH , nünü thiyuro-lungkirü rükakia kheahchoh, nünü mulong tüsho lümkhi ngülah; nünü arü kheak royimkhi inü kheahanü, tümüde I lümkhilümduh inü nü ki jihdo.

¹³ATUNGPUH ki khün thsüang; ATUNGPUH shiang! Tümüde apinü müthsümülarü rhangdung ju amütsü-rhimorü khah chingnü bekhitdo.

¹⁴I zübekhi nimung muthrumünean thsang! I benü I zübekhi nimung müngühmühi düla!

¹⁵I buh ki thiyusheak atsü jihbuh mihtsürü muthrumünean thsang, shepünü api khide asühshihde tha, “ Khungarü, athrürü nü kilim zübejih-a lah.”

¹⁶Ju mihtsürü ATUNGPUHNÜ amuzho mülade lahyuka bahkhi kiuto nangde thsang; apinü yapsu azhikhi khülang tüsho animuro arhunganim soshang,

¹⁷tümütüsho apinü I nuyam chingnü mülaksah; junangde I be ju I kiuyuk lapü lakheah, tüsho anihbe nuyam lünnü ato lapü lakheah.

¹⁸Küpkhuk tüsho mulong rozhak kheahpü tüsho I nimungbo achihpü ching kheampü tümü thsüpü I nuyam chingnü arükhea?