Read Yimchungru Naga Jer 25 Bible Online

Jer 25 - Yimchungru Naga bible

Jer 25

¹Juda mihtsürü alala dünkheak, Josia tsührü Juda kiulongthsüpuh Jehoiakim kiulongthsükhi kam phüyipü ching Jeremia kilim thiyu arükhi (ju Babilon kiulongthsüpuh Nebukednezar kam khülangpü lakheah,)

²küpü wukihbuh Jeremianü Juda mihtsürü tüsho Jirusalem ching larü alala ki asuk:

³Amon tsührü Juda kiulongthsüpuh Josia kiulongthsükhi kam thürükheak mahsampü chingnü khihni khiungde, kam mukukheak mahsam, ATUNGPUH yu I kilim arü, tüsho inü nüsa ki alochode asukdo, tüshe nüsanü mani.

⁴Tüsho ATUNGPUHNÜ api yamlarü wukihrübo alala alochode nüsa kilim arüshihshih she, nüsanü mani yungsho nüsa nükhün mumupho,

⁵küyimki arünü tha, “ Nüsa mihbüm abannü nüsa amütsü limro tüsho amütsü rhimobo chingnü kheakü rholoang, tüsho ATUNGPUHNÜ nüsa le nüsa jipürü kilim jihkhi lomi ching lünnü nüsa aninga labah;

⁶püpü thrünpuhbo tankihpü düyü tüsho arü dükingaün, tüsho nüsa khah rhimobonü I bukdakhiukshih. Junangde inü nüsa ki athsümünim mürhimo.”

⁷Tütüshe nüsanü I ki mani, ATUNGPUHNÜ thachoh, tüsho junangde nüsa khah rhimonü nüsa nihbuh thsümünimpü nüsanü I bukakhiukshih.

⁸Jumonü Wuto ATUNGPUHNÜ ha thachoh: Tümütüsho nüsanü I yu mani,

⁹ATUNGPUHNÜ thachoh, Inü dukulim trükbo tüsho I yamlarü Babilon kiulongthsüpuh Nebukednezar, ha lomi le mihtsürübo tüsho mühi trükshih alala azhihde handarübah; inü arü shahde thsümünimbah tüsho arübo atrebe tüsho ish thsübe, tüsho akheam müla mihmüthsüm mülakhi kamshihbah.

¹⁰Tüsho inü arü kheaknü asühachih tüsho asühkhi düsheak, yamkhünkambuh tüsho yamkhün-kambe düsheak, hi-chukhi düsheak tüsho tsünpung ching ayin keamabahshihbah.

¹¹Ha lomi abümnü thsümünimbah tüsho akeangkeang kambah, tüsho harü trükshihbonü kam nerü Babilon kiulongthsüpuh tankihbah.

¹²Jushu kam nerü dunglim, Babilon kiulongthsüpuh, ju trükshih tüsho Kaldearü lomi arü mülimkhi dün alomi ju lünnü zhikrangkhündo akamshihbah, ATUNGPUHNÜ thachoh.

¹³Inü azhihde athakhi yubo alala ha hüm ching thrütkhi lüpdükhi, trükshih alala azhihde Jeremianü müchitkhi, ju lomi kheak handarübah.

¹⁴Tümüde trükshih ahihdo tüsho kiulongthsürü atobo she arü azhorü kamshihbah; tüsho arü khah rhimobo yande arü ki jihlobah.

¹⁵Tümüde ATUNGPUH , Israel Thrünpuhnü I ki ha thachoh: I khah chingnü ha bukakhiuk yukhu pung luang, tüsho inü nü yüshihpung trükshihbo alalanü ha yungshang.

¹⁶Inü arü bolung thirithsü yüshihkhinü arübonü ayungbah tüsho ayingyingbah.

¹⁷Jumonü inü ATUNGPUH khah chingnü pung lu, tüsho ATUNGPUHNÜ I thiyia yüshihpung trükshih alala yungshih:

¹⁸Jirusalem tüsho Juda kiutobo, kiulongthsürübo tüsho atorübo, arübo zhikrangkhündo thsümünimshihpü, arübo khihni lakhi nangde ish thsüpü tüsho muthrumüneanpü;

¹⁹Ijip kiulongthsüpuh Pharao, api yamlarübo, atorübo, tüsho api mihtsürü alala;

²⁰khiungkerü larü alala; Uz lomi ching kiulongthsürü alala; Filistia lomi ching kiulongthsürü alala — Ashkelon, Gaza, Ekron, tüsho Ashdod ching aningkhi;

²¹Edom, Moab, tüsho Amonrü;

²²Tair kiulongthsürü alala, Sidon kiulongthsürü alala, tüsho keto hobah keyean lomi kiulongthsürü alala;

²³Dedan, Tema, Buz, tüsho kuyü khihde ahütrü alala;

²⁴Arabia kiulongthsürü alala tüsho loshelo ching lakhi khiungkerü larü yo kiulongthsürü alala;

²⁵Zimri kiulongthsürü alala, Elam kiulongthsürü alala, tüsho Midia kiulongthsürü alala;

²⁶dukulim kiulongthsürü alala, limshu tüsho aphüni, akhinashu thsüde, tüsho alomi kheak lakhi alomiküp kiulongthsübo alala. Tüsho arübo dunglim Babilon kiulongthsüpuhnü ayungbah.

²⁷Judüki nünü arü ki thabah, Wuto ATUNGPUH , Israel Thrünpuhnü ha thachoh: Inü nüsa bolung nukshang arüshihkhi hode yungang, müshangang tüsho mülümang, lungang tüsho dasürülo.

²⁸Tüsho nü khah ching yo pung leangkhipü thsunglosho, nünü arü ki thabah: Wuto ATUNGPUHNÜ ha thachoh: Nüsanü ayungbeah!

²⁹Kheahang, I mung tamde ajikhi kiuto kheak inü thsümütsü handarüpü tankihchoh, tüsho küde thsah nüsanü thsümüchi tsokhikhukpü? Nüsa müthsümüchidüa müyü, tümüde lomi ching larü alala azhihde inü nukshang jihchoh, Wuto ATUNGPUHNÜ thachoh.

³⁰Jumonü nünü arü azhihde harü yubo alala müchitbah: Alomi ching larü alala azhihde ATUNGPUHNÜ achang kheaknü ahukbah, tüsho api amüsüh lapung chingnü api düsheak thsübah; apinü api lomi azhihde todakde ahukbah, tüsho kurungaso-nitrü nangde ahobah.

³¹Achangnü azhikhi düsheak alomi akheam ching alankihbah, tümüde ATUNGPUHNÜ trükshihbo azhihde amüneahkhibo handarübah; apinü mihtsürü alala kheak mahkhap handarübah tüsho mihbukmuyuk ju nukshang kheak yihkihbah, ATUNGPUHNÜ thachoh.

³²Wuto ATUNGPUHNÜ ha thachoh: Kheahang, thsümütsü ju trükshih chingnü trükshih ching buchoh, tüsho alomi akheam chingnü chitmühean akihchoh!

³³Ju nimung ching ATUNGPUHNÜ alaksahkhi ju alomi akheam kheaknü akheam khülim khiungde alabah. Arübo mütüzho, yungsho mushuhmukhung, yungsho kiuyuka mübah; arübo ju alo kheak sünitmujung kambah.

³⁴Tüzhoang, nüsa mihnu neakrübo, tüsho zhiang; awahbo ching lungphülapang, nüsa mihnu boto atungrübo, tümüde nüsa laksahpü nimung arüdo, tüsho nüsa shoto phüh nangde ayokhia adannakbah.

³⁵Mihnu neakrübo mutsokhukde alabah, tüsho mihnu putungrübo tsopung mülade alabah.

³⁶Mihnu neakrübonü azhikhi, tüsho mihnu boto putungrübonü atripkhi aniang! Tümüde ATUNGPUHNÜ arü shiwüh akampung thsümünimjihchoh,

³⁷tüsho mungtsü lomibo thsümünimdo, tümütüsho ATUNGPUH buk müshakde akhiukkhinü ah.

³⁸Kekhüzü nangde apinü lapung bahbah tsodo; tümütüsho bukmüke nukshang tüsho api bukmükede akhiukkhinü arü lomi thsümünima lah.