Read Yimchungru Naga Jer 26 Bible Online

Jer 26 - Yimchungru Naga bible

Jer 26

¹Josia tsührü Juda kiulongthsüpuh Jehoiakim kiulongthsü atankih ching, ha yu ATUNGPUH kilimnü arü:

²ATUNGPUHNÜ ha thachoh: ATUNGPUH yam mahkhappung ching zhipang, tüsho ATUNGPUH yam ching kingaünpü arükhi Juda kiutobo alala ki asukang; inü nü ki thiyukhüm jihkhi yubo alala arü ki asukang; thiyubüm khülang she düwuhlo.

³Khükia arü alalanü anibah tüsho arü amütsü limro chingnü rholobah, junangde arünü amütsü rhimokhi hode thsümütsü handarüpü lakhi dünkheak I lümkhi müthribah.

⁴Nünü arü ki thabah: ATUNGPUHNÜ ha thachoh: Inü nüsa miki zojihkhi yakzan ching tsahpü nüsanü I ki manisho,

⁵tüsho nüsanü mania lalashe inü I yamlarü wukihrübo niokheamde nüsa kilim arüshihkhi yubo manisho,

⁶inü ha yam Shilo nangde akamshihbah, tüsho alomi trükshih alala bolung ha kiuto muthrumünean kamshihbah.

⁷Amükeamrübo le wukihrübo tüsho mihtsürü alalanü Jeremianü harü thakhi yubo so.

⁸Tüsho küyimki ATUNGPUHNÜ mihtsürübo alala ki asukpü Jeremia ki thiyukhüm jihkhi alala bankhea, amükeamrü le wukihrü tüsho mihtsürü alalanü api ramlobah tha, “ Nü ashepü tsütsü!

⁹Tümüde nünü ATUNGPUH mung chingnü, ‘ Ha yam Shilo ruk kambah, tüsho ha kiuto mihtsürü mülade zhikrangkhündo alabah’ de müchitcho?” Tüsho mihtsürü alalanü ATUNGPUH yam ching Jeremia mükamde mukhung.

¹⁰Küyimki Juda torübonü harü sokhea, arünü kiulongthsüpuh yam chingnü ATUNGPUH yam lim atu tüsho ATUNGPUH yam ching yüzahpung chipiripit aso kheak arübah bin.

¹¹Judüki amükeamrü tüsho wukihrübonü atorü tüsho mihtsürü alala ki tha, “Ha mihtsürü asheshihpü thülünlah, tümütüsho nüsa nükhünnü asokhi nangde, apinü ha kiuto azhihde müchitdo.”

¹²Judüki Jeremia nü atorü tüsho mihtsürü alala ki tha, “ Nüsanü asokhi yubo alala, ha yam tüsho ha kiuto azhihde müchitpü ATUNGPUHNÜ I thiyikheah.

¹³Kheakü jumonü nüsa limrobo tüsho nüsa rhimobo thsüphuloang, tüsho ATUNGPUH nüsa Thrünpuh yu aniang, tüsho ATUNGPUHNÜ nüsa azhihde athakhi thsümütsü alala dünkheak api lümkhi müthribah.

¹⁴Tüshe I thsungkheak a, I ha kheak nüsa khah ching lah. Nüsanü atsükhi tüsho alungki lakhinü I kheak rhimoang.

¹⁵Ha lang nüsanü khürü mükheahpü ju, nüsanü I sheshihsho, nüsanü nüsa le ha kiuto tüsho ha ching larübo kheak mülimkhi thiyih handarübah, tümüde thiyuro ching harü yubo nüsa nükhün ching arüshihpü ATUNGPUHNÜ I thiyikheah.”

¹⁶Judüki atorü tüsho mihtsürü alalanü amükeamrü tüsho wukihrübo ki tha, “Ha mihtsürü asheshihpü müthülün, tümüde apinü ATUNGPUH isa Thrünpuh mung chingnü isa ki asukdo.”

¹⁷Tüsho lomi ching azothsürü khürünü asürübahle mukhunga lakhi mihtsürü alala ki tha,

¹⁸“Juda kiulongthsüpuh Hezekia nimungbo ching müchitbuh Moreshethrü Mikanü Juda mihtsürü alala ki tha: ‘ Wuto ATUNGPUHNÜ ha thachoh, Zion ju thulu nangde wochakbah; Jirusalem athsümünim mujung kambah, tüsho thüyam wung ju murung kambah.’

¹⁹Juda kiulongthsüpuh Hezekia tüsho Juda alalanü atsütsü api sheshihkhea de? Apinü ATUNGPUH mütrekhea de tüsho ATUNGPUH amuzho thsungkheak mumushu de, tüsho apinü arü azhihde athakhi thsümütsü dünkheak ATUNGPUH lümkhi mümüthrikhea de? Tüshe isa a isa kheak thsümütsü ato handarüpü thsüchoh!”

²⁰ATUNGPUH mung ching müchitpü püpü mihtsürü, Shemaia tsührü Uria, Kiriath-jearim chingnü alakheah. Apinü Jeremianü müchitkhi nangde ha kiuto tüsho ha lomi azhihde müchit.

²¹Tüsho küyimki kiulongthsüpuh Jehoiakim, api yo thirithsürübo tüsho atorü alalanü api yubo sokhea, kiulongthsüpuhnü api sheshihpü yim; tüsho küyimki Urianü ju sokhea, api trede kam tüsho Ijip ching tsokhide yü.

²²Kiulongthsüpuh Jehoiakimnü Akbor tsührü Elnathan tüsho api lung mihtsürübo Ijip ching yüshih,

²³tüsho arünü Ijip chingnü Uria bea lu tüsho kiulongthsüpuh Jehoiakim ki api bedarü, shepünü api nukshangnü kiua keamshih tüsho ashemi ju mihtsürü boto mibahpung jipa bah,

²⁴Tüshe Shaphan tsührü Ahikam khah Jeremia kheak lakheah, junangde api sheshihpü mihtsürübo khah ching muyukjih.