Read Yimchungru Naga Jer 27 Bible Online

Jer 27 - Yimchungru Naga bible

Jer 27

¹Josia tsührü Juda kiulongthsüpuh Zedekia kiulongthsü atankih ching, ATUNGPUH kilimnü ha yu Jeremia kilim arü,

²ATUNGPUHNÜ I ki ha tha: Shihküp-liu tüsho sang-sümkhibonü nü thsungkheak sangkaplak thsang, tüsho jurü nü hung kheak yihkihang.

³Edom kiulongthsüpuh, Moab kiulongthsüpuh, Amon kiulongthsüpuh, Tair kiulongthsüpuh tüsho Sidon kiulongthsüpuh kilim Jirusalem ching Juda kiulongthsüpuh Zedekia kilim arükhi yunithsürü khah hode thiyusheak yüshang.

⁴Arü putungrü thsungkheak arü ki ha thiyukhüm jihang: Wuto ATUNGPUH Israel Thrünpuhnü ha thachoh: Nüsanü ha nüsa putungrübo ki thabah:

⁵I wu ato tüsho I khah chungkhitkhinü alomi kheak lakhi mihtsürü tüsho shiwühbo bede inü alomi thrün, tüsho inü amulongrü kilim ju jih.

⁶Kheakü inü harü lomi alala I yamlarü, Babilon kiulongthsüpuh Nebukednezar khah ching jihdo, tüsho inü api kilim mütüm shiwühbo she api tankihpü jihdo.

⁷Anihbuh lomi keampü kim mukhiungyi khiungde trükshih alalanü api le atsührü tüsho atsührütsührü tankihbah; jushu trükshih ahihdo tüsho kiulongthsürü atobonü api arü azhorü kamshihbah.

⁸Tüshe trükshih khürü yungsho kiulongthsünü ha Babilon kiulongthsüpuh Nebukednezar mütankihsho, tüsho Babilon kiulongthsüpuh sangkaplak khüp ahung müyüzahsho, inü ju trükshih nukshang, khümzung tüsho arüm-tukthsünü, api khah hode inü ha thsümünimkhi mükheamyi khiungde athsümüchibah, ATUNGPUHNÜ thachoh.

⁹Jumonü nüsanü nüsa wukihrübo, müchitrübo, milim yihnakrübo, müchityu tharübo, yungsho wurük-huhrü ki dani, sherünü nüsa ki thacho, “ Nüsanü Babilon kiulongthsüpuh mütankih.”

¹⁰Tümüde arünü nüsa ki akeangyu müchitchoh, ju hode nüsa lomi chingnü nüsa limshude atsoshihbah; inü nüsa yankhitbah, tüsho nüsa dükheakbah.

¹¹Tüshe trükshih khürünü nihbuh hung Babilon kiulongthsüpuh sangkaplak khüp mükhümsho inü nihbuh lomi ching wochakde alashihbah, ATUNGPUHNÜ thachoh.

¹²Inü Juda kiulongthsüpuh Zedekia ki ju ruk asukdo: Babilon kiulongthsüpuh sangkaplak khüp nü hung mükhümang, tüsho api le api mihtsürü tankihang tüsho laang.

¹³Tümüde nü tüsho nü mihtsürübo, trükshih khürünü Babilon kiulongthsüpuh mütankihpü dünkheak ATUNGPUHNÜ asukkhi nangde nukshang, khümzung tüsho arüm-tukthsünü ashepü?

¹⁴Babilon kiulongthsüpuh mütankihpü wukihrübonü nüsa ki thakhi yubo dani, tümüde arünü nüsa ki akeangyu müchitchoh.

¹⁵Inü arübo müthiyi, ATUNGPUHNÜ thachoh, tüshe arünü I mung chingnü akeangyu müchitchoh, ju hode inü nüsa yankhitbah tüsho nüsa le nüsa ki müchitrü wukihrübo dükheakbah.

¹⁶Judüki inü amükeamrübo tüsho ha mihtsürü alala ki tha, ATUNGPUHNÜ ha thachoh: Nüsa ki hade müchitrü wukihrübo ki dani, “ATUNGPUH yam phühlungbo Babilon chingnü nahde hanlodarübah,” tümüde arünü nüsa ki akeangyu müchitchoh.

¹⁷Arü ki dani; Babilon kiulongthsüpuh tankihang tüsho laang. Tümüde ha kiuto zhikrangkhündo kamshihpü?

¹⁸Atsütsü arü wukihrübo a sho, tüsho ATUNGPUH yu arü kheak lasho, arünü Wuto ATUNGPUH ki mushushang, junangde phühlungbo ATUNGPUH yam ching lakhi, Juda kiulongthsüpuh yam ching lakhi, tüsho Jirusalem ching lakhi Babilon ching müyü.

¹⁹Tümüde Wuto ATUNGPUHNÜ dungjingbo, kekung, atobe, tüsho aningkhi phühlungbo ha kiuto ching aninga lakhi dünkheak ha thachoh,

²⁰küpü Babilon kiulongthsüpuh Nebukednezarnü Jehoiakim tsührü Juda kiulongthsüpuh Jehoiakin, tüsho api lung Juda tüsho Jirusalem ching mükheahmudurü Jirusalem chingnü Babilon lim ramde ayüchoki mulude ayükhea —

²¹Wuto ATUNGPUH , Israel Thrünpuhnü ATUNGPUH yam ching lakhi, Juda kiulongthsüpuh yam ching tüsho Jirusalem ching lakhi phühlungo dünkheak ha thachoh.

²²Jurübo Babilon ching hande ayübah tüsho arü thsungkheaknü inü rhuakheahpü nimung khiungde arü ju ching labah, ATUNGPUHNÜ thachoh. Judüki inü arü belodarübah tüsho ha dangpung ching zobah.