Read Yimchungru Naga Jer 28 Bible Online

Jer 28 - Yimchungru Naga bible

Jer 28

¹Ju kam ching, Juda kiulongthsüpuh Zedekia kiulongthsü atankihlim peang, kam phüyi khinu phüngüpü ching, Gibeon chingnü Azzur tsührü wukihbuh Hanania nü ATUNGPUH yam ching amükeamrübo tüsho mihtsürü alala mikinü I ki tha,

²“ Wuto ATUNGPUH , Israel Thrünpuhnü ha thachoh: Inü Babilon kiulongthsüpuh sangkaplak yihshakdo.

³Kam mahne dükeaknü Babilon kiulongthsüpuh Nebukednezarnü ha dangpung chingnü Babilon ching lude ayükhi ATUNGPUH yam ching yo phühlungbo alala ha dangpung ching hanlodarübah.

⁴Inü Jehoiakim tsührü Juda kiulongthsüpuh Jehoiakin she tüsho Juda chingnü Babilon ching ramtso yürü alala belodarübah, ATUNGPUHNÜ thachoh, tümüde inü Babilon kiulongthsüpuh sangkaplak yihshakdo.”

⁵Judüki wukihbuh Jeremianü amükeamrübo tüsho ATUNGPUH yam ching zhiprü mihtsürü alala mikinü wukihbuh Hanania ki asuk;

⁶tüsho wukihbuh Jeremianü tha, “Amen! ATUNGPUHNÜ jude thsüshang; ATUNGPUHNÜ nünü müchitkhi yubo dünjishang shi, tüsho ATUNGPUH yam ching yo phühlungbo tüsho ramtsorü alala Babilon chingnü ha dangpung belode arüshang shi.

⁷Tüshe nünü sode tüsho mihtsürü alalanü sode inü asukkhi yu kheakü aniang.

⁸Jipü kim chingnü wukihrübonü I tüsho nü müngüh, lomi ahihdo tüsho kiulongthsü atobo azhihde thirithsü, khümzung tüsho arüm-tukthsü müchit.

⁹Wukihrü shepünü mungtsü müchitbah, wukihbuh yu dünjibanü, ATUNGPUHNÜ wukihbuh dükde thiyia lah de mükheahbah.”

¹⁰Judüki wukihbuh Hananianü wukihbuh Jeremia hung kheaknü sangkaplak lubahle yihshak.

¹¹Tüsho Hananianü mihtsürü alala mikinü asuk, “ATUNGPUHNÜ ha thachoh: Hanangde inü kam mahne dükeaknü trükshih alala hung kheaknü Babilon kiulongthsüpuh Nebukednezar sangkaplak yihshakbah.” Tüsho wukihbuh Jeremia nü nihbuh limro ching yü.

¹²Wukihbuh Hananianü wukihbuh Jeremia hung kheaknü sangkaplak yihshakbah anükhüh dunglim, ATUNGPUH yu Jeremia kilim arü:

¹³Yüang, Hanania ki thaang, ATUNGPUHNÜ ha thachoh: Nünü sangkaplak yihshakdo tüsho ju müthripü yinchikaplak thsüdo!

¹⁴Tümüde Wuto ATUNGPUH , Israel Thrünpuhnü ha thachoh: Inü trükshih alala hung kheak yinchikaplak yihkihjihdo, junangde Nebukednezar tankihbah, tüsho arünü dükde api tankihbah; inü api kilim mütüm shiwühbo she jihdo.

¹⁵Tüsho wukihbuh Jeremianü wukihbuh Hanania ki tha, “Aniang, Hanania, ATUNGPUHNÜ nü müthiyi, tüsho nünü ha mihtsürübo akeangyu ching kinshihchoh.

¹⁶Jumonü ATUNGPUHNÜ ha thachoh: Inü nü alomi kheaknü yihkhita bahpü thsüchoh. Ha kam ching nü ashebah, tümütüsho nünü ATUNGPUH azhihde asukdo.”

¹⁷Ju kam, khinu thünepü ching, wukihbuh Hanania sheabah.