Read Yimchungru Naga Jer 29 Bible Online

Jer 29 - Yimchungru Naga bible

Jer 29

¹Ha Nebukednezarnü Jirusalem chingnü ramtso ching hande ayürü, ramtsorü bolung aningkhi azothsürübo, amükeamrübo, wukihrübo, tüsho mihtsürü alala kilim wukihbuh Jeremianü Jirusalem chingnü thrüta yüshihkhi yubo ah.

²Ha kiulongthsüpuh Jehoiakin, tüsho kiulongthsüberü, mahkhaprübo, Juda tüsho Jirusalem limberübo, keaklahrü, yingkingrü Jirusalem chingnü chamachihshu thrütkheah.

³Kihüm ju kiulongthsüpuh Zedekianü Babilon kiulongthsüpuh Nebukednezar kilim yüshihkhi Shaphan tsührü Elasa tüsho Hilkia tsührü Gemaria khah hode mühah.

⁴Wuto ATUNGPUH , Israel Thrünpuhnü, inü Jirusalem chingnü Babilon ching yüshihrü ramtsorü alala kilim ha thachoh:

⁵Thüyambo thsang tüsho jurü ching laang; ayündobo ayünang tüsho jurü chingnü akhiukkhi tsühang.

⁶Niuberübo luang tüsho tsührübo le tsührübebo laang; nüsa tsührübo thsungkheak niuberübo lujang, tüsho nüsa tsührübebo rhangshang, junangde arünü tsührübo tüsho tsührübebo labah; ju ching wüh buang, tüsho dükheam.

⁷Tüshe inü nüsa ramtso yüshihkhi kiuto mungtsü tüsho lalim atsü thsungkheak yimang. ATUNGPUH ki tamkhüntamnüang, tümütüsho ju lalim tsüsho nüsa she lalim tsübah.

⁸Tümüde Wuto ATUNGPUH , Israel Thrünpuhnü ha thachoh: Nüsa lung larü wukihrü tüsho müchitrübonü nüsa dümülapyukshih, tüsho arünü milim mikhi nüsanü dani,

⁹tümüde arünü I mung chingnü akeangyu nüsa ki müchitchoh; inü arü müthiyi, ATUNGPUHNÜ thachoh.

¹⁰Tümüde ATUNGPUHNÜ ha thachoh: Babilon ching kam nerü bankhitsho lang inü nüsa rhuakheahbah, tüsho inü nüsa ki alokhikhi dünjishihbah tüsho nüsa ha dangpung ching belodarübah.

¹¹Tümüde inü nüsa thsungkheak lümkhi thsükhi inü mükheahlah, ATUNGPUHNÜ thachoh, nüsa arung thsungkheak lümkhibo tüsho athsümünimpü yung, nüsa kilim arübe mulonglam jihpü lah.

¹²Judüki nüsanü I ki jichoki tüsho arübah I ki tamkhüntamnüchoki, inü nüsa ki anibah.

¹³Nüsanü küyimki I yimbanü, nüsanü I ngübah; nüsanü nüsa mulong athrünkhinü I yimsho,

¹⁴inü nüsa ki I ngüshihbah, ATUNGPUHNÜ thachoh, tüsho inü nüsa kuhi jihlobah tüsho inü nüsa müzütshihpung trükshihbo alala tüsho dangpungbo alala chingnü nüsa bemukhungbah, ATUNGPUHNÜ thachoh, tüsho inü nüsa ramtso ching yüshihpung ching nüsa belodarübah.

¹⁵Tümütüsho nüsanü tha, “ATUNGPUHNÜ isa thsungkheak Babilon ching wukihrübo arüshihdo,” —

¹⁶David kiulongthsü-binkiu kheak binbuh kiulongthsürü, tüsho ha kiuto ching lakhi mihtsürü alala, nüsa lung ramtso ching müyükhi nüsa buhtsührü dünkheak ATUNGPUHNÜ ha thachoh:

¹⁷Wuto ATUNGPUHNÜ ha thachoh, inü arü kheak nukshang, khümzung, arüm-tukthsü arüshihbah, tüsho inü arübo mütsühkhukbe ashuhkhi khubaso nangde akamshihbah.

¹⁸Inü arübo nukshang, khümzung, tüsho arüm-tukthsünü yande müshambah, tüsho arübo alomi kiulongthsü alala ki athraneanbe, muthrumünean tüsho atrebe ish thsübe tüsho inü arü yana yüshihkhi trükshih alala bolung keangrümünekhi kamshihbah,

¹⁹tümütüsho arünü I yu mani, ATUNGPUHNÜ thachoh, küyimki inü nüsa kilim I yamlarü wukihrübo alochode arüshihkhea, tüshe nüsanü mani, ATUNGPUHNÜ thachoh.

²⁰Tüshe kheakü, inü Jirusalem chingnü Babilon ramtso ching yüshihrübo nüsa alala, ATUNGPUH yu aniang:

²¹Wuto ATUNGPUH , Israel Thrünpuhnü I mung chingnü nüsa ki akeangyu müchitrü, Kolaia tsührü Ahab tüsho Maaseia tsührü Zedekia dünkheak ha thachoh: Inü arübo Babilon kiulongthsüpuh Nebukednezar khah ching jihpü thsüchoh, tüsho apinü arübo nüsa mük kinü alaksahbah.

²²Tüsho arü dünkheak Babilon ching Juda ramtsorü alalanü ha muthrumüneanbah: “ATUNGPUHNÜ nü Zedekia tüsho Ahab nangde kamshang, sherü Babilon kiulongthsüpuhnü mo ching takkhea,”

²³tümütüsho arünü Israel ching atrebe neak yihbeakkhi lah tüsho arü yamhingrü niuberü kheak müzammüram yihbeak tüsho arü ki thiyukhüm müjihkhi akeangyubo I mung chingnü asukdo; inü mükheahlah tüsho I thiyumütsan ah, ATUNGPUHNÜ thachoh.

²⁴Nehelamrü Shemaia ki nünü thaang:

²⁵Wuto ATUNGPUH , Israel Thrünpuhnü ha thachoh: Nü mung chingnü Jirusalem ching lakhi mihtsürü alala kilim, Maaseia tsührü amükeambuh Zephania tüsho amükeamrü alala ki kihüm mühahde tha:

²⁶ATUNGPUHNÜ aküdah thsüde amükeambuh Jehoiada müthri nü amükeambuh kamshih, junangde makharü mihtsürünü wukihrü nangde ahorichoki, anihbuh yinchiliu ching yukde, yinchi-hunghingbe yukjihpü ATUNGPUH yam ching atorü labah.

²⁷Dale tümüde Anathothrü Jeremia nüsa bolung wukihrü nangde alakhi nünü mümüdan le?

²⁸Tümüde apinü dükdüa isabo Babilon ching yüshihde tha, “Ha kim ashang labah, thüyambo thsang tüsho jurü ching laang, tüsho ayündobo thsübah jurü chingnü akhiukkhi tsühang.”

²⁹Amükeambuh Zephanianü ha kihüm wukihbuh Jeremianü sode khe.

³⁰Judüki ATUNGPUH yu Jeremia kilim arü:

³¹Ramtsorü alala ki thaa yüshang, Nehelamrü Shemaia dünkheak ATUNGPUHNÜ ha thachoh: Tümütüsho inü api müthiyia lalashe Shemaianü nüsa ki müchitdo, tüsho akeangyu ching nüsa kinshihdo,

³²jumonü ATUNGPUHNÜ ha thachoh: Inü Nehelamrü Shemaia tüsho api tsühsoniusobo thsümüchipü thsüchoh; inü I mihtsürü ki atsü rhimopü lakhi kheahpü thsüde ha mihtsürü bolung api a sheshe alapü yung, ATUNGPUHNÜ thachoh, tümüde apinü ATUNGPUH azhihde asukdo.