Read Yimchungru Naga Jer 3 Bible Online

Jer 3 - Yimchungru Naga bible

Jer 3

¹Athrürü khülangnü aniube bahbah api kinü tsosho tüsho püpürü thrürü niuberü kamsho, apinü alibe kilim yüloba de? Hadürü lo ju tode mümüneanba de? Nünü müyamrü ahihdo kheak müzammüramdo; tüsho nü I kilim arüloba de? ATUNGPUHNÜ thachoh.

²Awung mujukbo kheak abina kheahang! Küching nü müyapkhi la? Loshelo ching Arabrünü ajimkhi nangde limro mungyean nünü muzhoachihrü aleangkheah. Nü müzammüram tüsho mihbukmuyuknü lomi müneanjih.

³Jumonü müngühmühi tsüngbo tholoabah, tüsho mükhean tsüngbo marü; nü a müzammüramrü miro ah, nünü machih.

⁴Nünü kheakü, “Abuh, nü a I athunu müyambuh de I ki müji de,

⁵lünnü nü bukakhiukba de, akheam khiungde nü mulong zhipzhipba de?” Hanangde nünü asuk, tüshe akukkhi thülün nünü amütsü alala rhimodo.

⁶Kiulongthsüpuh Josia nimungbo ching ATUNGPUHNÜ I ki tha: Anihbenü arhimokhi nünü ngünah, akin mülakhi khülang, Israel, künangde anihbenü awung aban yükihkhea tüsho sangdung phüyak aban khüp müzammüram rhimokhea?

⁷Tüsho inü lüm, “Ha alala rhimoshu alibenü I kilim alodarübah”; tüshe alibenü malodarü, tüsho dükde mülakhi anihbe achi Judanü ju ngü.

⁸Akin mülakhi, Israel, müzammüramkhi hode abahkhi yukhüm jihbah alibe inü atsoshihkhi anihbenü ngü; tütüshe dükde mülakhi anihbe achi Judanü mütre, tüshe anihbe she yü tüsho müzammüram rhimo.

⁹Tümütüsho alibenü anihbe müzammüram machihde rhimo, alibenü alo müneanjih, lung tüsho sangdung kheak müzammüram thsü.

¹⁰Tütüshe dükde mülakhi anihbe achi Judanü mulong athrünkhinü I kilim malodarü, tüshe rüklimnü lang ah, ATUNGPUHNÜ thachoh.

¹¹Judüki ATUNGPUHNÜ I ki tha: Akin mülakhi Israelnü dükde mülakhi anihbe achi Juda kheaknü mülimkhi nükde huhdo.

¹²Yüang, tüsho ha yubo dukulim peang zhiyukjang, tüsho thaang: Rholoang, akin mülakhi Israel, ATUNGPUHNÜ thachoh; inü nü kheak bukakhiukde mükheah, tümüde I mihmüthsüm lah, ATUNGPUHNÜ thachoh; inü lünnü bukakhiukdü lang müla.

¹³Nünü ATUNGPUH nü Thrünpuh azhihkhi mütsande mükheahshang, tüsho nü muzho jaksorü bolung sangdung phüyak aban khüp hiumüzütkhi, tüsho I yu manikhi alokhiang, ATUNGPUHNÜ thachoh.

¹⁴Rholoang, O akin mülakhi tsührü, ATUNGPUHNÜ thachoh, tümüde I nü putungrü lah; inü nüsa, khülang kiuto chingnü tüsho mahne yamkhün chingnü bea lubah, tüsho inü nüsa Zion lim bedarübah.

¹⁵Inü I yu anirü nü kilim namfimihnu neakrü jihbah, tüsho arünü mükheahmudu tüsho anikhitkhi hode yakzan shuhbah.

¹⁶Tüsho küyimki nüsa lomi ching wüh bubanü, ATUNGPUHNÜ thachoh, arünü kheaküa mütha, “ATUNGPUH tangzüng sangdan.” Ju lüm ching marü, yungsho mülümkhit, yungsho müthsülo.

¹⁷Ju kim ching Jirusalem ju ATUNGPUH kiulongthsü-binkiu de ajibah, tüsho trükshih alala Jirusalem ching ATUNGPUH miki mukhungbah, tüsho kheaküa arünü mulong müküpde nihbuh amütsü lümkhi ching müyan.

¹⁸Judüki Juda yamkhünnü Israel yamkhün lung arihbah, tüsho arü rukhühnü inü nüsa jipürü kilim yamrüplurüp jihkhi lo lim dukulim lomi chingnü arübah.

¹⁹I tsührü bolung küde thsah nü zojihpü; tüsho alo atsü, trükshih alala yo akheahakham yamrüplurüp küde ajihpü de inü tha. Tüsho nünü I ki, abuh de ajibah tüsho I kilimnü rholode mutso de inü tha.

²⁰Tüshe akin mülakhi niuberünü ayamkhünbuh bahbah atsokhi nangde, nünü I ki akin mülade lado, O Israel yamkhün, ATUNGPUHNÜ thachoh.

²¹Awung mujukbo kheak düsheak sochoh, ha Israel tsührübonü mushude atripkhi lah, tümütüsho arünü arü limro tsahphülapdo, arünü ATUNGPUH arü Thrünpuh mihabahdo:

²²Rholoang, O akin mülakhi tsührübo, inü nüsa akin mülakhi chingnü thsüngujihbah. “He, isa nü kilim arüchoh; tümüde nü a ATUNGPUH isa Thrünpuh.

²³Tsükjide awung mujuk tüsho awungbo kheak sangthsü kingaünde asühkhi ju akeangkeang lah. Tsükjide ATUNGPUH isa Thrünpuh lung Israel akhümkhit lah.

²⁴Tüshe isa athunuchokinü isa jipürübonü achihbe rhimokhi hode arü mihnubo, moshibo, arü tsührübo tüsho tsührübebo muyuabahdo.

²⁵Isanü achih ngükhi ching lunga yapanü, tüsho isanü wüntre mülakhinü isa lüpdoshang; isa le isa jipürübo, isa athunuchokinü khihni khiungde isanü ATUNGPUH isa Thrünpuh azhihde neak yihbeakdo; tüsho isanü ATUNGPUH isa Thrünpuh yu manidebahdo.”