Read Yimchungru Naga Jer 30 Bible Online

Jer 30 - Yimchungru Naga bible

Jer 30

¹ATUNGPUH kilimnü Jeremia kilim thiyu arü:

²ATUNGPUH , Israel Thrünpuhnü ha thachoh: Inü nü ki asukkhi yubo alala hüm khülang ching thrütang.

³Tümüde I mihtsürü Israel tüsho Juda kuhi ngülopü nimungbo tsükjide arüchoh, ATUNGPUHNÜ thachoh, tüsho inü arü jipürü kilim jihkhi lomi ching arübo belodarübah tüsho arünü ju yamalo lubah.

⁴ATUNGPUHNÜ Israel tüsho Juda dünkheak asukkhi yubo:

⁵ATUNGPUHNÜ ha thachoh: Isanü atrebe, atrekhi zhikhi sodo, mungtsü yung.

⁶Kheakü keokhiang, tüsho kheahang, athrürünü tsührü zübekhukba de? Dale tümüde aliberü thsünüchoki nangde athrürü abannü chim kheak khah nimbah inü ngücho? Tümüde mihbüm abannü pheakmulukdo kama la?

⁷Aha! ju nimung küde atrebe, ju ruk püpü müla; ha Jakob thsungkheak lümthsünü kim lah; tütüshe api ju chingnü abekhitbah.

⁸Wuto ATUNGPUHNÜ thachoh, ju nimung, inü api hung kheaknü sangkaplak yihshakbah, tüsho api yinchiliu yihkhitjihbah, tüsho khiungkerübonü kheaküa api azhorü mükamshih.

⁹Tüshe arünü A TU N GPU H arü Thrünpuh tankihbah tüsho inü arü thsungkheak asürüshihkhi David kiulongthsüpuh tankihbah.

¹⁰Tüshe nü thsungkheak a, dütre, I yamlarü Jakob, ATUNGPUHNÜ thachoh, tüsho mulong dübah, O Israel; tümüde inü nü limshu chingnü akhümkhitbah, tüsho nü tsührübo arübo ramde ayükhi lomi chingnü akhümkhitbah. Jakob alodarübah tüsho mungtsü le keamramkhi labah, tüshe shenü api mümüyinsahshih.

¹¹Tümüde nü khümkhitpü I nü lung lah, ATUNGPUHNÜ thachoh, inü nüsa hiumüzütshihpung trükshihbo alala kheamshihbah, tüshe nü a inü mükheamshih. Thiyuronü inü nü danbah, tüsho nü shahde müthsümüchidüa mutsoshih.

¹²Tümüde ATUNGPUHNÜ ha thachoh: Nü mü müthsüngukhukbe lah, nü yurikhi mungukhukbe lah.

¹³Nü kümpü she müla, nü mü thsungkheak moli müla, nü thsüngupü müla.

¹⁴Nü muzhorü alalanü nü mihabahdo; arünü nü müküm; tümüde thiririnü nangde inü nü shikdo, bukmükerü khülangnü nangde thsümüchido, tümütüsho nü mülimkhi tolah, tümütüsho nü neakbo hihdaklah.

¹⁵Tümüde nü yurikhi thsungkheak zhicho? Nü thsünükhi müthsüngukhukbe ah. Tümütüsho nü mülimkhi tolah, tümütüsho nü neakbo hihdaklah, inü harü nü ki rhimodo.

¹⁶Tüshe sherünü nü tsühabahchonü alala tsühabahbah, tüsho nü riri alala, mihbüm abannü ramtso ching yübah; sherünü nü yankhia luchonü arübo yankhia lubah, tüsho sherünü nü shih tsühchonü nü arübo ju shih kamshihbah.

¹⁷Tümüde inü nü shihphü tsüloshihbah, tüsho nü mübo inü athsüngubah, ATUNGPUHNÜ thachoh, tümütüsho arünü nüsa ki ayankhitkhi de jido: “Ha Zion; shenü anihbe thsungkheak mükümchoh!”

¹⁸ATUNGPUHNÜ ha thachoh: Inü Jakob khimyam kuhibo jihlopü thsüchoh, tüsho api lapung kheak mihmuzho labah; kiuto ju amujuk kheak thsülobah, tüsho alungki dangpung kheak kiulongthsürü-yam thsübah.

¹⁹Jurü chingnü makshe jihkhi arübah tüsho asühachihrü düsheak sobah. Inü arübo hihde akamshihbah tüsho arü nükde müla; inü arü müretahde kamshihbah tüsho arü khenoa müla.

²⁰Arü tsührübo adüso nimung ching nangde alabah, I miki arü boto tankih-a labah; tüsho arü junorü alala inü thsümüchibah.

²¹Arü kovünor arü bolung chingnü alabah, arü yakzanshuhrü arü bolungnü arübah; inü api phünide bedarübah, tüsho api I ki arübah tümüde shepünü müjide I ki arükhukpü? ATUNGPUHNÜ thachoh.

²²Tüsho nüsa I mihtsürü thsübah tüsho I nüsa Thrünpuh thsübah.

²³Kheahang, ATUNGPUH tsüngpungtsüngpung, bukakhiukkhi chinthrüm tsodo, ha mihbukmuyuk ku kheak keamkihbah!

²⁴Api lüm ching lümkhi mürhimoyiki tüsho mukukyiki ATUNGPUH buk mükede akhiukkhi mutuklo. Arübe nimungbo ching nüsanü ha anikhitbah.