Read Yimchungru Naga Jer 31 Bible Online

Jer 31 - Yimchungru Naga bible

Jer 31

¹ATUNGPUHNÜ thachoh, ju kim ching I Israel yamkhün alala Thrünpuh thsübah, tüsho arübo I mihtsürü thsübah.

²ATUNGPUHNÜ ha thachoh: Mihtsürü sherü nukshang chingnü tsokhidünü sunglo ching mihmüthsüm ngüdo; küyimki Israelnü sühakhim yimkhea,

³ATUNGPUHNÜ adüsonü api ki akhiuka huh. Inü akheam müla amuzhonü nü muzhokheah; jumonü mutuklode inü nü ki amuzho huh.

⁴Kheaküshe inü nü bemusubah, tüsho nü thsülobah, O atsangkhit Israel! Kheaküshe nünü züpzüppü lubah tüsho asühde tsünde ayübah.

⁵Kheaküshe nünü Samaria wungbo kheak kurungasolu thsübah; ayangrünü ayangbah tüsho aso tsühbah.

⁶Tümüde judüki nimung khülang aheangrünü Ephraim lomi wung ching jikhi labah: “Arang, isanü ATUNGPUH isa Thrünpuh kilim Zion ching wutuanü.”

⁷Tümüde ATUNGPUHNÜ ha thachoh: Jakob thsungkheaknü asühde achangnü khün thsüang, tüsho trükshih yo atobe thsungkheak zhiang; zhiyukang, mungshi jihang, tüsho thaang, “ O ATUNGPUH , nü mihtsürü aningkhi Israel khümkhitang.”

⁸Kheahang, inü dukulim lomi chingnü arübo bedarüpü lah, tüsho limshu lomi chingnü arü bolung müktukrü tüsho jingkikrü, berünü khungarü hanbah tüsho thsünüde, rukhühnü bemukhungbah; boto ato, arübo ha ching alodarübah.

⁹Tripde arübo arübah tüsho shukheamde inü arü belodarübah, inü arübo yungzü ke yeande atsahshihbah, limro mukhiungkhi ching arü jing mümükhe; tümüde I Israel abuh kamdo tüsho Ephraim ju I tsührü adüjibuh.

¹⁰ATUNGPUH yu aniang, O trükshihbo, tüsho limshu ching keyean lomibo ching zhiyukang; thaang, “Shepünü Israel müzütshihkheanü apinü arü bemukhungbah, tüsho mihnu neakrü nangde api mihnu boto neakbah.”

¹¹Tümüde ATUNGPUHNÜ Jakob mah shakjih, tüsho khah amüküp chingnü api rhokhit.

¹²Arünü arübah tüsho Zion wung kheak achangnü khün thsübah, tüsho ATUNGPUH tsükhi — hi, yukhu, tüsho müdangke, namfimihnu tüsho moshi dünkheaknü arübonü asühachihbah; arü rhangdung ju ke tsüde aduhkhi ayündo nangde akambah tüsho arübo kheaküa mulong murozhak.

¹³Judüki anünürübonü asühde atsünbah, tüsho athrününgtsüng le azobuhrünü asüharabah. Inü arü tüzhokhi asühpü kamshihbah, inü arü shukheambah tüsho mulong rozhak thsungkheak arü ki asühpü jihbah.

¹⁴Tsühyungpü akebenü inü amükeamrübo bukthsüshihbah, tüsho I mihtsürübonü I muzhomopungkhi ching reangkeambah, ATUNGPUHNÜ thachoh.

¹⁵ATUNGPUHNÜ ha thachoh: Rama ching düsheak khülang, atüzhokhi tüsho düsüknimde atripkhi sochoh. Rachelnü anihbe tsührü thsungkheak tripchoh; alibenü anihbe tsührübo thsungkheak shukheamkhi thsunglochoh, tümütüsho kheaküa arü müla.

¹⁶ATUNGPUHNÜ ha thachoh: Nü atripkhi düsheak chingnü tüsho mük ching chike bukkhi chingnü tukloang; tümüde nü rhimo dünkheak thsambah khülang lah, ATUNGPUHNÜ thachoh: arü riri lomi chingnü arü alodarübah;

¹⁷Nü arübe-kuhi thsungkheak mulonglam lah, ATUNGPUHNÜ thachoh: nü tsührübo arü lomi ching belodarübah.

¹⁸Atsütsü Ephraimnü mushukhi inü sodo: “ Nünü I danyuk, tüsho inü adanyukkhi lu; I a müthsangmuyukhi moshi nunu khülang ruk lakheah. I belodarang, I alode arüshang, tümüde nü a ATUNGPUH I Thrünpuh.

¹⁹Tümüde I rholode atso dunglim I mulong müthri; inü anikhit dunglim inü I khüh yüm. I achih ngü tüsho mi müdünkhit tümütüsho I athunuchoki achihbe inü han.”

²⁰Ephraim a inü amuzhokhi tsührü a de? Api ju inü asühkhi tsührü a de? Alochode inü api azhihde asuksuk she, judü lang inü api lümkhitchoh. Jumonü api thsungkheak I mulong niuthünaka lah; tsükjide inü api kheak mihmüthsüm labah, ATUNGPUHNÜ thachoh.

²¹Nü thsungkheak limro-mütsan khimang, nünü lim-huhdung zhipshang; nü yükhi limro küpü limtoanü mütsanang. Rholoang, O atsangkhit Israel, nü kiutobo harü ching alodarang.

²²Külokhüh nü rümde atsahba, O akin mülakhi tsührübe? Tümüde ATUNGPUHNÜ alomi kheak kukruk aso khülang thründo; aliberü khülangnü athrürü kümdopü lah.

²³Wuto ATUNGPUH , Israel Thrünpuhnü ha thachoh: Khülang ki arünü inü arü kilim kuhi jihlokhi, Juda lomi tüsho kiutobo ching harü yubo ahoribah: “ATUNGPUHNÜ nü müngühjang, O thiyuro lapung, O amüsüh wung!”

²⁴Tüsho Juda le kiutobo alala ju ching rukhüh labah, tüsho thulu thsürü le tsotsahrümtsahrü arü mihnubo bebah alabah.

²⁵Keakzungrü inü reangkeamshihbah tüsho ayiuhyiuhrü phü yinde kamshihbah.

²⁶I ha kheaknü asürükheah tüsho kheahang, ayapkhinü I sühakhimdo.

²⁷ATUNGPUHNÜ thachoh, Israel yamkhün tüsho Juda yamkhün kheak mihtsürü tüsho shiwüh müjihbo hiupü nimung tsükjide arado.

²⁸Tüsho inü arü zükshakpü tüsho thokheampü, jipa bahpü, athsümünimpü, tüsho amütsü handarüpü kheahkhi nangde inü arü thsülopü tüsho ayangpü kheahbah, ATUNGPUHNÜ thachoh.

²⁹Ju nimungbo ching arünü mütha: “Berübuhrünü kurungaso asan tsühdo, tüsho tsührübo hü mütramlah.”

³⁰Tüshe alala arü nihbuh neak dünkheak shebah; kurungaso asan tsührü aban hü mütrambah.

³¹ATUNGPUHNÜ thachoh, Israel yamkhün tüsho Juda yamkhün kheak inü tangzüng aso thsüpü nimungbo tsükjide arado.

³²Ha inü arü jipürü Ijip lomi chingnü khah kheaknü thokhitchoki tangzüng nangde yung, tümüde I arü aputungrü thsüthsü she, arünü I tangzüng thsümünim, ATUNGPUHNÜ thachoh.

³³Tüshe ju nimungbo dunglim inü Israel yamkhün ki tangzüngpü ju ha, ATUNGPUHNÜ thachoh: Inü arü kheak I yakzan yukbah, tüsho inü ju arü mulong kheak thrütbah; tüsho I arü Thrünpuh thsübah, tüsho arübo I mihtsürü thsübah.

³⁴Arünü kheaküa khülangnü khülang müthsangyuachih, yungsho müthaachih, “A TU N GPU H mükheahang,” tümüde arü aninikhühnü atobe khiungde alalanü I mükheahbah, ATUNGPUHNÜ thachoh; tümüde inü arü mülimkhi neak bahjihbah, tüsho arü neak mülümkhitlo.

³⁵ATUNGPUHNÜ ha thachoh, Shepünü animung yinshihpü ani jihcho tüsho azhing ching yinshihpü khinu tüsho chining zojihla, shepünü keto rhucho, junangde arungde abükcho — Wuto ATUNGPUH ju api mung lah:

³⁶Ha akhinashubo I mikinü chamkhisho, ATUNGPUHNÜ thachoh, Israel tsührü lünnü I miki trükshih khülang thsüpü kheambah.

³⁷ATUNGPUHNÜ ha thachoh: Akulim yinmibo akekhuksho tüsho abolim alomi khimtanbo yimkhuksho lang arünü arhimokhi alala dünkheaknü inü Israel tsührübo alala bahyukbah, ATUNGPUHNÜ thachoh.

³⁸ATUNGPUH thsungkheak Hananel Aheangsadam kheaknü Amühit Chipiripit khiungde kiuto thsülopü nimung tsükjide arado, ATUNGPUHNÜ thachoh.

³⁹Tüsho akekhi khuh ju limshude Gareb wung lim langakindo ayübah, tüsho Goa lim alodarübah.

⁴⁰Ashemi tüsho awah jindükhün alala, tüsho Kidron ayung khiungde thulubo alala, aniakhiuklim thrip Khora Chipiripit khiungde, ATUNGPUH kilim amüsüh labah. Ha küyimkishe murukkhit yungsho mükeamshih.