Read Yimchungru Naga Jer 32 Bible Online

Jer 32 - Yimchungru Naga bible

Jer 32

¹Juda kiulongthsüpuh Zedekia kam thürüpü, Babilon kiulongthsüpuh Nebukednezar kam thürükheak tizheahpü ching A TU N GPU H yu Jeremia kilim arü.

²Judüki Babilon kiulongthsüpuh bonungrünü Jirusalem yande alakheah, tüsho Juda kiulongthsüpuh yam ching aheangrü rihyam ching wukihbuh Jeremia rihdoa zo.

³Tümüde Juda kiulongthsüpuh Zedekianü api rihdoa zobah tha, “Tümü thsükhi nünü müchitcho tüsho thacho: ATUNGPUH nü ha thachoh: Inü ha kiuto Babilon kiulongthsüpuh khah ching jihbah, tüsho apinü ju lubah;

⁴Juda kiulongthsüpuh Zedekia Kaldearü khah chingnü mutsokhit, tüshe tsükjide api Babilon kiulongthsüpuh khah ching jihbah, tüsho apinü anihbuh ki mironü miro asukachihbah tüsho müknü mük kheahachihbah;

⁵tüsho apinü Zedekia Babilon lim bede ayübah, tüsho I anihbuh ki müyüyi khiungde api ju ching labah, ATUNGPUHNÜ thachoh; nünü Kaldearü bede keochihchih she mukuk?”

⁶Jeremianü tha, ATUNGPUH yu I kilim arü:

⁷Nü buhdo Shallum tsührü Hanamel nü kilim arübah athabah, “Anathoth ching lakhi I lu thuloang, tümüde thulode arhokhitpü alim nü yo ah.”

⁸Judüki ATUNGPUH yu yande I buhdo tsührü Hanamel I kilim aheangpung rihyam ching arü, tüsho I ki tha, “Benjamin lomi Anathoth ching lakhi I lu thuloang, tümüde alakukruk tüsho rhokhitpü alim nü yo ah; ju nü thsungkheak thuloang.” Judüki ha ATUNGPUH yu ah de inü mükheah.

⁹Tüsho inü I buhdo tsührü Hanamel kheaknü Anathoth ching lakhi thulu ju thulo, tüsho api kilim shotoyinchi 17 adüna jih.

¹⁰Inü münrünhüm mütsan dokihbah yihdo, thiyumütsan lu, tüsho wuhzhin kheak sho adün.

¹¹Jushu inü shothsühüm — banthsangyu zahkhi ayümhüm tüsho amüyümhüm chido lu;

¹²tüsho shothsühüm ju I kü Hanamel mikinü shothsühüm kheak dokihrü thiyumütsan thsürübo mikinü, tüsho aheangrü mahkhappung ching binrü Jihudarü mikinü, inü shothsühüm ju Maseia tsührü Neria tsührü Baruk kilim jih.

¹³Arü mikinü inü Baruk ki tha,

¹⁴Wuto ATUNGPUH , Israel Thrünpuhnü ha thachoh: harü ayümkhi tüsho amüyümkhi shothsühüm luang, tüsho ruhde atsüpshihpü thsüde jurübo alophüh ching yukang.

¹⁵Tümüde Wuto ATUNGPUH , Israel Thrünpuhnü ha thachoh: Thüyambo, thulubo tüsho kurungasolubo kheaküshe ha lomi ching thulobah.

¹⁶Inü shothsühüm Neria tsührü Baruk kilim jihshu, inü ATUNGPUH ki tamkhüntamnü:

¹⁷Ah, Atungpuh T H RÜ NPU H ! Nünü nü wu ato tüsho nü khah chungkhitkhinü thüningbo tüsho alomi thrün! Nü thsungkheak tümü she achak müla.

¹⁸Nünü chithürü lün ki muzhodakde huh, tüshe berübuhrü neakbo arü tsührübo khüh kheak zojih, O ato tüsho Wuto Thrünpuh, shepü mung Wuto ATUNGPUH la,

¹⁹lümthiyan ching ato tüsho rhimo ching wuto; tümüde arü limro alala tüsho arü rhimokhi sangaso yande thsambah jihpü mihtsürü limro alala lim nü mükbo khimshuhlah.

²⁰Nünü amütsanbo tüsho khinthiyinbebo Ijip lomi ching tüsho khihni nimung ching Israel tüsho mihtsürü alala ki huhdo, tüsho khihni nimung khiungde nü mung lashihlah.

²¹Nünü nü mihtsürü Israel Ijip lomi chingnü amütsanbo tüsho khinthiyinbebo, amüküp khah, tüsho atrebe atonü bekhit;

²²tüsho nünü arü jipürü kilim niuhke tüsho mukhuke bukkhi lomi jihpü thiyuchihchimkhi arü kilim ha alomi jih;

²³arünü yüzah tüsho alakukruk lu. Tüshe arünü nü düsheak mani yungsho nü yakzan ching mütsah; nünü arü ki thiyukhüm jihkhi alala arünü tümü mürhimo. Jumonü nünü harü thsümütsü alala arü kheak arüshih.

²⁴Kheahang, kiuto yanpü tankih-a lah, tüsho nukshang, khümzung tüsho arüm-tukthsü hode kiuto Kaldearü khah ching jihdo. Nünü tümü asukkheanü dünjido, nünü ngülah.

²⁵Tütüshe, O Atungpuh T H RÜ NPU H , nünü I ki thado, “Shonü thulu thuloang tüsho thiyumütsanbo luang” — tütüshe kiuto ju Kaldearü khah ching jih.

²⁶ATUNGPUH yu Jeremia kilim arü:

²⁷Kheahang, I ATUNGPUH , mihtsürü alala Thrünpuh; tümükhüh I thsungkheaknü khide chakla shi?

²⁸Jumonü, ATUNGPUHNÜ ha thachoh: Inü ha kiuto Kaldearü khah ching tüsho Babilon kiulongthsüpuh Nebukednezar khah ching jihbah tüsho apinü ju lubah.

²⁹Kaldearünü arübah ha kiuto kheak mo thsahkihbah, tüsho thüyambo küpü kheak I bukakhiukshihde Baal kilim kingaünkhea tüsho püpü thrünpuhbo kheak rhümthüneabe bukkihkheanü ju bede atakbah.

³⁰Tümüde Israel mihtsürü tüsho Juda mihtsürünü arü athunuchokinü I miki amütsü lang rhimodo; Israel mihtsürünü tümü mürhimo tüshe arü khah rhimobonü I bukakhiukshihdo, ATUNGPUHNÜ thachoh.

³¹Ha kiutonü athsükhi nimungnü khihni khiungde I bukakhiukshihdo tüsho mulong zhipzhipshihdo, junangde ha I mikinü lahkhita bahbah,

³²Israel mihtsürü tüsho Juda mihtsürünü amütsü rhimode I bukakhiukshihkhi alala dünkheaknü — arü, arü kiulongthsürübo, arü torübo, arü amükeamrü tüsho wukihrübo, Juda mihkhungbo tüsho Jirusalem ching larübo.

³³Arünü arü düthsün I ki anguhdo, arü mirobo yung; inü arü ki alochode thsangyuyu she, arünü mani tüsho thsülangkhi mulu.

³⁴Arünü I mung kihkhi thüyambo kheak athraneanbebo zhipshih, tüsho ju müneanjih.

³⁵Inü arü ki thiyukhüm müjihjih she, yungsho Juda neak yihbeakshihpü arünü ha athraneanbe rhimopü I lüm ching mülalashe arü tsührübo tüsho tsührübebo Molek kilim jihpü arünü Hinnom Tsührü Jindükhün ching Baal achang dangpungbo thsü.

³⁶Kheakü jumonü ATUNGPUH , Israel Thrünpuhnü nünü athakhi kiuto dünkheak ha thachoh, “Ha nukshang, khümzung tüsho arümtukthsü hode, Babilon kiulongthsüpuh khah ching jihbah”;

³⁷kheahang, I bukakhiukde amüzütshihpungnü inü arü bemukhungbah; inü arübo ha dangpung ching belodarübah tüsho inü arü sühakhim ching lashihbah.

³⁸Arübo I mihtsürü thsübah, tüsho I arü Thrünpuh thsübah.

³⁹Inü arü kilim mulong khülang tüsho limro khülang jihbah, junangde arü tsükhi tüsho arü dunglim arü tsührübo tsükhi dünkheak lünnü arünü I trebah.

⁴⁰Inü arü ki küyimkishe atsü rhimokhi mutuklopü akheam müla tangzüng khülang thsübah; tüsho arü mulong ching I trepü inü ayukjihbah, junangde arübo I kheaknü müchamachih.

⁴¹Inü arü kheak atsü rhimokhinü asühbah, tüsho thülünde, I mulong alala tüsho I me alalanü inü arü ha lomi ching lashihbah.

⁴²Tümüde ATUNGPUHNÜ ha thachoh: Inü ha mihtsürü kheak thsümütsü ato handarükhi nangde, inü kheakü arü ki alokhikhi, kuhi atsü alala arü kheak handarübah.

⁴³Ha lomi ching thulubo thulobah, küpü nüsanü thacho, “Ha abahyukkhi lah, mihtsürü yungsho shiwüh müla; ha Kaldearü khah ching jihkheah.”

⁴⁴Benjamin lomi ching, Jirusalem mühi dangpungbo ching, tüsho Juda kiutobo ching, awungbo le lokeamlo kiutobo ching tüsho düjinglim kiutobo ching shonü thulubo thulobah, tüsho shothsühümbo mütsan dokihbah tüsho thiyumütsanbo labah; tümüde inü arü kuhi jihlobah, ATUNGPUHNÜ thachoh.