Read Yimchungru Naga Jer 33 Bible Online

Jer 33 - Yimchungru Naga bible

Jer 33

¹ATUNGPUH yu Jeremia kilim, api rihyam mahkhappung ching lachoki mahne kipü arü:

²Alomi thrünrü ATUNGPUHNÜ ha thachoh, ATUNGPUH shepünü ha kamkhitpü thsü — ATUNGPUH ju api mung:

³I ki jiang tüsho inü nü ki alobah, tüsho nünü mümükheahkhi ato tüsho aramyu nü ki thabah.

⁴Tümüde ATUNGPUH , Israel Thrünpuhnü ha kiuto yambo tüsho Juda kiulongthsürü yambo ayanpü thsükhi tüsho nukshang leanglode thokheamkhi dünkheak ha thachoh:

⁵Kaldearübo keochihpü arüchoh tüsho I bukakhiukde alaksahkhi ashemibonü arü mibah, tümüde arü mihbukmuyuk hode ha kiuto chingnü I miro jikabahdo.

⁶Tütüshe inü shihphü jihlobah tüsho thsüngubah; inü arü thsüngubah tüsho lalim atsü tüsho kurampung suhdahde inü arü ki huhbah.

⁷Inü Juda kuhi tüsho Israel kuhi jihlobah, tüsho arü atankih nangde thsülojihbah.

⁸Arübonü I azhihkhi amülim neak alala ching inü arü müsühkhitbah, tüsho arü mülimkhi neak tüsho I azhihkhi alala inü arü neak bahjihbah.

⁹Tüsho inü arü thsungkheak atsü rhimokhi alala sopü larü lomi trükshihbo alala miki ha kiuto I ki asühkhi mung, mungshi tüsho müretahkhi labah; inü ha thsungkheak atsü tüsho lalim atsü alala jihkhi dünkheak arünü atrebah tüsho ajanbah.

¹⁰ATUNGPUHNÜ ha thachoh: Ha dangpung ching küpü nüsanü thacho, “Ha mihtsürü yungsho shiwüh mülade abahkhi lah,” Juda kiutobo ching tüsho azhikkhi Jirusalem kiudunglimrobo ching, mihtsürü yungsho shiwüh mülakhi ching khülang ki solobah,

¹¹asühkhi düsheak tüsho asühara düsheak, yamkhün-kambuh düsheak tüsho yamkhün-kambe düsheak, khün thsürü düsheak, arünü makshe kingaün ATUNGPUH yam ching handarübah: “ Wuto ATUNGPUH kilim makshe jihang, tümüde ATUNGPUH tsülah, tümüde api muzhodakkhi lünnü lah!” Tümüde lomi kuhibo atankih nangde ajihlobah, ATUNGPUHNÜ thachoh.

¹²Wuto ATUNGPUHNÜ ha thachoh: Mihtsürü tüsho shiwüh mülakhi ha dangpung ching, tüsho kiuto alala ching kheaküshe mihnu neakrübonü arü mihnubo yimkippung rimlopung labah.

¹³Awung lomi kiutobo ching, Shephela, Negeb, Benjamin lomi, Jirusalem mühi dangpung tüsho Juda kiutobo ching, kheaküshe mihnubo arü kherü khah khüp tsahbah, ATUNGPUHNÜ thachoh.

¹⁴ATUNGPUHNÜ thachoh, inü Israel yamkhün tüsho Juda yamkhün ki alokhikhi dünjipü nimungbo tsükjide arüchoh.

¹⁵Ju nimungbo tüsho ju kim ching inü David thsungkheak thiyuro-lungki sangkhah akhiukshihbah; tüsho apinü lomi ching thiyuro tüsho thiyuro-lungki rhimobah.

¹⁶Ju nimungbo ching Juda khümkhitbah tüsho Jirusalem sühakhim ching labah. Tüsho arünü tamde ajipü mung ha: “ATUNGPUH ju isa thiyuro-lungki.”

¹⁷Tümüde ATUNGPUHNÜ ha thachoh: David thsungkheak Israel yamkhün kiulongthsü-binkiu kheak binpü mihtsürü müladüa müla,

¹⁸tüsho I miki taka kingaünpü, hi kingaünpü, tüsho kim alala ching shuhmülanga jihpü thsüde Levirü amükeamrübo thsungkheak mihtsürü khülang müladüa müla.

¹⁹ATUNGPUH yu Jeremia kilim arü:

²⁰ATUNGPUHNÜ ha thachoh: Khürünü I nimung tüsho I tangzüng tsüngre thsümünimkhuksho, junangde nimung tüsho tsüngre akheahmünchi ching malodarüsho,

²¹jushu lang I yamlarü David kheak tangzüngkhi thsümünimkhukbah, junangde api kiulongthsü-binkiu kheak kiulongthsüpü tsührü tüsho I tankihrü Levirü ki I tangzüng mülade alabah.

²²Thüning ching chiningbo mükhekhamkhi nangde tüsho keto loyi madünkhukkhi nangde, inü I yamlarü David tsührü, tüsho I tankihrü Levirü bushihbah.

²³ATUNGPUH yu Jeremia kilim arü:

²⁴Nünü mihtsürübonü harü thakhi manikhit de, “ATUNGPUHNÜ mokhitkhi yamkhün mahne apinü bahyukdo,” tüsho trükshih khülang mükhejihde künangde arünü I mihtsürü bahyukcho?

²⁵ATUNGPUHNÜ ha thachoh: Inü nimung tüsho tsüngre tüsho yinmi le alomi yuzüngbo kheak tangzüng müthsükhülaa,

²⁶inü Jakob tsührü tüsho I yamlarü David bahyukbah tüsho api tsührü sheshe Abraham, Isak tüsho Jakob tsührü kurungkheak yakzanshuhrü mumokhit. Tümüde inü arü kuhibo jihlobah, tüsho arü kheak mihmüthsüm labah.