Read Yimchungru Naga Jer 34 Bible Online

Jer 34 - Yimchungru Naga bible

Jer 34

¹Babilon kiulongthsüpuh Nebukednezar tüsho api bonungrü alala tüsho lomi kiulongthsü alala tüsho api yukhüm bukkhüp larü mihtsürü alalanü Jirusalem tüsho kiuto alala bede keochihchoki, ATUNGPUH yu Jeremia kilim arü:

²ATUNGPUH Israel Thrünpuhnü ha thachoh: Yüang tüsho Juda kiulongthsüpuh Zedekia ki asukachihang tüsho api ki thaang: ATUNGPUHNÜ ha thachoh: Inü ha kiuto Babilon kiulongthsüpuh khah ching jihbah, tüsho apinü ha monü atakbah.

³Tüsho nü she api khah chingnü mutsokhi, tüshe tsükjide tholobah tüsho api kilim jihbah; nünü Babilon kiulongthsüpuh müknü mük ngübah tüsho api ki mironü miro asukachihbah; tüsho nü Babilon lim yübah.

⁴Tütüshe ATUNGPUH yu aniang, O Juda kiulongthsüpuh Zedekia! ATUNGPUHNÜ nü dünkheak ha thachoh: Nü a nukshangnü müshe;

⁵nü mungtsü chingnü ashebah. Tüsho nüsa jipürü, nü müngüh kiulongthsürübo thsungkheak arhümthüneabe takkhi nangde, arünü nü thsungkheak rhümthüneabe takbah tüsho nü thsungkheak tüzhode athabah “Aha, ATUNGPUH !” Tümüde inü thiyu asukdo, ATUNGPUHNÜ thachoh.

⁶Judüki wukihbuh Jeremianü harü yubo alala Jirusalem ching Juda kiulongthsüpuh Zedekia ki asuk,

⁷Babilon kiulongthsüpuh bonungrünü Jirusalem tüsho aningkhi Juda kiuto alala, Lakish tüsho Azeka azhihde keochihkhi lakheah; tümüde harü lang Juda kiutobo chipi ayünkhi aninga lakheah.

⁸Kiulongthsüpuh Zedekianü Jirusalem ching mihtsürü alala zuzu zhiyukpü mihtsürü alala ki tangzüng khülang thsüshu, ATUNGPUH yu Jeremia kilim arü,

⁹junangde alalanü arü Ibri athrürü tüsho aliberü azhorübo zuzu kamshihpü, junangde shenü she nihbuh keoniorü Jihudarü azhorü nangde mülashih.

¹⁰Tüsho atorü tangzüng ching yüzahrü alalanü arü azhorübo athrürü tüsho aliberü zuzu kamshihpü mihyu ani, junangde arübo azhorü mükamloshih; arünü ani tüsho zuzu kamshih.

¹¹Tüshe ju dunglim arünü lümkhi müthri tüsho athrürü le aliberü beloa azhorü kamshih.

¹²ATUNGPUH yu Jeremia kilim arü:

¹³ATUNGPUH , Israel Thrünpuhnü ha thachoh: Inü nüsa jipürü azhorü yamkhün chingnü bekhitchoki inü arü ki tangzüng khülang thsüde tha,

¹⁴“ Ibrirü nüsa ki yinbah kam thuruk nüsa tankihkhi nüsa mihbüm abannü kam thünepü ching zuzu kamshihbeah.” Tüshe nüsa jipürübonü I ki mani yungsho arü nükhün I ki manguh.

¹⁵Nüsabo khihnishido mulong müthrilo tüsho khülangnü khülang ki zuzu zhiyukde I miki alungki rhimodo, tüsho I mung tamde ajikhi yam ching nüsanü I miki tangzüng khülang thsü;

¹⁶tüshe kheakü nüsa mulong müthri tüsho I mung müneanjih; nüsa mihbüm abannü athrürü tüsho aliberü azhorübo zuzu thsüde dükhekhi chingnü beloa lu. Nüsanü arübo thsungkih-a nüsa azhorü kamshih.

¹⁷Jumonü ATUNGPUHNÜ ha thachoh: Nüsanü nüsa yamhingrü tüsho müyamrübo müdükhekhi hode I yu manide kamdo; inü nüsa kilim dükhepü lah, ATUNGPUHNÜ thachoh — nukshang, arüm-tukthsü tüsho khümzung dükhebah. Inü nüsa lomi kiulongthsü alala ki atrebe kamshihbah.

¹⁸Tüsho sherünü I tangzüng thsümünimde tüsho I miki tangzüngkhibo muzonü, arünü moshi nunu mahne thsüde khapshakbah adükeak ching tsahhokhi nangde inü arü ki rhimobah:

¹⁹Juda torübo, Jirusalem torübo, dukhabo, amükeamrübo, tüsho lomi mihtsürü alala sherünü moshi nunu khapshakkhi dükeak tsahdünü,

²⁰arü riri tüsho arü rhangdung yimrübo kilim jihbah. Arü ashemibo ju thüning wuhnubo tüsho alomi mütüm shiwüh jim kambah.

²¹Tüsho Juda kiulongthsüpuh Zedekia tüsho api yo atorübo a arü riri tüsho arü rhangdung yimrübo, nüsa kheaknü atsolokhi, Babilon kiulongthsüpuh bonungrü kilim inü ajihbah.

²²Inü thiyukhüm jihbah, ATUNGPUHNÜ thachoh, tüsho arübo ha kiuto ching belodarübah; tüsho ha bede keochihde ayankhitbah, tüsho monü atakbah. Juda kiuto mihtsürübo mülade zhikabahbah.