Read Yimchungru Naga Jer 38 Bible Online

Jer 38 - Yimchungru Naga bible

Jer 38

¹Kheakü Mattan tsührü Shephatia, Pashhur tsührü Gedalia, Shelemia tsührü Jukal tüsho Malkia tsührü Pashhurnü Jeremianü mihtsürübo alala ki thakhi yubo so,

²ATUNGPUHNÜ ha thachoh, Sherü ha kiuto ching labanü nukshang, khümzung tüsho arüm-tukthsünü ashebah; tüshe sherü Kaldearü kilim wukhiukbanü alabah; arü rhangdungbo thirithsü thsambah nangde rhangdung labah.

³ATUNGPUHNÜ ha thachoh, Tsükjide ha kiuto Babilon kiulongthsüpuh bonungrü khah ching jihbah tüsho alubah.

⁴Judüki atorübonü kiulongthsüpuh ki tha, “Ha mihtsürü asheshihpü lah, tümütüsho apinü ha kiuto ching aninga larü bonungrü tüsho mihtsürü alala arü ki hadürü yu thakhinü mulong ninishihchoh. Tümüde ha mihtsürünü mihtsürübo arung thsungkheak yungde arü thsümünimpü yimchoh.”

⁵Kiulongthsüpuh Zedekianü tha, “ Kheahang api nü khah ching lah; tümüde kiulongthsüpuhnü nüsa müzhipdokhuk.”

⁶Jumonü arünü Jeremia bea lu tüsho kiulongthsüpuh tsührü Malkia kekung, aheangrü mahkhappung lakhi ching Jeremia ju shungliunü chingbah yüzahshih. Kheakü kekung ching ke mülade akhimniuhniuh lang alakheah, tüsho akhimniuhniuh ching Jeremia yüzah.

⁷Ethiopiarü Ebedmelek, kiulongthsüpuh yam ching lakhi dukhanü Jeremia kekung ching yuka zokhi so. Kiulongthsüpuh ju Benjamin Chipiripit kheak binde alakheah,

⁸jumonü Ebedmeleknü kiulongthsüpuh yam chingnü yübah kiulongthsüpuh ki tha,

⁹I tungpuh kiulongthsüpuh, harü mihtsürünü akhümnü asheshihpü thsüde kekung ching bahkhi, wukihbuh Jeremia kheak mütsüde rhimodo, tümüde kiuto ching yikhap aninga müla.

¹⁰Judüki kiulongthsüpuhnü Ethiopiarü Ebedmelek ki thiyukhüm jih, “Ha chingnü mihtsürü mahsam nü lung beang, tüsho kekung chingnü api müsheyide thokhitang.”

¹¹Jumonü Ebedmeleknü api lung mihtsürübo bea lu tüsho kiulongthsüpuh yam kukruk zopung ching yü, tüsho ju chingnü khimmürhütbo lubah shungliu kheaknü Jeremia kilim kekung ching yüzahshih.

¹²Ethiopiarü Ebedmeleknü Jeremia ki tha, “ Nü muyurishihpü khimmürhütbo nü khülük le shungliu dükeak yukang.” Jeremianü jude thsü.

¹³Jushu arünü Jeremia shungliunü kekung chingnü thokhit. Tüsho Jeremia ju aheangrü mahkhappung ching lakheah.

¹⁴Kiulongthsüpuh Zedekianü wukihbuh Jeremia thsungkheak yüshih tüsho api ATUNGPUH arüngyam yüzahpung mahsampü kheak bedarü. Kiulongthsüpuhnü Jeremia ki tha, “ Inü tümükhüh nü ki keopü lah; tümü she I kinü düram.”

¹⁵Jeremianü Zedekia ki tha, “ Inü nü ki thachoh, tsükjide nünü I müsheshihba de? Tüsho inü nü ki athsunganah jihjih she, nünü I ki anipü yung.”

¹⁶Jumonü kiulongthsüpuh Zedekianü ramde Jeremia ki thiyuchihchim thsü, “ATUNGPUH lale, Shepünü isa rhangdung jihkhea, inü nü müsheshih yungsho nü yimrü mihtsürübo khah ching müjih.”

¹⁷Judüki Jeremianü Zedekia ki tha, “ATUNGPUH , Wuto Thrünpuh, Israel Thrünpuhnü ha thachoh, Nünü lang Babilon kiulongthsüpuh atorü ki shuhmülanga jihsho, nü rhangdung labah, tüsho ha kiuto monü mütak, tüsho nü le nü yamkhün rhangdung labah.

¹⁸Tüshe nünü Babilon kiulongthsüpuh torü ki shuhmülanga müjihsho, ha kiuto Kaldearü kilim jihbah, tüsho arünü monü atakbah, tüsho nü she arü khah chingnü mutsokhi.”

¹⁹Kiulongthsüpuh Zedekianü Jeremia ki tha, “ Inü Kaldearü kilim tsode ayükhi Jihudarü trelah, tümüde I arü kilim jihpü labah tüsho arünü I thsümüchibah.”

²⁰Jeremianü alo, “ Nü arü kilim müjih. Inü tümü nü ki thachonü ATUNGPUH düsheak lang aniang, tüsho nü tsüde alabah tüsho nü rhangdung aninga labah.

²¹Tüshe nünü shuhmülanga müjihpü lümkihlasho, ATUNGPUHNÜ I ki huhkhi ha lah —

²²Juda kiulongthsüpuh yam ching aninga larü azoberü alala Babilon kiulongthsüpuh torü kilim bede wukhiukbah arünü nü ki thabah, ‘ Nü müyamrübonü nü bephülapdo tüsho nü zhidoabahdo; kheakü nü jing akhimniuhniuh ching jungrama lah, arünü nü bahkhido.’

²³Nü niubebo alala tüsho nü tsührübo Kaldearü kilim bede wukhiukbah, tüsho nü she arü khah chingnü mutsokhi, tüshe Babilon kiulongthsüpuhnü arambah; tüsho ha kiuto monü atakbah.”

²⁴Judüki Zedekianü Jeremia ki tha, “Ha asukachihkhi shenü dümükheahshih, jude yungsho nü ashebah.

²⁵Inü nü ki asukkhi atorübonü sosho, arünü nü ki arübah athabah, ‘ Nünü kiulongthsüpuh ki tümü thakheanü kheakü isa ki thaang; isa ki düram, jude yungsho isanü nü sheshihbah. Kiulongthsüpuhnü nü ki tümü thakhea?’

²⁶Jüdüki nünü arü ki thabah, ‘ I ashepü thsüde Jonathan yam lim müyüloshihpü kiulongthsüpuh ki mushude alakheah.’”

²⁷Atorü alala Jeremia kilim arü tüsho api ki keokhi; tüsho kiulongthsüpuhnü thiyukhüm jihkhi yubo lang apinü arü ki alo. Jumonü arünü api ki keokhipü tuklo, tümüde asukachihkhi musode alakheah.

²⁸Tüsho Jeremia ju Jirusalem yankhi nimung khiungde aheangrü mahkhappung ching lakheah.