Read Yimchungru Naga Jer 39 Bible Online

Jer 39 - Yimchungru Naga bible

Jer 39

¹Juda kiulongthsüpuh Zedekia kam tuku, khinu thürüpü ching, Babilon kiulongthsüpuh Nebukednezar tüsho api bonungrü alala Jirusalem azhihde arü tüsho yanabah;

²Zedekia kiulongthsü kam thürükheak khülang, khinu phüyi, nimung tuku nipü, kiuto chipi rhümashunga lakheah.

³Küyimki yanabahkhea, Babilon kiulongthsüpuh atorübo alala arü tüsho aphulungbe chipiripit ching bin: atobuh Nergalsharezer, atobuh Nebo- Sarsekim, püpürü torü Nergal-sharezer, ju lung Babilon kiulongthsüpuh torübo alala.

⁴Küyimki Juda kiulongthsüpuh tüsho bonungrü alalanü arü ngükhea, arünü azhing ching kiuto chingnü wukhiukbah kiulongthsüpuh shahwün limronü chipi mahne dükeak ripit chingnü shanyukbah tso; tüsho arübonü Araba limpeang yü.

⁵Tüshe Kaldearü bonungrübonü arü yande müsham, tüsho Jirikho dükhün ching Zedekia yanphuh; tüsho küyimki arünü api ramlokhea, arünü api Hamath lomi, Ribla ching Babilon kiulongthsüpuh Nebukednezar ki bedarü; tüsho apinü anihbuh sheshihpü thiyu jih.

⁶Babilon kiulongthsüpuhnü Ribla ching Zedekia tsührübo amük kinü laksah; Babilon kiulongthsüpuhnü Juda torübo she laksah.

⁷Apinü Zedekia mükji yihkhit, tüsho Babilon lim lude ayüpü yinchiliunü rhük.

⁸Kaldearünü kiulongthsüpuh yam tüsho mihtsürübo yam tak tüsho Jirusalem chipi yihmülünjih.

⁹Judüki aheangrü wühkenobuh Nebuzaradan nü kiuto ching aninga lakhi mihtsürü alala, api kilim shande arürübo Babilon ching rama lubah tso.

¹⁰Aheangrü wühkenobuh Nebuzaradannü tümü mülarü zhochihrü mihtsürü khürü Juda lomi ching lashih, tüsho judüchoki arü kilim kurungasolu le thulubo jih.

¹¹Babilon kiulongthsüpuh Nebukednezarnü aheangrü wühkenobuh Nebuzaradan hode Jeremia dünkheak thiyukhüm jihde tha,

¹²“Api bea lubah tsüde kheahang tüsho api ki amütsü düthsü, tüshe apinü akeokhikhi nangde api thsungkheak rhimoang.”

¹³Jumonü aheangrü wühkenobuh Nebuzaradan, atobuh Nebushazban, atobuh Nergal-sharezer tüsho Babilon kiulongthsüpuh torü alalanü

¹⁴aheangrü mahkhappung chingnü Jeremia bekhita lu. Arünü api ju anihbuh yam lim bede ayüshihpü thsüde Shaphan tsührü Ahikam tsührü Gedalia kilim jih. Junangde api nihbuh mihtsürü bolung lakheah.

¹⁵Jeremia aheangrü mahkhappung ching lachoki ATUNGPUH yu arü:

¹⁶Ethiopiarü Ebedmelek kilim yüang tüsho thaang: Wuto ATUNGPUH , Israel Thrünpuhnü ha thachoh: Inü ha kiuto azhihde amütsü thakhi dünjipü lah tüsho atsü thsungkheak yung, tüsho ju nimung nü lade adünjibah.

¹⁷Tüshe ju nimung inü nü khümkhitbah, ATUNGPUHNÜ thachoh, tüsho nünü trede alarü khah ching nü müjih.

¹⁸Tümüde tsükjide inü nü khümkhitbah, tüsho nukshang hode nü mükeam; tüshe thirithsü thsambah nangde nü rhangdung labah, tümütüsho nünü I kheak kindo, ATUNGPUHNÜ thachoh.