Read Yimchungru Naga Jer 4 Bible Online

Jer 4 - Yimchungru Naga bible

Jer 4

¹Nüsanü rholosho, O Israel ATUNGPUHNÜ thachoh, nüsanü I kilim rholosho, nüsanü athraneanbe I mikinü yihkhita bahsho, tüsho tsahphülapde müyüsho,

²tüsho nüsanü, “ATUNGPUH lale!” de thiyuro ching, jakmükheahkhi ching, alungki chingnü thiyuchihchimsho, apinü trükshihbo müngühjihbah, tüsho api lung arü müretahbah.

³Tümüde ATUNGPUHNÜ Juda mihtsürü tüsho Jirusalem ching larü ki ha thachoh: Müphünkhi nüsa lo kiuang, tüsho ayangrung ching dühiu.

⁴ATUNGPUH kilim nüsa küdah thsüde tsütabahang, nüsa mulong küp muhiukhita bahang, O Juda mihtsürü tüsho Jirusalem ching larübo, yungsho I bukakhiukkhi mo nangde ayübah, tüsho shenü she nüsanü amütsü rhimokhi dünkheaknü müzünmütkhukde atakbah.

⁵Juda ching thakhiang, tüsho Jirusalem ching zhiyukang tüsho thaang. Lomi alala ching hulipungpung mütang; achangnü ahoang tüsho thaang, “ Rukhüh mukhungang, tüsho isanü chipi ayünkhi kiutobo ching yüzahanü!”

⁶Zion limpeang riphin shuhkihang, tsoyukpung yimang, dashu, tümüde inü dukulimnü amütsü tüsho athsümünim ato handarado.

⁷Kekhüzü khülang ajikpung achak chingnü wukhiukdo, trükshih thsümünimrü tsahmusudo; api nihbuh lapung chingnü nü lo thsümünimpü wukhiukdo; nüsa kiutobo sheshe mülade athsümünimbah.

⁸Ha dünkheaknü shungliukhim phuyuang, tüzhoang tüsho tripang: “ATUNGPUH bukakhiukkhi isa kheaknü rholode mutso.”

⁹ATUNGPUHNÜ thachoh, ju nimung kiulongthsürü tüsho atorübo mulong ninide akambah; amükeamrübo müyinnimbah tüsho wukihrübo müyinsahbah.

¹⁰Judüki inü tha, “Ah, Atungpuh T H RÜ NPU H , küde nünü shahde ha mihtsürü tüsho Jirusalem mulomülapde athakhea, ‘ Nukshang nü hung kheak lalashe nü mungtsü labah!’ ”

¹¹Ju kim ching ha mihtsürü tüsho Jirusalem ki thabah: Loshelo ching awung mujukbo chingnü apung atak I mihtsürü kilim arüchoh, ayünpü yungsho amüsühpü lang yung —

¹²khide amüküp pung I kilimnü arükhi khülang lah. Kheakü arü azhihde inü mahkhapbah.

¹³Kheahang! Api amobo nangde akihchoh, api khora-lolungbe chitmühean nangde; api khorabo müleang kheaknü athribe — isa are, tümüde isa thsümünima lah!

¹⁴O Jirusalem, mihbukmuyuk chingnü mulong müsühang, junangde nü khümkhitbah. Nü lümkhi amütsü külokhüh nü kheak laba?

¹⁵Tümüde Dan chingnü düsheak khülang thachoh tüsho Ephraim wung chingnü thsümütsü zhiyukchoh.

¹⁶Trükshihbo ki thaang, “Ha ching arü lah!” Jirusalem azhihde zhiyukang, “ Limshu lomi chingnü thiriri arüchoh; arünü Juda kiutobo azhihde ahochoh.

¹⁷Arübo thulu aheangrü nangde zündolah, tümütüsho anihbenü I azhihdo, ATUNGPUHNÜ thachoh.

¹⁸“ Nü limrobo tüsho nü rhimobonü ha nü kheak handarüdo. Ha nü neak hode thsümütsü lah; ha küdükhüh akhüh! Hanü nü mulong khiungdo.”

¹⁹I thsünükhi, I thsünükhi! I thsünü ching kolahchoh! O, I mulong thsünükhi! I mulong thüpthüpchoh; inü zhikde mülakhuk; tümüde inü hulipungpung düsheak thirithsüpü arhunganimkhi sochoh.

²⁰Thsümütsünü thsümütsü yankihchoh, lomi abümnü thsümünima yaplah. Zukleangnü I khimyambo, khülang kinü zhindokhimbo thsümünima lah.

²¹Külokhüh inü keochihkhi ngüba tüsho hulipungpung düsheak soba?

²²“Tümüde I mihtsürübo makhaa lah, arünü I mümükheah; arü azhazha tsührübo ah, arü anikhitkhi müla. Amütsü rhimopü ching arü yuklah, tüshe atsü rhimopü mümükheah.”

²³Inü alomi kheak kheah, tüsho kheahang, ha thsümünima tüsho akeangkeang lah; tüsho yinmi lim kheah, tüsho ayin müla.

²⁴Inü awungbo kheak kheah tüsho kheahang, arübo ajande alakheah, tüsho wungduduhbo alala yüla-arüla de niuk.

²⁵Inü kheah, tüsho kheahang, ju ching shahjungde she mülakheah, tüsho thüning wuhnubo alala phinde tso.

²⁶Inü kheah, tüsho kheahang, ATUNGPUH bukakhiukkhinü amüdang lo ju loshelo kamabah tüsho kiuto alala thsümünimabah.

²⁷Tümüde ATUNGPUHNÜ ha thachoh: Lomi abümnü zhikrangkhündo alabah; tütüshe inü akheam tsütsü mükamshih.

²⁸Ha dünkheaknü alominü mitripbah tüsho dukulim thüningbo mitingdo akambah; tümüde inü asukdo, inü lümkhi thsüdo; inü mulong mümüthri yungsho inü murholo.

²⁹Khoraberü tüsho sanglüh-kiprü düsheaknü kiuto alala tsochoh; arü rimchak ching yüzahchoh; arübo lunghü kheak künchoh; kiuto alala bahyukdo tüsho jurü ching she müla.

³⁰Tüsho nü, O zhikrangkhündo alakhi, nü neakrümde ayihkhi amütsan tümü a, ju ruk nünü suna lakbonü züt thsücho, nü mükbo mujua toshihcho? Akeangkeang ching nü züt thsüchoh, nü muzhorübonü nü mükhemürangchoh; arünü nü rhangdung yimchoh.

³¹Tümüde azoberü thsünüchoki nangde azhikhi khülang inü sodo, anihbe tsührü atuzuk zübechoki nangde, Zion azhikhinü sheak dükipchoh, anihbe khah chungkihchoh, “ I ayokhe! I mihkhukrü miki sheshihchoh!”