Read Yimchungru Naga Jer 41 Bible Online

Jer 41 - Yimchungru Naga bible

Jer 41

¹Khinu thünepü ching Elishama tsührü Nethania tsührü Ishmael, kiulongthsü yamkhün chingnü, kiulongthsüpuh atorü bolung khülang, apinü mihtsürü 10 bebah Mizpa ching Ahikam tsührü Gedalia kilim arü. Arübo Mizpa ching rukhühnü yikhap tsühde alachoki,

²Nethania tsührü Ishmael tüsho api lung mihtsürü 10 wusu tüsho Shaphan tsührü Ahikam tsührü Gedalia nukshangnü laksah, tümütüsho Babilon kiulongthsüpuhnü api lomi ching kovünor mokhita lakheah.

³Ishmaelnü Mizpa ching Gedalia lung lakhi Jihudarü alala tüsho ju ching larü Kaldea bonungrübo she laksah.

⁴Gedalia laksahkhi nimung ashidopü, shenü mümükheahyide,

⁵Shekem le Shilo tüsho Samaria chingnü mihtsürü 80 arü mükhühnam hüt tüsho khimmihbo rukrüp, tüsho arü pangbo tsüthünakbah, hi kingaün tüsho rhümthüneabe ATUNGPUH arüngyam ching jihpü lubah arü.

⁶Tüsho Nethania tsührü Ishmaelnü Mizpa chingnü arü shorupü tripde wukhiuk. Apinü arü shorubah arü ki tha, “Ahikam tsührü Gedalia kilim arang.”

⁷Küyimki arübo kiuto phulung khiungkhea, Nethania tsührü Ishmael tüsho api mihtsürübonü arü laksah, tüsho arübo kekung ching bah.

⁸Tüshe arü bolung ching mihtsürü 10nü Ishmael ki tha, “ Isa dülaksah, tümüde isa lubo ching wheat hi, barli hi, müdangke, tüsho mukhuke rama zokhi lah.” Jumonü apinü arü bemuwuh tüsho arü borü lungnü mülaksah.

⁹Kheakü Ishmaelnü mihtsürü laksahkhi pangbo alala yukkhi kekung ju kiulongthsüpuh Asanü Israel kiulongthsüpuh Baasha azhihkhi tsunglode athsükhi atobe lakheah; Nethania tsührü Ishmael nü kekung ju apinü alaksahkhinü mishih.

¹⁰Judüki Ishmaelnü Mizpa ching aninga lakhi mihtsürü alala, kiulongthsüpuh tsührübe tüsho aheangrü wühkenobuh Nebuzaradannü Ahikam tsührü Gedalia kilim jihkhi mihtsürü alala rama lubah yü. Nethania tsührü Ishmaelnü arübo rama lu tüsho Amonrü hode ayüpü tsahmusu.

¹¹Tüshe küyimki Karea tsührü Johanan tüsho thirithsürü limberü alalanü Nethania tsührü Ishmaelnü yakzan thsümünimkhi alala sokhea,

¹²arünü arü mihtsürü alala bea lu tüsho Nethania tsührü Ishmael bede keochihpü yü. Arübo api kilim Gibeon ching kekhip ato ki arü.

¹³Tüsho küyimki Ishmael lung larü mihtsürü alalanü Karea tsührü Johanan tüsho api lung thirithsürü limberübo alala ngükhea arünü asüh.

¹⁴Jumonü Ishmaelnü Mizpa chingnü ramde atsokhi mihtsürü alala rholode arü, tüsho Karea tsührü Johanan kilim yü.

¹⁵Tüshe Nethania tsührü Ishmael a Johanan lung mihtsürü 8 bebah tsokhit, tüsho Amonrü kilim yü.

¹⁶Judüki Karea tsührü Johanan tüsho api lung thirithsürü limberübo alalanü Nethania tsührü Ishmaelnü Ahikam tsührü Gedalia laksah dunglim Mizpa chingnü rama lubah atsokhi mihtsürü aningkhibo alala bea lu — bonungrübo, azoberü, azürübo, dukhabo, Johanannü Gibeon ching belode arü.

¹⁷Arünü tsahmusu, tüsho Ijip lim yüpü lümbah Bethlehem phünide Geruth Kimham ching tuklo,

¹⁸ju Kaldearü dünkheaknü ah; tümüde arübonü arü trede alakheah, tümütüsho Babilon kiulongthsüpuhnü lomi kurungkheak kovünor mokhitkhi Ahikam tsührü Gedalia ju Nethania tsührü Ishmaelnü laksah.