Read Yimchungru Naga Jer 42 Bible Online

Jer 42 - Yimchungru Naga bible

Jer 42

¹Judüki thirithsürü limberü alala, Karea tsührü Johanan tüsho Hoshaia tsührü Azaria tüsho mihtsürü anikhühnü ato khiungde arübah

²wukihbuh Jeremia ki tha, “ Isanü mushukhi tsüde anijang, tüsho isa thsungkheak ATUNGPUH nü Thrünpuh ki tamkhüntamnüjang — harü aningkhi alala thsungkheak. Tümüde nü müknü ngülah, ahihdo chingnü isa anükhüh lang aningdo.

³Isa küching yüba tüsho isa tümü rhimobeanü ATUNGPUH nü Thrünpuhnü isa ki huhshang.”

⁴Wukihbuh Jeremianü arü ki tha, “ Khide tsülah: Nüsanü mushukhi nangde ATUNGPUH nüsa Thrünpuh ki inü tamkhüntamnübah, tüsho ATUNGPUHNÜ tümüpürü nüsa ki alobanü inü nüsa ki thabah; inü tümü she nüsa kheaknü müram.”

⁵Arünü alode Jeremia ki tha, “ATUNGPUH nü Thrünpuhnü isa thsungkheak nü hode thiyukhüm jihkhi yande lüpdükhi isanü mürhimosho ATUNGPUH thiyuro lashang tüsho isa azhihde athülünkhi thiyumütsan thsüshang.

⁶Atsü yungsho amütsü thsüthsü, isanü shepü kilim nü yüshihchonü ATUNGPUH yu isanü anibah, ju yande isanü ATUNGPUH isa Thrünpuh yu anichoki isa tsüde ayübah.”

⁷Nimung thürü dunglim A TU N GPU H yu Jeremia kilim arü.

⁸Judüki apinü Karea tsührü Johanan tüsho api lung lakhi thirithsürü limberübo alala, tüsho mihtsürü alala anikhühnü ato khiungde jimukhung,

⁹tüsho arü ki tha, Nüsanü mushukhi jihshihpü nüsanü shepü kilim I yüshihkhea, ATUNGPUH Israel Thrünpuhnü ha thachoh:

¹⁰Nüsanü lang ha lomi ching lasho, inü nüsa bemusubah tüsho nüsa muthokheam; inü nüsa khimbah, tüsho nüsa murukkhit; tümüde inü nüsa kheak thsümütsü handarükhi dünkheak I mulong ashilah.

¹¹Babilon kiulongthsüpuh ki kheaküa dütre; api dütre, ATUNGPUHNÜ thachoh, tümüde api khah chingnü nüsa khümkhitpü tüsho bekhitpü I nüsa lung lah.

¹²Inü nüsa ki mihmüthsüm mülüjihbah, tüsho apinü nüsa kheak mihmüthsüm labah tüsho nüsa asürüpung lomi ching nüsa yülobah.

¹³Tüshe nüsanü mutuklode, “ Isa ha lomi ching müla,” de thasho, hanü ATUNGPUH nüsa Thrünpuh yu manide

¹⁴thachoh, “Muh, isa Ijip lomi ching yübah, küching isanü thirithsü müngüpü la, yungsho hulipungpung düsheak muso yungsho yikhap mülakhinü khümsahde müla, tüsho ju ching isa labah,”

¹⁵dale ATUNGPUH yu aniang, O aningkhi, Juda. Wuto ATUNGPUH , Israel Thrünpuhnü ha thachoh: Nüsanü Ijip ching yüzahpü tüsho ju ching lapü lümkihlasho,

¹⁶dale nüsanü atrekhi nukshangnü Ijip lomi ching nüsa yanphuhbah; tüsho nüsanü atrekhi khümzungnü Ijip ching nüsa dunglim yankihbah; tüsho ju ching nüsa shebah.

¹⁷Ijip ching yüpü lümkihrü mihtsürü alala nukshang, khümzung tüsho arüm-tukthsünü ashebah; inü arü kheak handarükhi thsümütsü chingnü arü aningkhi yungsho rhangdung larü mülade alabah.

¹⁸Tümüde Wuto ATUNGPUH , Israel Thrünpuhnü ha thachoh: I bukakhiukkhi tüsho I mulong zhipzhipkhi Jirusalem ching larü kheak dungkihkhi nangde, nüsa Ijip ching yüchoki nüsa kheak I bukakhiukkhi dungkihbah. Nüsa muthrumünean tüsho atrebe, abahyukpü tüsho münedung kambah; nüsanü ha dangpung küyimkishe müngülo.

¹⁹ATUNGPUHNÜ nüsa ki thado, O aningkhi Juda, Ijip lim düyü. Inü khihni nüsa ki thakhi tsüde lümrhangang,

²⁰junangde nüsa ashepü lakmihpü lah. Tümüde nüsa zangrünü ATUNGPUH nüsa Thrünpuh kilim I thaa yüshih, “ Isa thsungkheak ATUNGPUH isa Thrünpuh ki tamkhüntamnüjang, tüsho ATUNGPUH isa Thrünpuhnü tümüpürü thabanü isa ki thaang tüsho isanü ju rhimobah.”

²¹Jumonü inü nüsa ki khihni thado, tüshe nüsa ki thashihpü apinü I thiyikhi tümü ching she nüsanü ATUNGPUH nüsa Thrünpuh yu mani.

²²Tsüde mükheahang, junangde nüsanü küching yünela tüsho alapü künlanü ju dangpung ching nukshang, khümzung, tüsho arüm-tukthsünü nüsa shebah.