Read Yimchungru Naga Jer 43 Bible Online

Jer 43 - Yimchungru Naga bible

Jer 43

¹Küyimki Jeremianü ATUNGPUH arü Thrünpuhnü arü kilim thiyia yüshihkhi ATUNGPUH arü Thrünpuh yubo alala mihtsürübo ki thakhamkhea,

²Hoshaia tsührü Azaria le Karea tsührü Johanan tüsho püpürü bukmüke mihtsürübo alalanü Jeremia ki tha, “ Nünü akeangyu thachoh. ATUNGPUH isa Thrünpuhnü hade athashihpü nü müthiyi, ‘ Ijip ching lapü düyü’;

³tüshe Neria tsührü Baruknü isabo Kaldearü khah ching jihshihpü isa azhihde nü thurumusuchoh, junangde arünü isa laksahbah yungsho Babilon ching rama lubah ayübah.”

⁴Jumonü Karea tsührü Johanan tüsho thirithsü limberübo alala tüsho mihtsürü alalanü Juda lomi ching lapü ATUNGPUH yu mani.

⁵Tüshe Karea tsührü Johanan tüsho thirithsürü limberü alalanü arü müzütpung trükshihbo alala chingnü Juda lomi ching lapü arülokhi aningkhi Juda alala bea lu —

⁶athrürübo, aliberübo, azürübo, kiulongthsürü tsührübo, tüsho aheangrü wühkenobuh Nebuzaradannü Shaphan tsührü Ahikam tsührü Gedalia lung lashihrü alala; kheaküshe wukihbuh Jeremia tüsho Neria tsührü Baruk.

⁷Tüsho arübo Ijip lomi ching yüzah, tümüde arünü ATUNGPUH yu mani. Tüsho arübo Tapanhes ching arü.

⁸Judüki Tapanhes ching A TU N GPU H yu Jeremia kilim arü:

⁹Nü khah ching lung khürü luang, tüsho Tapanhes ching Pharao yam ching yüzah limro kheak alo-jingtsahpung ching kiua ramang. Nünü ju rhimokhi Judarünü ngüshang,

¹⁰tüsho arü ki thaang, Wuto ATUNGPUH , Israel Thrünpuhnü ha thachoh: Inü Babilon kiulongthsüpuh I yamlarü Nebukednezar bedarübah, tüsho inü ayangkhi lungbo kheak api kiulongthsü zobah, tüsho apinü jurü kheak kiulongthsü-khim phukihbah.

¹¹Apinü arübah Ijip lomi kukbah, ashepü akhua larü kilim ashepü, arampü akhua larü kilim arampü tüsho nukshang akhua larü kilim nukshang handarübah.

¹²Apinü Ijip thrünpuhbo arüngyambo ching mo thsahkihbah; tüsho apinü jurü takbah tüsho rama lubah atsobah; tüsho namfimihnu neakrünü düthre dütrünkhia bahde nihbuh khimmih zünga lukhi nangde, apinü Ijip lomi zünga lubah; tüsho ju chingnü api tümü müthsüde awukhiukbah.

¹³Apinü Ijip lomi Heliopoli ching lakhi amüsüh dungjingbo thsümünimbah; tüsho Ijip thrünpuhbo arüngyambo monü atakbah.