Read Yimchungru Naga Jer 46 Bible Online

Jer 46 - Yimchungru Naga bible

Jer 46

¹Trükshihbo dünkheaknü ATUNGPUH yu wukihbuh Jeremia kilim arü.

²Ijip kiulongthsüpuh Pharao Neko bonungrü azhihde, Ijip dünkheak, küpü Euphra ayung ki Karkemish ching lakhea tüsho küpü Josia tsührü Juda kiulongthsüpuh Jehoiakim kam phüyipü ching Babilon kiulongthsüpuh Nebukednezarnü akukkhea:

³Nüsa tsungbo thsakhamang tüsho keochihpü mikhuh yüang!

⁴Khorabo rhükang; jurü kheak yükihang! Treangkhümbe yihbah nüsa zhippung mükühang, nüsa thsühbo phekhitang, nüsa thirithsü zülu yihang!

⁵Tüshe tümüde arü trekhi inü ngücho? Arübo rholode arüdo; arü thirithsürübo kukabahdo tüsho niokheamde tsodo. Arünü rholoa mükheah — alala mühide atrebe lah! ATUNGPUHNÜ thachoh.

⁶Athrirübo alihde mutsokhuk yungsho thirithsürünü mutsokhikhuk; dukulim Euphra ayung ki arü jing mükhedo tüsho lungdo.

⁷Nile keto ki nangde ayungbo düchi arükhi ha she a?

⁸Nile nangde Ijip asürüchoh, ayungbo ke nangde abükchoh. Ha tha, I asürüanü, inü alomi zhipdoanü, inü kiutobo tüsho ju ching larübo thsümünimanü.

⁹Mikhuh yüang, O khorabo, tüsho yingyingde alihang, O khora-lolungbebo! Thirithsürübo mikhuh yüshang: Tsung shuhrü Ethiopia tüsho Put, sanglüh hünkihrü Ludim,

¹⁰ju nimung ju Wuto Atungpuh T H RÜ NPU H royimkhi nimung, api riribo kheak royimkhi nimung. Reangmükeamyi khiungde nukshangnü amuyubah, kethürimüri khiungde thiyih yungbah. Tümüde Wuto Atungpuh THRÜNPUHNÜ dukulim lomi ching Euphra ayung ki shuhmülanga jihpü shuhlah.

¹¹Gilead lim wutuang, tüsho moli luang, O Ijip atsangkhit tsührübe! Akeangkeang ching nünü moli ahihdo ahorido; nü thsungkheaknü athsüngu müla.

¹²Trükshihbonü nü achihkhi sodo tüsho nünü azhikhinü alomi milah; tümüde thirithsürünü thirithsürü kheak jing mükhedo; ane chido rüpde lungdo.

¹³Ijip lomi yanpü Babilon kiulongthsüpuh Nebukednezar arüpü dünkheak ATUNGPUHNÜ wukihbuh Jeremia ki asukkhi yu:

¹⁴Ijip ching thaang, tüsho Migdol ching zhiyukjang; Memphis tüsho Tapanhes ching zhiyukjang; Thaang, “ Nüsa zhippung mükühang tüsho thsakhamang, tümüde nüsa mükamde nukshangnü amuyubah.”

¹⁵Tümüde nüsa thrünpuh Apis tsokhea? ATUNGPUHNÜ api nima lungshih.

¹⁶Nüsa bonungrü jing mükhedo tüsho lungdo, tüsho khülangnü püpürü ki tha, “Arang, isanü isa mihtsürü tüsho isa zübe lomi lim, athsümünim nukshang bahbah yüloanü.”

¹⁷Ijip kiulongthsüpuh Pharao kilim mung aso khülang jihang, “Thiyu-tobuh shepünü anihbuh kim atsü lakphahkhea.”

¹⁸Atsütsü I lah, kiulongthsüpuhnü thachoh, shepü mung Wuto ATUNGPUH la, awungbo lung Tabor nangde tüsho keto yean Karmel nangde khülang arüchoh.

¹⁹Ramtso thsungkheaknü hah thsang, nüsa Ijip ching larübo! Tümüde Memphis ju abahkhi, athsümünim, mihtsürü mülade akambah.

²⁰Ijip a moshi drelü nangde lah tüshe dukulimnü amükeakbe mukhu anihbe azhihde arüchoh.

²¹Anihbenü amulokhi bonungrübo she moshi nunubo nangde athsükhukpü müla; arübo she rholodo tüsho nungde tsodo, arübo müzhip; tümüde arü kheak arü thsümütsü nimung, arü thsümüchi kim akihdo.

²²Anihbenü phuruto chinde atsokhi nangde düsheak thsüchoh; tümüde anihbe riribo müküpde tsahchoh, tüsho anihbe azhihde ayübo shuhbah sangdungbo kiushakrü nangde arüchoh.

²³Arünü anihbe murung muhokhukbe lalashe akiukheambah, ATUNGPUHNÜ thachoh, tümütüsho arübo tangkhobo kheaknü khide hihdaklah; arübo mükhebin.

²⁴Ijip tsührübe achih ngübah; anihbe dukulim mihtsürü kilim jihbah.

²⁵Wuto ATUNGPUH , Israel Thrünpuhnü tha: Kheahang, inü Thebes thrünpuh Amon, Pharao, tüsho Ijip le anihbe thrünpuhbo tüsho kiulongthsürübo, Pharao tüsho api kheak kinrü kheak thsümüchi handarübah.

²⁶Inü arübo ju arü rhangdung yimrü, Babilon kiulongthsüpuh Nebukednezar tüsho api yo atorübo kilim jihbah. Ju dunglim awün nimungbo ching nangde Ijip ching mihtsürübo labah, ATUNGPUHNÜ thachoh.

²⁷Tüshe nü thsungkheaknü, dütre I yamlarü Jakob, tüsho mulong dünini O Israel; tümüde limshu chingnü inü nü tüsho ramde ayükhi lomi chingnü nü tsührü khümkhitbah. Jakob alodarübah tüsho mungtsü tüsho sühakhim labah, tüsho shenü api mütreshih.

²⁸Nü thsungkheak a, dütre, I yamlarü Jakob, ATUNGPUHNÜ thachoh, tümüde I nü lung lah. Inü nü yana yüshihkhi trükshih alala kheamshihbah, tüshe inü nü a mükheamshih! Inü nü alungki ching thsangdanbah tüsho inü shahde müthsümüchidüa nü muzojih.