Read Yimchungru Naga Jer 48 Bible Online

Jer 48 - Yimchungru Naga bible

Jer 48

¹Moab dünkheak Wuto A TU N GPU H , Israel Thrünpuhnü ha thachoh: Nebo thsungkheak aha, ha thsümünima lah! Kiriathaim achih ngüshihdo, ha ludo; chipi achih ngüdo tüsho keamdo;

²Moab shikhi kheaküa müla. Heshbon ching arünü anihbe azhihde amütsü lümkhi thsüdo: “Arang, isanü anihbe trükshih lakhi chingnü dükheakshihanü!” O Madmen kiuto, nü she zhikrangkhündo akambah; nukshangnü nü yande müshambah.

³Aniang! Horonaim ching zhikhi khülang, azhikkhi tüsho thsümünimkhi ato!

⁴Moab thsümünima lah! Anihbe tsührübonü zhichoh!

⁵Tümüde Luhith muduh kheak arübo tripdüsükde wutuchoh; tümüde Horonaim koyu kheak arünü thsünüde azhikhi sodo.

⁶Shanang! Nüsa khümkhitang! Loshelo ching mütüm khora nangde laang!

⁷Tümütüsho nünü nü sühmüh tüsho nü lakhitbo kheak kindo, nü she bede atsobah; nü thrünpuh Kemosh ramtso ching, api yo amükeamrübo tüsho yakzanshuhrübo bede dükde ayübah.

⁸Kiutobo aban kheak athsümünimrü arübah, tüsho kiuto küpü she mutsokhit; jindükhün dükheakbah tüsho adükhün thsümünimbah, I ATUNGPUHNÜ asukdo.

⁹Moab kilim ghibo jihang, tümüde phinde atsobah, anihbe kiutobo zhikrangkhündo she mülade alabah.

¹⁰Shepünü ATUNGPUH rhimo ching sühdukchonü muthrumünean; tüsho shepünü thiyih bukpü chingnü nukshang tuklochonü muthrumünean.

¹¹Moab a api athunuchokinü zuzu lakheah, yukhu nangde azhihzhih kingmukhungdo; api a phüh khülang chingnü khülang mudungakeang, yungsho api a ramtso ching müyü; jumonü api kekhi judü lang lah tüsho api rhümthüneakhi mümüthri.

¹²Jumonü ATUNGPUHNÜ thachoh, api dungkhita bahshihpü, tüsho api phüh yihakeangpü tüsho api phüh adütre kamde ayihnakpü inü mihtsürü thiyipü nimung tsükjide arüchoh.

¹³Judüki Moab ju Israel yamkhünnü Bethel kheak kinkhi hode achih ngükhi nangde Kemosh dünkheaknü achih ngübah.

¹⁴“ Isa athrungrübo tüsho amüzhak thirithsürübo ah” de küde thsah nüsanü thakhukpü?

¹⁵Moab tüsho api kiutobo thsümünimrü atudo, tüsho api yo amokhitkhi athrününgtsüngbo alaksahpü ching yüdo, kiulongthsüpuhnü thachoh, shepü mung Wuto ATUNGPUH la.

¹⁶Moab thsümütsü khah ki lah tüsho thsümüchipü niokheamde khiungchoh.

¹⁷Api kurungkheak tüzhoang, nüsa api yamhingrü alala, tüsho sherünü api mung mükheahla; thaang, “ Küde Wuto tso zhakde, müretahkhi tso!”

¹⁸O Dibon ching larübo, nüsa müretahkhi chingnü akiang tüsho asungthulung lo kheak binang, tümüde Moab thsümünimrü nüsa azhihde atubah tüsho nüsa chipi ayünkhi kiutobo thsümünimbah.

¹⁹Nüsa Aroer ching larübo! Limro ki zhipang tüsho kheahang, alihde atsorü aliberü ki keoang, “Tümü thsüa la?”

²⁰Moab achih ngüshihdo, tümüde ha thsümünimdo; tüzhoang tüsho tripang! Moab thsümünima yaplah de Arnon ayung yeande mükheahshang.

²¹Mahkhapkhi adükhün lo kheak arüdo, Holon kheak, tüsho Jaza, Mephaath,

²²tüsho Dibon, Nebo, Beth-diblathaim,

²³tüsho Kiriathaim, Beth-gamul, Beth-meon,

²⁴tüsho Kerioth, Bozra, tüsho Moab lomi kiutobo alala ching, limshu tüsho aphüni.

²⁵Moab juh yihshakdo, tüsho api bin zhakdo, ATUNGPUHNÜ thachoh.

²⁶Moab müshangshang, tümütüsho apinü ATUNGPUH azhihde müretahdo; anihbuhnü mülümkhi ching Moab awuhshang; api she münedung kambah.

²⁷Api mahühmüdama lalashe Israel ju nü thsungkheaknü münedung lakheah; tüshe nünü api dünkheak asukchoki nü ku lukchoh!

²⁸O Moab ching larübo! Kiutobo bahang, tüsho lungto ching laang, lungku münküp kheak asap shukhi müthrithrümpü nangde thsang.

²⁹Isanü Moab kükheangkhi — api khide kükheanglah — changde alümkhi, lülüshishikhi tüsho api bukakhiukkhi tüsho api mulong ching juno-lümlung lakhi sodo.

³⁰Inü api bukakhiukkhi mükheahlah, ATUNGPUHNÜ thachoh; api kükheangkhi amülim, api rhimobo amülim.

³¹Jumonü inü Moab thsungkheak mulong rozhakde tripchoh, inü Moab alala thsungkheak tripchoh; Kir-heres mihtsürü thsungkheak inü mitripchoh.

³²O Sibma kurungaso! Inü Jazer kheaknü alü nü thsungkheak tripchoh. Nü khahbonü keto holah, Jazer khiunglah; nü yo muzhu sangaso tüsho kurungaso yimlukhi kheak athsümünimrü yükihdo.

³³Asühara tüsho asühachihkhi Moab amüdang lomi chingnü lude tsodo; inü yukhu nitpung chingnü yukhu tuklodo; shenü jurübo asühachihde münit; azhikhi ju asühachihde azhikhi yung.

³⁴Heshbon tüsho Elealenü tripchoh; arü düsheak Jahaz khiungde, Zoar chingnü Horonaim tüsho Eglath-shelishiya khiungde alanchoh. Tümüde Nimrim kebo she zhikabahdo.

³⁵ATUNGPUHNÜ thachoh, Moab ching sherünü achang dangpung ching laksah-a kingaüncho tüsho arü thrünpuhbo kilim taka kingaünchonü inü akheamshihbah.

³⁶Jumonü khungpi khungkhi nangde I mulongnü ashechoh, tüsho khungpi nangde Kir-heres mihtsürü thsungkheak I mulongnü ashechoh; tümüde arü lakhit ngükhi dükheakdo.

³⁷Tümüde mihbüm aban ku hüta lah tüsho mükhühnam nipa lah; alala khahbo kheak atsütkhibo lah, tüsho chim kheak shungliukhim lah.

³⁸Moab yam-münbo alala kheak tüsho wungdo ching tümü müla tüshe atüzhokhi lah; tümüde shenü mulunekhi phüh nangde inü Moab yihrüpdo, ATUNGPUHNÜ thachoh.

³⁹Ha küde thsah yihrüpa la! Künangde arünü mulong rozhakcho! Künangde Moabnü achihde adüthsün rholokhea! Jumonü Moab a api yamhingrü alala ki münedung tüsho atrebe kamdo.

⁴⁰Tümüde ATUNGPUHNÜ ha thachoh: Kheahang, api müleang nangde phinkhibah, tüsho Moab azhihde aghidükeangbo chutreakbah;

⁴¹Kerioth kiutobo ju ayanbah tüsho chipi ayünkhibo thsümünimbah. Ju nimung Moab thirithsürübo mulong ju aliberü thsünükhi nangde alabah.

⁴²Trükshih khülang lakhi chingnü Moab thsümünimbah, tümütüsho apinü ATUNGPUH azhihde wusudo.

⁴³Atrebe alokhün, tüsho azheang nü müngüh lah, O Moab ching larübo! ATUNGPUHNÜ thachoh.

⁴⁴Atrebe chingnü atsorü abannü alokhün ching keamyukbah, tüsho alokhün chingnü akünkhitrü abannü azheang ching phuhbah. Tümüde harübo inü Moab kheak arü thsümüchipü kam ching handarübah, ATUNGPUHNÜ thachoh.

⁴⁵Heshbon alamme khüp tsotsahrümtsahrübo keaka tukloa lah; tümüde Heshbon chingnü mo khülang, Sihon yam chingnü motru khülang akhiukbah; hanü Moab kingkang, alanaji mihtsürü thangphülang aniubah.

⁴⁶Nü are O Moab! Kemosh mihtsürü dükheakdo, tümüde nü tsührübo tüsho nü tsührübebo ramde tsodo.

⁴⁷Judüalalashe inü hashu nimungbo ching Moab kuhi jihlobah, ATUNGPUHNÜ thachoh. Ha khiungde Moab kheak mahkhap lah.