Read Yimchungru Naga Jer 5 Bible Online

Jer 5 - Yimchungru Naga bible

Jer 5

¹Jirusalem kiudunglimrobo hode yüla arüla de alihang, mükamde kheahang tüsho mütsanang! Wungdobo ching yimang tüsho nünü thiyuro rhimorü tüsho thiyuro yimrü mihtsürü khülang lang she ngünahnü kheahang — junangde inü Jirusalem neak bahjihanü.

²Arünü, “ATUNGPUH lale,” de thatha she, arünü amülim thiyuchihchimchoh.

³O ATUNGPUH , nü müknü thiyuro mükheahcho de? Nünü arü shik, tüshe arünü thsünükhi mümütsan; nünü arü muyuabah, tüshe arünü thsülangkhi lupü reanglo. Arünü arü miro lung kheaknü amürangbe kamshih; arünü arholopü thsunglo.

⁴Judüki inü tha, “Harü lang zhochihrü ah, arübo lümduhlah; tümüde arünü ATUNGPUH limro, arü Thrünpuh yakzan mümükheah.

⁵I atorü kilim yübah tüsho arü ki asukanü; tsükjide arünü ATUNGPUH limro, arü Thrünpuh yakzan mükheahlah.” Tüshe arü rukhühnü sangkaplak yihshakdo, arü rhükkhi rukshakdo.

⁶Jumonü murung ching yo kekhüzünü arü nguhsahbah, loshelo ching yo rimrenü arü thsümünimbah. Sangtsungnü arü kiutobo azhihde kheahchoh; sherübo wukhiukbanü adütre kamde thonakbah — tümütüsho arünü alakmihkhibo hihlah, arü mulong murholokhi tolah.

⁷Küde thsah inü nü neak bahjihpü? Nü tsührübonü I bahyukdo, tüsho akeang thrünpuhbo hode thiyuchihchim. Inü arü bukthsüde yimkip she, arünü müzammüram yihbeak tüsho müzammüramrü yambo ching shode tsah.

⁸Arübo ju tsüde yimkipkhi khorapung nangde, nihbuh yamhingrü niuberü mürühchoh.

⁹Hadürü dünkheak inü arü müthsümüchiba de? ATUNGPUHNÜ thachoh; tüsho hadürü hode inü trükshih kheak romüyimba de?

¹⁰Anihbe kurungasolu ching wutuang tüsho thsümünimang, tüshe shahde dükheamshih; anihbe khahbo chia bahang, tümüde arübo ATUNGPUH yo yung.

¹¹Tümüde Israel yamkhün tüsho Juda yamkhünnü I ki alala mülapyukdo, ATUNGPUHNÜ thachoh.

¹²Arünü ATUNGPUH dünkheak mülimde asukdo, tüsho tha, “Apinü tümü müthsü. Tümü amütsü isa kheak marü, tüsho isanü thirithsü yungsho khümzung müngü.”

¹³Wukihrübo ju apung lang ah, tümüde thiyu arü kheak müla. Ha arü kheak rhimobah!

¹⁴Jumonü ATUNGPUH Wuto Thrünpuhnü ha thachoh: Tümütüsho arünü ha yu asuk, inü kheakü I yu nüsa mün ching mo, tüsho ha mihtsürü ju sang kamshihchoh, tüsho monü arü aniuabahbah.

¹⁵Inü limshu chingnü trükshih khülang nü kheak handarübah, O Israel yamkhün, ATUNGPUHNÜ thachoh. Ha sühmüh lakhi trükshih, ha jipü-lün trükshih, nünü mümükheahkhi yutha trükshih, yungsho arünü athakhi nünü manikhitkhuk.

¹⁶Arü hühzopung ju akhimshuhkhi kiuyuk nangde; arü alala sühmüh larü thirithsürü ah.

¹⁷Arünü nüsa yimlukhi tüsho tsühyungbe tsühabahbah; arünü nüsa tsührübo le tsührübebo tsühabahbah; arünü nüsa mihnu boto tüsho moshibo tsühabahbah; arünü nüsa kurungasobo le khubaso tsühabahbah; arü nukshangnü nüsanü mulonglamde chipi ayünkhi kiutobo thsümünimbah.

¹⁸ATUNGPUHNÜ thachoh, ju nimungbo ching she, inü shahde mükheamshih.

¹⁹Tüsho küyimki nü mihtsürübonü athaba, “Tümüde ATUNGPUH isa Thrünpuhnü harü alala isa kheak rhimokhea?” nünü arü ki thabah, “ Nüsanü I bahyuk tüsho nüsa lomi ching khiungkerü thrünpuhbo tankih, jumonü nüsa lo ching yungde nüsanü khiungkerü tankihbah.”

²⁰Ha Jakob yamkhün ching thaang, Juda ching zhiyukjang:

²¹Ha aniang, O makhakhi tüsho sulüm mülakhi mihtsürübo, sherü mükjibo la, tüshe müngücho, sherü nükhünbo la, tüshe musocho.

²²Nüsanü I mütre de? ATUNGPUHNÜ thachoh; nüsanü I miki majancho de? Inü keto aredung thsungkheak loyi zojihlah, lünnü muhokhukbe rhü khülang; kenü abükbük she müzünhokhuk, arungrung she muhokhuk.

²³Tüshe ha mihtsürü anihnih tüsho azhihkhi mulong lah; arünü anguhdo tüsho tsoabahdo.

²⁴Arünü mulong ching mütha, “ Isanü ATUNGPUH isa Thrünpuh treanü, shepünü akheahmünchi ching tsüng arüshihcho, mumükin tsüng tüsho mükhean tsüng jihcho, tüsho isa kilim yimlupü nimungbo akhukhita zojihcho.”

²⁵Nüsanü alakmihkhibonü harü rholode tsodo, tüsho nüsa neakbonü atsübo tukloshihdo.

²⁶Tümüde I mihtsürü bolung mihmukhiuhbo lah; arünü püpürü kukrukbo luchoh. Damrimrünü ajimkhi nangde azheang thsübah mihtsürü phuhchoh.

²⁷Wuhnubonü amikhi truji nangde, arü yambo mulomülapnü milah; jumonü arübo ato tüsho alarü kamkheah,

²⁸arübo wu tüsho lakhit lah. Arünü mihbukmuyuk rhimobo ching mahiung; akuk ngüshihpü thsüde arünü thiyuronü mürerü mahmükhap, tüsho müthsümülarü alim mutsungdojih.

²⁹Hadürü thsungkheak inü arü müthsümüchibea de? ATUNGPUHNÜ thachoh, tüsho hadürü trükshih kheak inü romüyimbea de?

³⁰Amüyinsahbe tüsho atrebe lomi ching dünjido:

³¹Wukihrübonü akeangyu müchitchoh, tüsho wukihrübonü thiyukhüm jihkhi yande amükeamrübonü yakzan shuhchoh; I mihtsürübonü ha lashihpü muzholah, tüshe akheam arüchoki nüsanü tümü thsüba?