Read Yimchungru Naga Jer 50 Bible Online

Jer 50 - Yimchungru Naga bible

Jer 50

¹Babilon tüsho Kaldea lomi dünkheak wukihbuh Jeremia hode ATUNGPUHNÜ asukkhi yu:

²Trükshih bolung thaang tüsho zhiyukang, riphin khimang tüsho zhiyukang, ha düram, thaang: Babilon dümdo, Bel achih ngüdo, Merodak mulong ninido. Anihbe mejak achih ngüdo, anihbe sangthsü mulong ninido.

³Tümüde dukulimnü trükshih khülang anihbe azhihde arübah; junü anihbe lomi zhikshihbah, tüsho ju ching she müla; mihtsürü tüsho shiwühbo chido tsoabahbah.

⁴ATUNGPUHNÜ thachoh, ju nimung ching, ju kim ching, Israel mihtsürü tüsho Juda mihtsürü rukhüh arübah; arünü ATUNGPUH arü Thrünpuh yimde tripde arübah.

⁵Arünü Zion limro keokhibah, tüsho ju lim arü miro anguhbah tüsho arünü küyimkishe mümihbe akheam müla tangzüng hode A TU N GPU H kilim arübah tüsho arihbah.

⁶I mihtsürübo adükheakkhi namfimihnu lakheah; arü namfimihnu neakrübonü awungbo lim rholoshihde bephülapdo; awungbo chingnü müzüngbo ching rümde yü, arünü arü lapung yam mihdo.

⁷Arü ngürü alalanü arü tsühabahdo, tüsho arü riribonü tha, “ Isa amülim müla, tümütüsho arünü thiyuro rimlopung, ATUNGPUH , arü jipürü mulonglam ATUNGPUH azhihde neak yihbeakdo.”

⁸Babilon chingnü tsoang, tüsho Kaldearü lomi chingnü wukhiukang, tüsho mihnu boto bekhi mihnu pungbo nangde thsang.

⁹Tümüde inü thurumusubah tüsho dukulim lomi chingnü trükshih boto ato Babilon azhihde handarüpü lah; tüsho arünü anihbe azhihde aduklangbah; arü hühzobo ju khah keangkeang malodarükhi ayeanzo thirithsürü hühzobo nangde lah.

¹⁰Kaldearü yankhia lubah; anihbe yankhia lurü alala reangkeambah, ATUNGPUHNÜ thachoh.

¹¹Nü asühachihchih she, nü asüharara she, O I yamrüplurüp yankhia lurübo, moshinü hi jungkhi nangde tüsho khoranü akhungkhi nangde,

¹²nü be lümchihyuk ngübah, tüsho nü zübebe mungchih ngübah. Kheahang, anihbe trükshih bolung akheambe labah, sunglo, akunglo, tüsho ke-mülakhi loshelo labah.

¹³ATUNGPUH bukakhiukkhinü Babilon ching she mülade zhikrangkhündo alabah; Babilon horü abannü müyinsahbah tüsho anihbe mübo alala thsungkheaknü ish thsübah.

¹⁴Babilon mükamde nüsa sanglüh hünkihrü alala zhippung thsakhamang; anihbe kheak kipang, hühzobo daningshih, tümüde anihbenü ATUNGPUH azhihde neak yihbeakdo.

¹⁵Thrip alala chingnü anihbe azhihde ahoang, “Anihbenü khah shuhkihabahdo; anihbe khimtanbo keamdo, anihbe chipibo thokheamdo.” Tümüde ha ATUNGPUH royimkhi lah: anihbe kheak royimang, anihbenü rhimokhi nangde anihbe ki rhimoang.

¹⁶Babilon chingnü müjih-hiurü tüsho yimlu kim ching hirhüpbe dükheakshang; tümütüsho athsümünimbe nukshang trekhinü arü mihbüm aban nihbuh mihtsürü kilim rholobah, tüsho nihbuh lomi lim shande ayübah.

¹⁷Israel a kekhüzünü namfimihnu yanmüzütkhi nangde lah. Akhuhde Asiria kiulongthsüpuhnü api muyu, tüsho kheakü akheam ching Babilon kiulongthsüpuh Nebukednezarnü arobo mutro.

¹⁸Jumonü, Wuto ATUNGPUH , Israel Thrünpuhnü ha thachoh: Inü Asiria kiulongthsüpuh thsümüchikhi nangde Babilon kiulongthsüpuh tüsho api lomi thsümüchibah.

¹⁹Inü rimlopung ching Israel belodarübah tüsho Karmel kheak le Bashan ching yimtsühshihbah, tüsho Ephraim wungbo kheak Gilead ching apinü akünkhi reangkeambah.

²⁰ATUNGPUHNÜ thachoh, ju nimungbo ching tüsho ju kim ching Israel mülimkhi yimbah, tüshe mülade alabah; tüsho Juda neakbo yimbah, tüshe müngü; tümüde inü aninga lashihkhi neak bahjihbah.

²¹Merathaim lomi lim wutuang; anihbe azhihde wutuang, tüsho Pekod ching larü yanang tüsho shahde arü dükheakshang, ATUNGPUHNÜ thachoh; inü nü ki thiyukhüm jihkhi alala rhimoang.

²²Lomi ching keochih düsheak tüsho athsümünim ato lah!

²³Lomi athrünkhi yümlung küdükhüh lang adütre kamde thsümünima la! Trükshih bolung Babilon küdükhüh she yingyingbe khunga la!

²⁴O Babilon, nünü nü thsungkheak azheang zo tüshe ju nünü mümükheahde nü phuhdo; nü a yimkhit tüsho tholo, tümütüsho nünü ATUNGPUH azhihdo.

²⁵ATUNGPUHNÜ api thsühnuk zopung khimshuhdo, tüsho api bukakhiukkhi thsühnuk yihkhitdo, tümüde Wuto Atungpuh THRÜNPUHNÜ Kaldearü lomi ching rhimopü khülang lah.

²⁶Thrip aban chingnü anihbe azhihde arang; anihbe jakambo khimshuhang; hi wumujungkhi nangde anihbe mujungshang, tüsho shahde anihbe thsümünimang; anihbe yo tümü she daningshih.

²⁷Anihbe moshi alala laksahang. Arü thsungkheak aha, arü nimung, arü thsümüchipü kim arüdo!

²⁸Aniang! Babilon lomi chingnü tsotsahrümtsahrübo ATUNGPUH isa Thrünpuh royimkhi, api arüngyam royimkhi Zion ching zhiyukpü arüchoh.

²⁹Babilon azhihde hühzo-kiprü, sanglüh hünrü alala jimukhungang. Anihbe mükamde alala binang; sheshe dütsokhishih. Anihbe rhimobo yande anihbe ki jihloang; anihbenü arhimokhi nangde, anihbe ki rhimoang — tümüde anihbenü bukakhiukde ATUNGPUH , Israel Amüsühbuh ki keochihdo.

³⁰Jumonü anihbe yo athrününgtsüngbo anihbe kiudunglimrobo ching keambah, tüsho anihbe bonungrü alala ju nimung dükheakbah, ATUNGPUHNÜ thachoh.

³¹Inü nü azhihlah, O kükheangküyangbuh, Wuto Atungpuh THRÜNPUHNÜ thachoh; tümüde nü nimung, inü nü thsümüchipü kim arüdo.

³²Akükheangbuh jing mükhebah tüsho alungbah, shenü api müyihmusu tüsho inü api kiutobo ching mo takkihbah, tüsho api mühide alala inü aniukhambah.

³³Wuto ATUNGPUHNÜ ha thachoh: Israel mihtsürü tüsho Juda mihtsürü junoa lah; arü ramrü alalanü arü düngde tholodo tüsho mütsoshih.

³⁴Arü Rhokhitbuh sühmüh lah; Wuto ATUNGPUH ju api mung. Apinü tsükjide arü dünkheak müküpde azhipbah, junangde apinü aningkhi lomi kilim sühakhim jihbah, tüshe Babilon ching larü kilim sühakhim mülakhi jihbah.

³⁵Kaldearü tüsho Babilon ching larü azhihde, tüsho anihbe torübo tüsho lümlung larü azhihde nukshang khülang lah, ATUNGPUHNÜ thachoh!

³⁶Müchitrü azhihde nukshang lah, junangde arübo makharü kambah! Anihbe thirithsürü azhihde nukshang lah, junangde arübo niuknimbah!

³⁷Anihbe khorabo tüsho khora-lolungbebo azhihde nukshang lah, tüsho anihbe bolung khiungkerü thirithsürübo azhihde lah, junangde arübo azoberü kamabah! Anihbe rahpungbo alala azhihde nukshang lah, junangde jurübo yankhia lubah!

³⁸Kebo azhihde akung lah, junangde jurübo angahbah! Tümüde ha mejakbo lomi khülang tüsho arünü sangthsübo dunglim bünde yüchoh.

³⁹Jumonü mütüm shiwühbo tüsho wuyihbo Babilon ching labah, tüsho kewühtopübo ju ching labah; ha küyimkishe mihtsürü mülalo, yungsho lün alala thsungkheak müla.

⁴⁰ATUNGPUHNÜ thachoh, Thrünpuhnü Sodom tüsho Gomorra thsümünimchoki nangde sheshe ju ching müla, yungsho she mihtsürü ju ching müla.

⁴¹Kheahang, mihtsürü khülang dukulimnü arüchoh; trükshih ato tüsho kiulongthsürü ahihdo limshu lomi chingnü thurumusuchoh.

⁴²Arünü sanglüh tüsho thsüh shuhlah, arübo bukmüke tüsho mihmüthsüm müla. Arü düsheak ju keto arungkhi nangde lah; arübo khorabo kheak binlah, keochihpü thirithsürü nangde duklanglah, nü azhihde, O tsührübe Babilon!

⁴³Babilon kiulongthsüpuhnü arü yusheak sodo, tüsho api khah keahkhia lah; thsününü api ramlodo, azoberü zübechoki thsünükhi nangde lah.

⁴⁴Kekhüzü khülang Jordan rim akheah chingnü rimlopung aphüyak azhihde atukhi nangde, inü nahde arübo anihbe kheaknü yanyuka bahbah; tüsho inü mokhitkhi sherüanü anihbe kurungkheak zojihbah. Tümüde shepü I ruk la? Shenü I münitkhukla? I miki zhipkhukpü thsüde shepü namfimihnu neakrü a?

⁴⁵Jumonü ATUNGPUHNÜ Babilon tüsho Kaldearü lomi azhihde apinü lümkhi thsükhi aniang: Tsükjide mihnu nunubo yanyuka bahbah; apinü arü dünkheaknü arü rimlopung shahde thsümünimbah.

⁴⁶Babilon keamkhi düsheaknü alomi ajanbah, tüsho anihbenü azhikhi düsheak trükshih bolung sobah.