Read Yimchungru Naga Jer 51 Bible Online

Jer 51 - Yimchungru Naga bible

Jer 51

¹ATUNGPUHNÜ ha thachoh: Inü Babilon azhihde tüsho Lebqamai ching larü azhihde athsümünimbe apung rhumusupü lah;

²tüsho inü athrüprü Babilon ching yüshihbah, tüsho arünü anihbe thrüpbah. Küpkhuk nimung ching arünü anihbe azhihde thrip aban chingnü arüchoki anihbe lomi akeangkeang kamshihbah.

³Hühzo kiprünü anihbuh sanglüh dühünshih, tüsho anihbuh thirithsü zülu düyihshih. Athrününgtsüng daningshih; bonungrü shahde dükheakshang.

⁴Arübo Kaldearü lomi ching laksah-a yapbah, tüsho kiudunglimrobo ching yuribah.

⁵Israel Amüsühbuh miki arü lomi amülimnü mide lalashe, Israel tüsho Juda arü Thrünpuh Wuto ATUNGPUHNÜ mübahyuk.

⁶Babilon bolungnü tsoang, nüsa mihbüm abannü nihbuh rhangdung khümkhitang! Anihbe neak dünkheaknü düdükheak, tümüde ha ATUNGPUH royimkhi kim lah; anihbe ngüpü lakhi apinü jihlochoh.

⁷Babilon a ATUNGPUH khah ching suna pung lakheah, lomi alala müshangshih; trükshihbonü anihbe yukhu yungdo, tüsho junangde trükshihbo yingyingde kam.

⁸Zukleangnü Babilon lungabah tüsho ajan; anihbe thsungkheak tüzhoang! Anihbe thsünükhi thsungkheak moli luang; khükijua anihbe athsüngubah.

⁹Isanü Babilon thsüngupü mürangdo, tüshe anihbe müthsüngukhuk. Anihbe bahyukang, tüsho isa mihbüm abannü isa nihbuh lomi lim yüanü; tümüde anihbe mahkhapkhi yinmi khiungdo tüsho thüningbo khiungde shuhkihdo.

¹⁰ATUNGPUHNÜ isa thiyuro handarüdo; arang, isanü ATUNGPUH isa Thrünpuh rhimo Zion ching thaanü.

¹¹Hühzobo züang! Tsungbo thsakhamang! ATUNGPUHNÜ Midia kiulongthsürübo me thurumusudo, tümütüsho Babilon dünkheak api lümkhi ju athsümünimpü lah, tümüde ju ATUNGPUH royimkhi, api arüngyam royimkhi lah.

¹²Babilon chipi yeande riphin khülang shuhkihang; akheahrü düküngshang; ajimrü thsakhamang; tümüde ATUNGPUHNÜ Babilon ching larü dünkheak tümü asukdünü lümkhi thsüdo tüsho rhimodo.

¹³Nüsa sherü ke ahihdo yean lacho, rahpungbo ching lakhit la, nüsa yo akheam arüdo, nü rhangdung liu yihshakdo.

¹⁴Wuto ATUNGPUHNÜ aküdah thsüde thiyuchihchim. Tsükjide inü nü tangkho boto nangde mihtsürübonü amishihbah, tüsho arünü nü kurungkheak akukkhi düsheak ahobah.

¹⁵Api wunü alomi thrün, api lümlungnü alomi lashih, tüsho api anikhitkhinü thüningbo thoshang.

¹⁶Küyimki apinü tsüngmukbanü, thüningbo ching kebo arungchoh; api alomi akheam chingnü amobo yükihshihchoh. Apinü tsüng lung chinchobe arüshihchoh tüsho api zowupung yambo chingnü apung hankhitchoh.

¹⁷Mihbüm abannü zhazhalah tüsho mükheahmudu müla; sunakingrübo alala arü sangthsübo hode achih ngüdo; tümüde arü mejakbo amülim tüsho arü kheak sheak müla.

¹⁸Arübo müthülünkhi, thiyuro mülakhi rhimo ah; arü thsümüchi kim ching arübo dükheakbah.

¹⁹Jakob Thrünpuh a harü ruk yung, tümüde kukruk alala kamkhitshihkhi ju api ah, tüsho Israel ju api yamrüplurüp trük lah; Wuto ATUNGPUH ju api mung.

²⁰Nü a I yo thirithsü yümlung, I yo keochih thsühnuk; nü shuhbah inü trükshihbo yümnakchoh; nü shuhbah inü kiulongthsübo thsümünimchoh;

²¹nü hode inü khorabo tüsho ju kheak binrü yümnakchoh; nü hode inü khora-lolungbe tüsho aberü yümnakchoh;

²²nü hode inü athrürü tüsho aliberü yümnakchoh; nü hode inü ashinbuhrü mihtsürü tüsho athunu yümnakchoh; nü hode inü athrününgtsüng tüsho anünürü yümnakchoh;

²³nü hode inü namfimihnu neakrü tüsho mihnu boto yümnakchoh; nü hode inü thulu-thsürü tüsho moshipungbo yümnakchoh; nü hode inü kovünorbo tüsho atorübo yümnakchoh.

²⁴Zion ching arünü nüsa kheak amülim rhimokhi alala dünkheaknü nüsa mük kinü inü Babilon tüsho Kaldearü ki jihlobah, ATUNGPUHNÜ thachoh.

²⁵Inü nü azhihde lah, O athsümünimrü wung, ATUNGPUHNÜ thachoh, küpü hode alomi abümnü thsümünimcho; inü nü azhihde I khah chungkihbah, tüsho inü nü lungku chingnü lungde yükishihbah, tüsho takabahkhi wung kamshihbah.

²⁶Amühit lung yungsho khimtan lung nü kheaknü mulu, tüshe nü a kamruhroro abahkhi labah, ATUNGPUHNÜ thachoh.

²⁷Lomi ching riphin khülang shuhkihang, trükshih bolung hulipungpung mütang; anihbe azhihde thirithsüpü trükshihbo thsakhamang, anihbe azhihde kiulongthsübo, Ararat, Minni, tüsho Ashkenaz jimukhungang; anihbe azhihde limthorü mokhitang, tangkho boto nangde khorabo hande akhiukang.

²⁸Anihbe azhihde thirithsüpü trükshihbo, Midia kiulongthsübo, arü lung kovünorbo tüsho atorübo, tüsho arü yukhüm khüp lakhi lomi aban thsakhamang.

²⁹Alomi ajanchoh tüsho niukchoh, tümüde Babilon azhihde ATUNGPUH lümkhi, Babilon lomi mihtsürü mülade azhikkhi kamshihpü lah.

³⁰Babilon thirithsürübonü keochihpü tuklodo, arübo chipi ayünkhi ching lah; arü sühmüh keaka lah, arübo azoberü kamdo; anihbe yambo keak mo takkihdo, akhrihbebo zhaka lah.

³¹Alihrü khülangnü püpürü shorupü tüsho yunithsürü khülangnü püpürü shorupü, api kiuto akheamnü akheam khiungde alukhi Babilon kiulongthsüpuh ki thapü alihchoh:

³²Kedükihhopung yandoa lah, khiukbo monü takdo, tüsho bonungrübo atrekhi ching lah.

³³Tümüde Wuto ATUNGPUH , Israel Thrünpuhnü ha thachoh: Tsührübe Babilon a hinitpung ching nitkhi nangde lah, anihbe yimlupü kim nahde arübah.

³⁴Babilon kiulongthsüpuh Nebukednezarnü I muyudo, apinü I zünakdo; apinü I akeangkeang sangdan kamshih, phuruto khülangnü nangde apinü I muyuabah; I shih-akebenü api bukthsüshih, apinü I muliuhkhita bah.

³⁵Zion ching larünü athabah, “ I shih thsümünimkhi ju Babilon kheak yükihshang.” Jirusalemnü athabah, “ I thiyih ju Kaldea ching larü kheak yükihshang.”

³⁶Jumonü ATUNGPUHNÜ ha thachoh: Inü nü tsunglobah tüsho nü thsungkheak royimbah. Inü anihbe kebo ngahshihbah tüsho kenü kungshihbah;

³⁷tüsho Babilon ju athsümünim mujung, shirungbo yam, mihtrebe kukruk tüsho ish thsübe, mihtsürü mülade akambah.

³⁸Kekhüzübo nangde arü rukhüh arungbah; arünü kekhüzü nunu nangde ahukbah.

³⁹Küyimki arü mulong phurubanü, inü arü yungbe zojihbah tüsho arübo masühyi khiungde müshangshihbah tüsho kamruhroro yapshihbah tüsho küyimkishe müyihmusu, ATUNGPUHNÜ thachoh.

⁴⁰Inü arübo namfimihnunubo nangde, namfimihnupungbo tüsho mihnubo nangde alaksahpü bedakibah.

⁴¹Küde alomi lüpdükhi kükheangkhi Sheshak rama lude! Küde Babilon trükshih bolung mihtrebe kama la!

⁴²Ketonü Babilon kurungkheak zünkihdo; anihbe ju düchi ke-abükkhinü zündoa lah.

⁴³Anihbe kiutobo zhikrangkhündo, akung lomi, tüsho loshelo, she mülakhi lomi, tüsho mihtsürünü muhokhi kamdo.

⁴⁴Inü Babilon thrünpuh Bel thsümüchibah, tüsho apinü amuyukhi mülümkhitshihbah. Trükshihbonü kheaküa api ki shode müyü; Babilon chipi keamdo.

⁴⁵Anihbe kheaknü akhiukang, I mihtsürü! ATUNGPUH bukakhiukkhi chingnü nüsa mihbüm aban rhangdung khümkhitang!

⁴⁶Lomi ching arhunganimkhi sobah mulong dünini yungsho trede düla — kam khülang ching arhunganim khülang arüchoh, ashikampü püpü arüchoh, lomi ching athsümünim düsheak tüsho yakzanshuhrünü yakzanshuhrü azhihkhi lah.

⁴⁷Tsükjide inü Babilon mejakbo thsümüchipü kim arüchoh; anihbe lomi abümnü achih ngübah, tüsho alaksahkhi alala anihbe bolung labah.

⁴⁸Jüdüki thüningbo tüsho alomi, tüsho jurü ching lakhi alalanü Babilon kurungkheak asühde ahobah; tümüde arü azhihde athsümünimrü dukulimnü arübah, ATUNGPUHNÜ thachoh.

⁴⁹Babilon a lomi alala laksahkhi nangde Israel laksahkhi dünkheaknü akeambah.

⁵⁰Nüsa nukshang chingnü atsokhitrübo, yüang, daleang! Limshu lomi ching ATUNGPUH lümkhitang, tüsho nüsa lüm ching Jirusalem arüshang.

⁵¹Isa achih ngüdo, tümüde mükhemürangkhi isanü sodo; achihkhinü isa miro lüpdolah, tümüde khiungkerübo ATUNGPUH yam amüsüh dangpungbo ching azahdo.

⁵²Jumonü inü anihbe sangthsübo thsümüchipü kim tsükjide arüchoh, tüsho anihbe lomi alala ching yurirünü ashearabah.

⁵³Babilonnü thüning lim yükihkih she, tüsho anihbenü chipi changde ayünyün she, I kilimnü athsümünimrü anihbe kheak arübah, ATUNGPUHNÜ thachoh.

⁵⁴Babilon chingnü azhikhi, Kaldearü lomi chingnü alanajikhi ato aniang!

⁵⁵Tümüde ATUNGPUHNÜ Babilon thsümünima yapshihlah, tüsho anihbenü changde alankhi zhikshihdo. Arü riribo apheankhi ju ke ato arungkhi nangde, arü alanajikhi düsheak alankihchoh;

⁵⁶tümüde athsümünimrü khülang Babilon azhihde arüdo; anihbe thirithsürübo luabahdo, arü sanglühbo zhaka lah; tümüde ATUNGPUH ju ashaklo Thrünpuh ah, apinü mide ajihlobah.

⁵⁷Inü anihbe torübo tüsho lümlung larübo müshangshihbah, kovünorbo she, atorübo tüsho thirithsürübo; arünü kamruhroro yapbah tüsho küyimkishe masürü, kiulongthsüpuhnü thachoh, shepü mung Wuto ATUNGPUH la.

⁵⁸Wuto ATUNGPUHNÜ ha thachoh: Babilon chipi ato ju alo arihde akambah, tüsho anihbe chipiripit achangbo monü atakbah. Mihtsürübo akeangkeang ching khichoh, tüsho trükshihbonü mo thsungkheak lang rhimochoh.

⁵⁹Juda kiulongthsüpuh Zedekia kiulongthsükhi kam phüyipü ching, api lung Maseia tsührü Neria tsührü Seraia yüchoki wukihbuh Jeremianü thiyukhüm jihkhi yu. Seraia ju kukruk-putungrü lakheah.

⁶⁰Babilon kheak arüpü lakhi thsümütsü alala, Babilon dünkheak thrütkhi yubo alala Jeremianü küpqiu kheak thrüt.

⁶¹Tüsho Jeremianü Seraia ki tha: “ Küyimki nü Babilon ching arübanü, harü yubo alala achangnü kheang,

⁶²tüsho thaang, ‘ O ATUNGPUH , nünü ha dangpung ching mihtsürü yungsho shiwüh mülapü thsüde athsümünimpü müzündo, tüsho ha lünnü azhikkhi labah.’

⁶³Küyimki nünü ha küpqiu khekhambanü, ju kheak lung rhükkihang, tüsho Euphra ayung ching jipyukang,

⁶⁴tüsho thaang, ‘ Hanangde inü anihbe kheak thsümütsü handarükhi dünkheak Babilon keamyukbah, masürülo.’ ” Ha khiungde Jeremia yubo lah.