Read Yimchungru Naga Jer 7 Bible Online

Jer 7 - Yimchungru Naga bible

Jer 7

¹Ha yu ATUNGPUH kilimnü Jeremia kilim arü:

²ATUNGPUH yam chipiripit kheak zhipang, tüsho ju ching ha yu zhiyukjang, tüsho thaang, Nüsa Juda mihtsürübo, nüsa ATUNGPUH kingaünpü ha chipiripitbo ching yüzahrübo ATUNGPUH yu aniang.

³Wuto ATUNGPUH Israel Thrünpuhnü ha thachoh: Nüsa limrobo tüsho nüsa rhimobo thsülangang, tüsho ha dangpung ching I nüsa lung laanü.

⁴Harü mülapyukbe yubo ching dükin: “Ha ATUNGPUH arüngyam, ATUNGPUH arüngyam, ATUNGPUH arüngyam.”

⁵Tümüde nüsanü atsütsünü nüsa limro tüsho rhimobo thsülangsho, nüsanü khülangnü khülang ki thiyuronü rhimosho,

⁶nüsanü khiungkerü, mürerü, tüsho khimoberü mujunosho, yungsho ha dangpung ching amülim mülarü thiyih mubukshihsho, tüsho nüsa nihbuh yuride püpürü thrünpuhbo kilim müyüsho,

⁷jude thsüsho ha dangpung inü nüsa jipürü kilim lünnü lün jihkhi lomi ching I nüsa lung labah.

⁸Kheahang nüsanü alü mülakhi akeangyubo ching kinchoh.

⁹Nüsanü ahühba de, alaksahba de, müzammüramba de, akeangyu thade thiyuchihchimba de, Baal kilim kingaünba de, tüsho nüsanü mümükheahkhi thrünpuhbo kilim yüba de,

¹⁰tüsho arübah ha yam ching I miki zhipba de, küpü I mungnü ji, tüsho harü athraneanbe lang arhimopü isa ki jihdo de athabea de?

¹¹Ha yam, I mungnü tamde ajikhi nüsa mük ki jangkhijangrarü jikpung kamdü de? Nüsanü mükheahlah, inü she kheahde lah, ATUNGPUHNÜ thachoh.

¹²Kheakü Shilo ching lakhi I lapung ching yüang, küpü ching akhuhde I mung lakhea, ju ching I mihtsürü Israel mihbukmuyuk thsungkheak tümü rhimoa lanü kheahang.

¹³Tüsho kheakü, nüsanü harü alala rhimokhinü, ATUNGPUHNÜ thachoh, tüsho küyimki inü nüsa ki alochode asukkhea, nüsanü mani, tüsho küyimki inü nüsa jikhea, nüsanü malo,

¹⁴jumonü I mung tamde ajikhi yam, küpü ching nüsanü kincho, tüsho inü nüsa le nüsa jipürü kilim jihkhi dangpung kheak, inü Shilo ching rhimokhi nangde arhimobah.

¹⁵Tüsho inü nüsa keoniorü yankhitkhi nangde Ephraim münü alala, nüsa I mikinü yankhita bahbah.

¹⁶Nünü harü mihtsürü thsungkheak dütamkhüntamnüjih, arü thsung thsüde düzhi yungsho dütamkhüntamnü, tüsho I ki dümushu, tümüde inü nü ki mani.

¹⁷Arünü Juda kiutobo tüsho Jirusalem kiudunglimrobo ching tümü rhimochonü nünü müngü de?

¹⁸Azürübonü sang momukhungchoh, buhrübonü mo takkihchoh, tüsho yinmi kiulongthsübe thsungkheak yikhap thsüpü azoberübonü ayikangkang neamchoh; tüsho arünü I bukakhiukshihde, püpürü thrünpuhbo kilim ayungbe kingaün dunga bahchoh.

¹⁹ATUNGPUHNÜ thachoh, Arünü I bukakhiukshihcho de? Arü küdah thsüde arü achih handarüchoh yung de?

²⁰Jumonü Atungpuh THRÜNPUHNÜ ha thachoh: I bukakhiukkhi tüsho I mulong zhipzhip ha dangpung kheak mihtsürü tüsho shiwühbo kheak, thulu sangdungbo tüsho alo sangasobo kheak dungkihbah, ha atakbah tüsho müzünmüt.

²¹Wuto ATUNGPUH , Israel Thrünpuhnü ha thachoh: Nüsanü shuhmülanga jihkhi ching taka kingaünkhibo yukajakang, tüsho ashihtsü tsühang.

²²Tümüde inü nüsa jipürü Ijip lomi chingnü bekhit nimung taka kingaünkhi tüsho shuhmülanga kingaünkhi dünkheak inü arü ki masuk.

²³Tüshe ha yukhüm inü arü ki jihkheah, “ I düsheak aniang, tüsho I nüsa Thrünpuh thsübah, tüsho nüsa I mihtsürü thsübah; tüsho inü nüsa ki thiyukhüm jihkhi limro ching lang tsahang, junangde nüsa tsüde alabah.”

²⁴Tütüshe arünü mihyu mani yungsho arü nükhün mumupho, tüshe arü amütsü lümkhi ching nihnihde, arü nihbuh lümrükbo ching tsah, tüsho mikhuhlim yungde dunglim peang tsah.

²⁵Nüsa jipürü Ijip lomi chingnü bekhit nimungnü khihni khiungde, inü I yamlarübo wukihrü alala, nimung abande, alochode arü kilim yüshih;

²⁶tütüshe arünü I ki mani yungsho manguh, tüshe arü hungbo chungthülangde la. Arünü arü jipürü kheaknü amütsübe rhimodo.

²⁷Junangde nünü ha yubo alala arü ki asukbah, tüshe arünü nü ki manijih. Nünü arü ki jibah, tüshe arünü nü ki malojih.

²⁸Nünü arü ki thabah: Ha ATUNGPUH arü Thrünpuh yu manikhi trükshih tüsho yakli danyukkhi müleangkhi; thiyuro dükheakdo; ha arünü müthadebah.

²⁹Nüsa ku hüta bahang; awungbo kheak tüzhoang, tümüde api bukakhiukshihkhi lün ATUNGPUHNÜ bahyukdo tüsho mihabahdo.

³⁰Tümüde Juda mihtsürübonü I miki amütsü rhimodo, ATUNGPUHNÜ thachoh; I mung tamkhi yam müneanjihde, arünü athraneanbe zodo.

³¹Tüsho arünü Hinnom Tsührü Jindükhün ching Topheth de alakhi achang dangpungbo arü tsührübo mo ching takpü thsüchoh — küpü inü arü ki thiyukhüm müjihkhea, yungsho I lüm ching marükhi la.

³²Jumonü, ATUNGPUHNÜ thachoh, Topheth de müjipü, yungsho Hinnom Tsührü Jindükhün de müjipü nimung tsükjide arado, tüshe Mihkhuk Jindükhün labah: tümüde khiungshak mülayi khiungde ju ching arü kiuyuka bahbah.

³³Ha mihtsürü mibo ju thüning wuhnubo tüsho alomi shiwüh jim thsübah; tüsho shenü arü müzüna mutsoshih.

³⁴Tüsho inü asühachih tüsho asühara düsheak, yamkhün kamkhi thünio düsheak, Juda kiutobo tüsho Jirusalem kiudunglimrobo ching akheam thsüshihbah; tümüde alo thsümünimbah.