Read Yimchungru Naga Jer 8 Bible Online

Jer 8 - Yimchungru Naga bible

Jer 8

¹ATUNGPUHNÜ thachoh, ju kim ching Juda kiulongthsürü robo, atorü robo, amükeamrü robo, wukihrü robo, tüsho Jirusalem ching larü robo nihbuh kiuyuk chingnü ayihkhitbah;

²tüsho arübo ju ani le khinu tüsho arünü muzhode tankihkhi, yande tüsho keokhide kingaünkhi chiningbo miki hiumüzüta labah; tüsho arü mühanmukhung yungsho kiuyuka mübah; arübo ju alo kheak bahyakkhi nangde alabah.

³Jushu inü yanmüzüta lakhi dangpung ching lakhi amütsü yamkhün aningkhibo alalanü rhangdung lapü yungde ashepü mürühbah, Wuto ATUNGPUHNÜ thachoh.

⁴Nünü arü ki thabah, ATUNGPUHNÜ ha thachoh: Küyimki mihtsürü lungbanü, arünü alode masürücho de? Arünü limdungmihsho murholocho de?

⁵Dale küde ha mihtsürünü murholo tsantsande tsoa la? Arünü akeangyu kheak düküngde ramrihdo, arünü arholopü reanglodo.

⁶Inü anguhlo tüsho ani, tüshe arünü thiyuro masuk; shenü she mihbukmuyuk chingnü mulong müthride, “ Inü tümü rhimokhea!” de mütha. Khora khülang thirithsü ching rande ayükhi nangde arü alala nihbuh limro ching rholodo.

⁷Thüning ching kewuhnunü she kim mükheahlah; tüsho müthrithrümpü, tsütsüpü tüsho kiurürütnü arü arüpü kim mükheahlah; tüshe I mihtsürübonü ATUNGPUH yuzüng mümükheah.

⁸Athrütrü yo dosangnü akeangyu kamshihchoki, “ Isa lümlung lah, tüsho ATUNGPUH yakzan isa lung lah,” de küde thsah nüsanü thakhukpü?

⁹Lümlung larü achih ngüshihbah, arübo ayingyingbah tüsho aphuhbah; tümütüsho arünü ATUNGPUH yu bahyuk, arü kheak tümü lümlung la?

¹⁰Jumonü inü arü niuberübo püpürü kilim jihbah tüsho arü lubo akukrü kilim jihbah, tümütüsho aninikhühnü atobe khiungde mihbüm abannü thiyuro mülakhi alü thsüpü bukmükhütlah; wukihrünü amükeamrü khiungde thiyuro mihbüm abannü mülimde rhimochoh.

¹¹Arünü I mihtsürübo mü anükhüh lang thsüngujihde mungtsü mülachoki “Mungtsü, mungtsü,” de tha.

¹²Arünü machihde rhimodo, arünü athraneanbe yihbeak; tütüshe judü lang machih, arünü achihpüyak mümükheah. Jumonü sherü angakchonü ju lung arü angakbah; inü arü thsümüchichoki, arü akeamkhamshihbah, ATUNGPUHNÜ thachoh.

¹³ATUNGPUHNÜ thachoh, inü arü bemukhungpü lümchoki, kurungasoliu kheak kurungaso müla, yungsho khubasodung kheak khubaso müla; ayübo she yiuh-a lah, tüsho inü tümü arü ki jihkheanü arü kheaknü luakhindo.

¹⁴Tümüde isa kheakü khiungde binla? Rukhüh mukhungang, isanü chipi ayünkhi kiuto ching yüzahanü, tüsho ju ching dükheakanü; tümüde ATUNGPUH isa Thrünpuhnü isa dükheakshihpü akhuabahdo, tüsho müzüm ke ayungpü jihdo, tümütüsho isanü ATUNGPUH azhihde neak yihbeakdo.

¹⁵Isanü mungtsü thsungkheak kheahchoh, tüshe tümü atsü müngü, athsüngupü kim kheahchoh, tüshe ju müthri atrebe lah.

¹⁶Khorabonü sheak thsükhi Dan chingnü solah; arü khorapungbo khungkhinü alomi alala ajanchoh. Lomi tüsho ju ching lakhi alala, kiuto tüsho ju ching larü thsümünimpü arü arüdo.

¹⁷Kheahang, inü nüsa bolung phurutobo, mümünitkhukbe lokung phurutobo dükhechoh tüsho arünü nüsa mukiubah, ATUNGPUHNÜ thachoh.

¹⁸I mulong rozhak müthsüngukhuk, I mulong ching sheshichoh.

¹⁹Aniang, limshu tüsho amülih lomi ching amuzhobe mihtsürünü azhikhi: “ATUNGPUH Zion ching müla de? Anihbe kiulongthsüpuh kheaküa ju ching müla de?” ( “Tümüde arünü arü sangthsübo, arü khiungkerü sangthsübo kheak I bukakhiukshihkhea?”)

²⁰“ Yimlupü hodo, muzhu akheam thsüdo tüshe isa mükhümkhitde lah.”

²¹Tümüde amuzhobe I mihtsürü yurikhinü I yuria lah, inü tüzhochoh, tüsho amüyinnimkhinü I tholobah lah.

²²Gilead ching moli müla de? Ju ching thümürü müla de? Dale tümüde amuzhobe I mihtsürü shihphü müthsüngukhea?