Read Yimchungru Naga Tüzhokhi 1 Bible Online

Tüzhokhi 1 - Yimchungru Naga bible

Tüzhokhi 1

¹Khülang ki mihtsürünü mia lakhi kiuto küdükhüh zhikrangkhündo yapla! Künangde anihbe khimoberü nangde kama la, trükshih bolung anihbe ato lakheah! Anihbe lomi bolung ching kiulongthsürü lakhi azhorü kamdo.

²Anihbenü azhing ching, anihbe ngobo kheak chikebo bukde düsüknimde tripchoh; anihbe muzhorü bolung anihbe shukheamrü she müla; anihbe müyamrü alalanü anihbe ki mülapyukde rhimodo, arübo anihbe riribo kamdo.

³Juda a thsünüde tüsho achakato azhorü thsüde ramtso ching yüdo; kheakü anihbe trükshih bolung lah, tüsho sühakhim dangpung müngü; anihbe lümthsünü phulung ching anihbe müshamrünü yanphuhdo.

⁴Zion limrobo tüzhochoh tümüde thünio ching shenü marü; anihbe chipiripit alala zhika lah, anihbe amükeamrübo ashechoh; anünürübonü mulong rozhakchoh tüsho anihbe thsünü akhüh ching lah.

⁵Anihbe riribo aputungrübo kamdo, anihbe riribo thsü-tsüde lah, tümütüsho anihbenü thsümünimkhi hihdakmonü ATUNGPUHNÜ anihbe thsünüshih; anihbe tsührübo tsoabahdo, thiri miki aramrübo ah.

⁶Zion tsührübe kheaknü wüntre-müretah alala chamachihdo. Anihbe yakzanshuhrübo rimlopung müngükhi shihmüchipungbo nangde kamdo; arünü sühmüh mülade amüshamrü müngüh tsodo.

⁷Anihbe thsünüde rümde atsahchoki adüso nimungbo ching anihbe shoto kukruk alala Jirusalemnü lümkhitchoh. Küyimki anihbe mihtsürü thiriri khah ching yüzahkhea, tüsho anihbe rungpü she mülakhea, thiririnü anihbe keamkhi kheahbah münejih.

⁸Jirusalemnü tode neak yihbeakdo, jumonü anihbe amümüsüh kamdo; anihbe wüntre jihrü alalanü anihbe mükhemürangchoh, tümüde arünü anihbe bünkeang ngüdo. Anihbe ashechoh tüsho miro anguhde tsochoh.

⁹Anihbe mümüsühkhi ju rungthsün kheak lakheah; anihbenü arübe thsungkheak mülümakheah; anihbe keamkhi atrebe lakheah, shenü anihbe mushukheam. “ O ATUNGPUH , I thsünükhi kheak kheahang, tümüde thiririnü kukdo!”

¹⁰Thiriribonü shoto kukrukbo alala kurungkheak arü khahbo shuhkihdo; nünü nü borü lung yüzahpü mümülükhi trükshihbonü arüngyam ching yüzahkhi she anihbenü ngüdo.

¹¹Anihbe mihtsürü alala yikhap yimde ashechoh; arünü tsühyungpü thsungkheak arü rahpungbo arü sühmüh dükünglopü yinzüyindochoh. Kheahang, O ATUNGPUH , tüsho I küdükhüh bahyuka lanü lümakheahang.

¹²Nüsa I tsahhorübo alala, nüsa ki tümü müla de? Mürüngang tüsho kheahang, mulong rozhakkhi khürü I nangde la shi, küpü I kheak hande arükhea, küpü ATUNGPUHNÜ api bukakhiuk nimung I thsümüchikhea.

¹³Achang kheaknü apinü mo arüshih; ha I robo ching sükde yüzahdo; apinü I jing thsungkheak keang zünga zo; apinü I ashitloshih; apinü I zhikabahshih, nimung amuyung shekhia lashih.

¹⁴Inü alakmihkhi sangkaplakbo api khahnü thsünru; jurübo I hung kheak nokih, I sühmüh keakeashih; inü azhihde müzhipkhukrü kilim ATUNGPUHNÜ I jih.

¹⁵ATUNGPUHNÜ I lung lakhi thirithsürübo alala bahyuk; apinü I azhihde I mihtsürü athunubo zünakpü kim khülang zhiyuk; ATUNGPUHNÜ yukhu nitpung nangde atsangkhit Juda tsührübe jungnakdo.

¹⁶Harü thsungkheak inü tripchoh; I mükbo ching chike bukchoh; tümüde ashukheamrü khülang I rhangdung thsakhampü I kheaknü limshude lah; I tsührübo thsümünima lah, tümüde thiririnü kukdo.

¹⁷Zionnü akhahbo chungkhitchoh, tüshe anihbe shukheamrü she müla; ATUNGPUHNÜ Jakob azhihde thiyukhüm jihdo, junangde api yamhingrübo anihbuh riri kambah; arü bolung Jirusalem a amüneankhi kamdo.

¹⁸ATUNGPUH alungki ching lah, tümüde inü api yu azhihdo; tüshe aniang, nüsa mihtsürü alala, tüsho I thsünükhi kheahang; I yo anünürü tüsho athrününgtsüng mihtsürübo aramkhi ching yüdo.

¹⁹Inü I muzhorübo ki ji tüshe arünü I mülapyuk; I yo amükeamrü tüsho azothsürübo arü sühmüh dükünglopü tsühyungpü yimchoki kiuto ching dükheakdo.

²⁰Kheahang, O ATUNGPUH , I küdükhüh lümthsünüla; I me thsünülah, I mulong rhothünakchoh, tümütüsho inü khide azhihde alakheah. Kiudunglimrobo ching nukshangnü laksahchoh; thüyam ching ashekhi lah.

²¹I ashearakhi arünü sodo, shenü I mushukheam. I riribo alalanü I küpkhuk sodo; nünü ha rhimokhinü arü asühchoh. Nünü alokhikhi nimung hande arang tüsho arü she I ruk lashang.

²²Arü rhimo atsü alala nü miki arüshang; tüsho inü alakmihkhi alala dünkheak nünü I ki rhimokhi nangde arü ki rhimoang; tümüde I ashearakhi hihlah tüsho I mulong shekhia lah.