Read Yimchungru Naga Tüzhokhi 4 Bible Online

Tüzhokhi 4 - Yimchungru Naga bible

Tüzhokhi 4

¹Künangde suna thsü müwado kama la, künangde suna müthsün thsü müthria la! Amüsüh lungbo kiudunglimro aban ching hiumüzüta yaplah.

²Zion tsührübo shoto, adünkhi atsüdak suna thülünlah — künangde arübo alo phühbo nangde khejihde, phühdamrü khahnü arhimokhi la!

³Shirungbonü she arü nunu kilim niuh duhchoh tüshe I mihtsürü a bukmükede kamdo, sunglo ching kewühtopübo nangde lah.

⁴Kethürikhinü khungarü mulo khülüh kheak dakkihchoh; azürübonü tsühyungpü kheangchoh, tüshe arü kilim shenü tümü müjih.

⁵Tsühyungpü atsüdak tsührübo kiudunglimrobo ching dükheakchoh; Lalim tsükhi ching mütrümusurü kheaküa awah mujung kheak yaplah.

⁶Tümüde arungrü khah mülade sühkhüh kheaknü akeamkhi I mihtsürübo thsümüchi ju Sodom kheaknü atobe ah.

⁷Anihbe yakzanshuhrübo phürüm kheaknü ayinbe, niuhke kheaknü amüyebe lakheah; arü pangbo mürümmuchu kheaknü alü mürümmüride, arü kuyü shotolung-bluk nangde alakheah.

⁸Kheakü arü shihphü ju mütreang kheaknü amürakbe; arübo kiudunglimrobo ching mükheahkhit, arü küpbo ro kheak dakkih-a lah; sang nangde kunga lah.

⁹Nukshangnü alaksahrü ju akhümnü asherü kheaknü khatsübe lakheah, akhümkhinü rungkheamabah, arübo thulu ching tsühyungpü mülakhinü mukuhsah.

¹⁰Mihmuzhokhi azoberü khahbonü arü nihbe tsührübo ngüp; I mihtsürü thsümünimkhi ching arübo ju arü tsühyungpü kam.

¹¹ATUNGPUHNÜ abukakhiukkhi dünjishih; apinü bukakhiukkhi thurukhit tüsho Zion ching mo takkih, junü akhimtanbo aniuabah.

¹²Alomi kiulongthsürübonü yungsho alomiküp ching larü shenü she Jirusalem chipiripitbo ching thiriri yüzahkhukbah de mükin.

¹³Ha anihbe wukihrü neakbo tüsho anihbe amükeamrü mülimkhibo, thiyuro-lungkirü thiyih bukshihkhi hode alakheah.

¹⁴Arünü mük tukbah kiudunglimrobo ching ajamde tsah, shenü arü khimmih müqiukhukpü thsüde thiyihnü khide münean.

¹⁵Mihtsürübonü arü ki zhi, “Tsoabahang! Nüsa mümüsüh!” “Tsoabahang! Tsoabahang! Isa düqiu!” Küyimki arübo tsode tüsho rümde alakhea, trükshih bolung mihtsürübonü tha, “Arübo kheaküa ha ching mülakhuk.”

¹⁶ATUNGPUHNÜ aküdah thsüde arü hiumüzütshih, apinü arü kheaküa mükheahyuk; amükeamrübo ki wüntre tümü muhuh, azothsürübo ki amuzho tümü müla.

¹⁷Arung thsungkheak akeangkeang ching kheahkhinü isa mük keahdo; isanü isa aheangsadambo kheaknü isa mükhümkhitkhukpü lakhi trükshih kheahde alakheah.

¹⁸Arünü isa jingdükü aban phükih, junangde isanü kiudunglimrobo ching mütsahkhuk; isa akheam phünide kam; isa nimungbo kheabah; tümüde isa akheam arüdo.

¹⁹Isa müshamrübo ju thüning ching müleangbo kheaknü athribe lakheah; arünü isa müzüngbo kheak yande müsham, arünü sunglo ching isa aleangde bin.

²⁰ATUNGPUHNÜ mujude-mokhitkhi, isa rhangdung sheak arü alokhünbo ching hande yü — shepü dünkheak isanü tha, “Api alamme khüpnü trükshih bolung isa labah.”

²¹Nüsa sherü Uz lomi ching lanü asühachihang tüsho asühang, O Edom tsührübe; tüshe nü kilim she pung arübah; nü amüshangbah tüsho nü bünkeang kambah.

²²O Zion tsührübe, nü thsümüchi arün thsübah; apinü nü ramtso muruhshih. Tüshe, O Edom tsührübe, apinü nü thsümüchibah tüsho nü neak lahkhitbah.