Read Yimchungru Naga Ezk 1 Bible Online

Ezk 1 - Yimchungru Naga bible

Ezk 1

¹Kam samrüpü, khinu phüyi ching, nimung phüngü nipü, I Kebar Ayung ki ramtsorü bolung lachoki, yinmibo khimshuhkhi inü ngü, tüsho inü Thrünpuh michihbo ngü.

²Ju khinu nimung phüngü nipü (ha kiulongthsüpuh Jehoiakin ramtsokhi kam phüngüpü lakheah),

³Kebar Ayung ki Kaldearü lomi ching, Buzi tsührü amükeambuh Ezekiel kilim ATUNGPUH yu arü; tüsho ju ching ATUNGPUH khah api kheak lakheah.

⁴Inü kheah, tüsho dukulim tsüngpungtsüngpung khülang arükhi ngü — amo ato ching chinchobe phürapde tüsho atahkihkhi ayinnü mükamdoa lakheah. Aphulungbe mo ju müwayinchi taklamlamkhi nangde lakheah,

⁵tüsho mo ching ju arhang shiwüh phüyi nangde kheah. Arü shihphü ju mihtsürü khülang nangde,

⁶tüshe arü mihbüm abande miro phüyi tüsho ghidükeang phüyi lakheah.

⁷Arü jingbo ju chungthülangdo alakheah; arü müphübo ju moshi nunu biuo nangde tüsho müwayinchi rakrakkhi nangde rakrak alakheah.

⁸Arü thrip phüyi kheak arü ghidükeang khüp ju mihtsürü khahbo lakheah. Arü phüyi alala mirobo tüsho ghidükeangbo lakheah,

⁹tüsho arü ghidükeangbonü khülangnü khülang kheak qiuachih. Mihbüm aban mikhuhlim langde yü; arü aphapchoki arünü murholo.

¹⁰Arü miro kheahpü ju ha ruk: Phüyi abande mihtsürü miro lakheah, tüsho tsülim thrip abande kekhüzü miro, tüsho huzulim thrip moshipung miro lakheah; kheaküshe abande müleang miro lakheah.

¹¹Ha ruk arü mirobo lakheah. Arü ghidükeangbo mutuhlim chutreaka lakheah; arü abande ghidükeang mahne, khülangnü püpü shiwühbo ghidükeang thrip aban qiu, tüsho ghidükeang mahnenü pangbo lüpdo.

¹²Arü chidonü mikhuhlim langakindo yü. Kürü ching me yübanü arünü manguhphülapde yü.

¹³Arhang shiwühbo jakphü ju mokhih aniukhi yungsho tsün nangde alakheah. Monü shiwüh bolung dunglim tüsho müngüh yüla arülade alakheah tüsho mo chingnü chinchobe akhiuk.

¹⁴Shiwühbonü chinchobe phürapkhibo nangde dunglim tüsho müngüh yungdüyü yunglodarü de thsü.

¹⁵Inü arhang shiwühbo kheak kheahchoki, shiwüh phüyi aban rheang ki lolungbe-jing alo kheak dubiuoa lakhi shiwühbo inü ngü.

¹⁶Lolungbe-jing akheahpü tüsho apang ha lakheah: Jurü ju shotolung nangde rakrak la, tüsho phüyi alala akheahpü rukhüh, lolungbe-jing mükhapachih-a alakheah.

¹⁷Junangde lolungbe-jingbonü thrip phüyi ching yükhukde alakheah.

¹⁸Arü phuhphobo ju achang tüsho atrebe, tüsho phuhpho phüyi alala mükamde mükjibo kih.

¹⁹Küyimki arhang shiwühbonü aphapkheanü, arü rheang ki lolungbe-jingbonü hean; tüsho küyimki arhang shiwühbonü alo kheaknü wusurükheanü, lolungbejingbo she wusu.

²⁰Kürü ching me yükheanü, arünü yü, tüsho lolungbejingbonü arü lung wusu, tümütüsho shiwühbo me ju lolungbe-jingbo ching lakheah.

²¹Küyimki shiwühbonü aphapkheanü, arü she aphap; küyimki shiwühbo zhikde azhipkhea, arü she zhikde zhip; tüsho küyimki shiwühbo alo kheaknü asürübanü, lolungbe-jingbo she arü lung wusu, tümütüsho shiwühbo me ju lolungbe-jingbo ching lakheah.

²²Arhang shiwüh kubo kumung kheak akheahpü ju adüthrün nangde, müsanglung nangde zhingzhing, tüsho atrebe lakheah.

²³Adüthrün khüp ju arü ghidükeangbo chutreak, tüsho mihbüm aban apang lüpdokhi ghidükeang mahne lakheah.

²⁴Küyimki shiwühbo aphapkhea, inü arü ghidükeangbo, ke bukkhi, Wuto düsheak, bonungrü adanasünkhi nangde so. Küyimki arü zhikde azhipbanü, arünü arü ghidükeangbo keamkhi.

²⁵Judüki arü ghidükeang keamkhia lachoki arü ku kumung thüning kumungnü düsheak khülang arü.

²⁶Arü ku kumung thüning kumung lakhi ju shotolung-bluk kiulongthsü-binkiu nangde lakheah, tüsho kiulongthsü-binkiu kumung achang kheak ju mihtsürü jak nangde alakheah.

²⁷Jakphü ju mo phulung zhingzhingkhi müwayinchi nangde alakheah. Junü alala ching zhingzhingde yinshih.

²⁸Tsüng arükhi nimung amo ching mürechin nangde, ju mükamde ayin-zhingzhing lakheah. Ha ATUNGPUH müretah akhiukkhi lakheah. Küyimki inü angükhea, inü I miro koyu tüsho khülangnü asukkhi düsheak inü so.