Read Yimchungru Naga Ezk 10 Bible Online

Ezk 10 - Yimchungru Naga bible

Ezk 10

¹Inü kheah, tüsho cherubim kubo kurungkheak adüthrün kumung ju shotolung-bluk kiulongthsü-binkiu nangde ngü.

²ATUNGPUHNÜ khim zhingzhing phuyubuh mihtsürü ki tha, “Cherubim khüp lolungbe-jingbo lung yüzahang. Cherubim bolung ching mokhih takkhi ching nü khahbo athsoyukang tüsho jurübo kiuto kumung hiumüzütang.” Tüsho inü akheahchoki, api yüzah.

³Mihtsürü yüzahchoki cherubimbo ju arüngyam düjinglim zhipde alakheah, tüsho amonü alungbe khikzhakpung mi.

⁴Judüki ATUNGPUH müretahkhi cherubim kumungnü wusu tüsho arüngyam ripit ki yü. Amonü arüngyam mide kam, tüsho ATUNGPUH müretahkhi zhingzhingnü khikzhakpung mide alakheah.

⁵Cherubim ghidükeangbo düsheak ju Wuto ATUNGPUHNÜ asukchoki düsheak nangde, khikzhakpung aleangbe limshu chingnü so.

⁶Küyimki ATUNGPUHNÜ khim zhingzhing phuyubuh mihtsürü ki thiyukhüm jihkhea, “Cherubim bolung, lolungbe-jingbo chingnü mo luang,” mihtsürü junü yüzah tüsho lolungbe-jing khülang ki zhip.

⁷Judüki cherubim khülangnü arü bolung lakhi mo kilim akhah chungkhit. Apinü khürü lu tüsho khim zhingzhing phuyubuh khah ching yukjihbah apinü ju lu tüsho wukhiuk.

⁸Cherubim ghidükeangbo khüp ju mihtsürü khahbo nangde alakheah.

⁹Inü kheah, tüsho cherubim aban rheang ki lolungbe-jing phüyi ngü; lolungbe-jingbo ju shoto zhingzhing nangde rakrak alakheah.

¹⁰Arü shihphü ju, arü phüyi akheahpü rukhüh lakheah; arü abande mükhapachihkhi lolungbe-jing nangde lakheah.

¹¹Arü aphapchoki, cherubim abinkhi thrip khülang lim yü; cherubim yüchoki lolungbe-jingbonü münihlo. Cherubimnü manguhlodü lang ku anguh limpeang yü.

¹²Pangbo alala, arü düthsünbo bede, arü khahbo tüsho arü ghidükeangbo tüsho lolungbe-jingbo mükjibonü mide alakheah.

¹³Inü ajingbonü ajikhi so, “Aheankhi lolungbejingbo”.

¹⁴Cherubim abande miro phüyi lakheah: Khülang miro ju cherub nangde, mahnepü ju mihtsürü miro, mahsampü ju kekhüzü miro, tüsho phüyipü ju müleang miro lakheah.

¹⁵Judüki cherubimnü akulim wusurü. Harü ha Kebar Ayung ki inü angükhi arhang shiwühbo lakheah.

¹⁶Küyimki cherubim aphapkheanü, arü rheang ki lolungbe-jingbo aphap; tüsho cherubimnü alo kheaknü asürüpü arü ghi chutreakchoki, lolungbe-jingbonü arü lung yü.

¹⁷Küyimki cherubim zhikde azhipkhea, arü she zhikde zhip; tüsho küyimki cherubim wusukhea, arünü arü lung wusu, tümütüsho arhang shiwühbo me arü kheak lakheah.

¹⁸Judüki arüngyam ripit kinü ATUNGPUH müretahkhi chamachih tüsho cherubim kumung tuklo.

¹⁹Inü kheahde lachoki, cherubimnü arü ghidükeangbo chutreak tüsho alo kheaknü wusurü, tüsho arü yüchoki, lolungbe-jingbo arü lung yü. Arünü ATUNGPUH yam aniakhiuklim chipiripit limro kheak tuklo, tüsho Israel Thrünpuh müretahkhi arü kumung lakheah.

²⁰Harü ha Kebar Ayung ki Israel Thrünpuh bukkhüp inü angükhi arhang shiwühbo lakheah, tüsho arü ju cherubim thsüa lah de inü mükheahdo.

²¹Arü aban miro phüyi tüsho ghidükeang phüyi lakheah, tüsho arü ghidükeangbo khüp ju mihtsürü khah nangde lakheah.

²²Arü mirobo ju inü Kebar Ayung ki ngükhi nangde rukhüh lakheah. Arü abannü mikhuhlim langakindo yü.