Read Yimchungru Naga Ezk 12 Bible Online

Ezk 12 - Yimchungru Naga bible

Ezk 12

¹ATUNGPUH yu I ki arü:

²Mihtsürü tsührü, nü azhih mihtsürü bolung lachoh. Arübo angüpü mükbo lah tüshe müngü tüsho asopü nükhünbo lah tüshe muso, tümüde arübo azhih mihtsürü ah.

³Jumonü, mihtsürü tsührü, ramtso thsungkheak nü kukrukbo tsanglungang tüsho animuro kim ching arünü akheahchoki tsahmusuang tüsho püpü lim yüang. Arübo azhih mihtsürü thsüthsü she, khükijua arünü anikhitbah.

⁴Animuro kim ching arünü akheahchoki, ramtso thsungkheak nü kukrukbo lude akhiukang. Jushu arelim, arünü akheahchoki, ramtso ching yürü nangde wukhiukang.

⁵Arünü kheahde lachoki, chipi chingnü rhümashungang tüsho ju chingnü nü kukrukbo lukhitang.

⁶Arünü kheahde lachoki jurübo nü dubuh kheak yihkihang tüsho shuhyini ching hankhitang. Nü miro lüpdoang, junangde nünü alomi müngükhuk, tümüde inü Israel yamkhün ki nü amütsan khülang thsüjihdo.

⁷Junangde I ki thiyukhüm jihkhi nangde inü rhimo. Ramtso thsungkheaknü animuro inü I kukrukbo düma lubah akhiuk. Jushu arelim chipi ching I khahnü rhümashung. Arünü akheahchoki inü I kukrukbo animuro I dubuh kheaknü shuhyini ching hankhit.

⁸Yapsu ATUNGPUH yu I kilim arü:

⁹Mihtsürü tsührü, Nü tümü thsücho de azhih Israel yamkhünnü nü ki mükeokhi de?

¹⁰Arü ki thaang, Wuto ATUNGPUHNÜ ha thachoh: Ha müchityu ha Jirusalem ching yakzanshuhrübo tüsho ju ching larü Israel yamkhün athrünkhi dünkheak lah.

¹¹Arü ki thaang, “ I nüsa ki amütsan khülang lah.” Inü rhimokhi nangde, ju arü ki rhimobah. Arübo ramtso ching aramrü nangde ayübah.

¹²Arü bolung yakzanshuhrünü shuhyini ching nihbuh kukruk dubuh kheak yihkihbah tüsho atsobah, tüsho api hode atsopü chipi ching rhümashungbah. Apinü alomi müngükhukpü thsüde amiro lüpdobah.

¹³Inü api thsungkheak keang zobah, tüsho I qimürip ching api phuhbah; inü api Kaldearü lomi Babilon ching handarübah, tüshe apinü ju müngükhuk, tüsho api ju ching shebah.

¹⁴Api mühide alarü atorübo tüsho api rithsürü alala apung ching müzütshihbah tüsho nukshang dukkhitbah inü arü müshambah.

¹⁵Inü arübo trükshih bolung tüsho lomibo ching müzütshihchoki I ATUNGPUH de arünü mükheahbah.

¹⁶Tüshe inü arübo nukshang, khümzung tüsho arüm chingnü aningshihbah, junangde arü yüpung trükshihbo alala ching arünü athranean rhimobo mütsanbah. Jushu arünü I ATUNGPUH de mükheahbah.

¹⁷ATUNGPUH yu I ki arü:

¹⁸Mihtsürü tsührü, nü jim tsühchoki ajanang, tüsho nü ke yungchoki trede niukang.

¹⁹Lomi mihtsürü ki thaang: Jirusalem ching larü tüsho Israel lomi ching larü dünkheak Wuto ATUNGPUHNÜ ha thachoh: Arünü trechihtreande jim tsühbah tüsho adükheakkhi ching ke yungbah, tümüde ju ching larünü thsümünimkhi dünkheaknü lüpdükhi arü lomi chingnü akheamshihbah.

²⁰Mihtsürü lakhi kiutobo thsümünima yapbah tüsho lomi zhikrangkhündo alabah. Judüki I ATUNGPUH de arünü mükheahbah.

²¹ATUNGPUH yu I ki arü:

²²Mihtsürü tsührü, Israel lomi ching müchitkhi ha tümü a: “ Nimungbo hokhamchoh tüsho michih aban tümü mülakhi kamchoh?”

²³Arü ki thaang, “ Wuto ATUNGPUHNÜ ha thachoh: Ha müchitkhi inü akheam thsüshihbah, tüsho arünü kheaküa Israel ching ha müchityu mütha.” Arü ki thaang, Michih aban dünjipü nimungbo thüninde lah.

²⁴Tümüde Israel mihtsürü bolung arükchih michihbo yungsho bephülapbe müchitbo kheaküa mülade alabah.

²⁵Tüshe inü tümü lümbanü, I ATUNGPUHNÜ asukbah, tüsho ju muzhomade adünjibah. Tümüde nü nimungbo ching, O azhih yamkhün, inü tümüpürü thachonü inü adünjishihbah, Wuto ATUNGPUHNÜ thachoh.

²⁶ATUNGPUH yu I ki arü:

²⁷Mihtsürü tsührü, Israel yamkhünnü thachoh, “Apinü angükhi michihbo kam ahihdo thsungkheak lah; apinü kim ashangbo thsungkheak müchitchoh.”

²⁸Jumonü arü ki thaang, Wuto ATUNGPUHNÜ ha thachoh: I yubo khülang she muzhoma; inü tümüpürü thachonü adünjibah, Wuto ATUNGPUHNÜ thachoh.