Read Yimchungru Naga Ezk 13 Bible Online

Ezk 13 - Yimchungru Naga bible

Ezk 13

¹ATUNGPUH yu I ki arü:

²Mihtsürü tsührü, müchitrü Israel wukihrü azhihde müchitang. Arü nihbuh lümkhi chingnü müchitrü ki thaang: “ATUNGPUH yu soang!”

³Wuto ATUNGPUHNÜ thachoh: Nihbuh me yanrü makharü wukihrü tüsho tümü müngürü ayokhe!

⁴O Israel nü yo wukihrübo, kiuto thsümünimkhi ching shirungbo nangde lah.

⁵ATUNGPUH nimung keochih ching düküngde azhippü thsüde nüsanü chipi zhakkhibo ching Israel yamkhün thsungkheak thsülopü muwutu.

⁶Arü michihbo arükchih tüsho arü müchitkhi akeangyu. ATUNGPUHNÜ arü müthiyide thachoh, “ATUNGPUHNÜ thachoh”; tüsho arü yu dünjipü arünü mükkin thsüchoh.

⁷Inü masuka lalashe, nüsanü, “ATUNGPUHNÜ thachoh” de athachoki arükchih michihbo tüsho akeangyu müchitkhibo nüsanü müngü de?

⁸Jumonü Wuto ATUNGPUHNÜ ha thachoh: Nüsa amülim yubo tüsho akeangyu michihbo hode, inü nüsa azhihchoh, Wuto ATUNGPUHNÜ thachoh.

⁹Arükchih michihbo ngürü tüsho akeangyu müchitrü wukihrübo kheak I khahnü azhihbah. Arübo I mihtsürü kiuthsü-binkiu lung mübe yungsho Israel yamkhün thrütlangkhi ching mübe, yungsho Israel lomi ching müyüzah. Judüki I Wuto ATUNGPUH de nüsanü mükheahbah.

¹⁰Tümütüsho arünü I mihtsürü bephülapde mungtsü mülachoki, “Mungtsü” de thachoh, tüsho chipi niukniukde athsüchoki arünü ju amüyenü mujudo.

¹¹Amüyenü mujudorü ki ha akeambah de thaang. Tsüngnü düchi bede arübah, tüsho akingbeakshihpü arulung akishihbah, tüsho apung amüküpnü yünbeakshihbah.

¹²Küyimki chipi keambanü, Nüsanü amüyenü mujudokhi küching la de nüsa ki mükeoba de?

¹³Jumonü Wuto ATUNGPUHNÜ ha thachoh: I mulong zhipzhip ching inü apung amüküp tüsho I bukakhiukkhi ching arulungbo dükhebah tüsho tsüng ju düchibo bede athsümünimpü thsüde arübah.

¹⁴Nüsanü amüyenü mujudokhi chipi thokheambah tüsho alo kheak arih-a yapshihbah, junangde akhimtan lung aleangkheak labah. Küyimki ju keambanü ju ching nüsa dükheakbah; tüsho I ATUNGPUH de nüsanü mükheahbah.

¹⁵Jumonü inü chipi azhihde tüsho amüyenü mujudorü azhihde I mulong zhipzhipbah. Inü nüsa ki thabah, Chipi tüsho ju amüyenü mujudorü tsoabahdo —

¹⁶Israel wukihrü sherübonü Jirusalem ki müchitkhea tüsho mungtsü mülachoki mungtsü michih ngükhea, Wuto ATUNGPUHNÜ thachoh.

¹⁷Mihtsürü tsührü, kheakü nü mihtsürü tsührübebo arü lümkhinü müchitrü azhihde nü miro abinang. Arü azhihde müchitang

¹⁸tüsho thaang, Wuto ATUNGPUHNÜ ha thachoh: Mihtsürü phuhpü thsüde aliberü sherünü arü khujuh-khim alala kheak wurük thürekihcho tüsho aphuaphu ashangshang kudukiube thsüchonü ayokhe. Nüsanü I mihtsürü rhangdungbo phuhba de tüsho nüsa nihbe a küma zoba de?

¹⁹Barli müyikhüh tüsho yikhap dütrekhüh dün nüsanü I mihtsürü bolung I müneanjihdo. I mihtsürü ki akeangyu thaa anishihde, nüsanü müshepü larü laksahdo tüsho mülapü larü lashihdo.

²⁰Jumonü Wuto ATUNGPUHNÜ ha thachoh: Wuhnubo nangde nüsanü mihtsürü phuhkhi nüsa wurükbo kheak inü azhihchoh tüsho inü jurübo nüsa bin kheaknü thokhibah; nüsanü wuhnubo nangde aphuhkhi mihtsürübo inü dükhebah.

²¹Inü nüsa kudukiubebo rukrüpbah tüsho nüsa khah chingnü I mihtsürü khümkhitbah, tüsho arübo kheaküa nüsa wu khüp atsühbe-shih müthsü. Judüki I ATUNGPUH de nüsanü mükheahbah.

²²Nüsa akeangyubo hode inü müyuripü lümkhi mihtsürü atsü mulong ninishih. Nüsanü mihtsürübo amütsü tuklopü tüsho arü rhangdung khümkhitpü chingnü zhipdo.

²³Jumonü kheaküa nüsanü arükchih michihbo müngü yungsho müchitmürabe müthsü. Nüsa khah chingnü inü I mihtsürü khümkhitbah. Tüsho judüki I ATUNGPUH de nüsanü mükheahbah.