Read Yimchungru Naga Ezk 16 Bible Online

Ezk 16 - Yimchungru Naga bible

Ezk 16

²Mihtsürü tsührü, Jirusalem ki athraneanbebo mükheahshang

³tüsho thaang, Ha Wuto ATUNGPUHNÜ Jirusalem ki thachoh: Nü lamih tüsho nü zübekhi ju Kananrü lomi ching lakheah; nü buh ju Amorrü tüsho nü be ju Hitrü lakheah.

⁴Nü zübe nimung nü phülekhuh liu münipshak, yungsho kemümüyihjih, yungsho thiminü münan yungsho khimbo ching mühing.

⁵Shenü muzhode nü mükheah yungsho nü thsungkheak harü khürü rhimopü mihmuzho müla. Ju müthri, nü ju thulu mükeak ching bahkheah, tümüde nü zübe nimungnü nü kheahmüchih.

⁶Judüki I hode yü tüsho nü thiyih ching nünü mükhede ngü, tüsho nü thiyih ching nü yapde lachoki nü ki inü tha, “ Laang!”

⁷Thulu sangrung nangde inü nü toshih. Nü zokih tüsho zoban tüsho khide akheahakhamde kam. Nü treangbo duduh tüsho nü nam chin tüshe nü bünkeang tüsho aleangkheak lakheah.

⁸Ju dunglim I hode yü, tüsho nü kheak kheah; nü ju muzhoachihpü kim lakheah. Inü I khim münkheam nü kheak züngkihjih tüsho nü bünkeang lakhi lüpdojih. Inü nü ki thiyuchihchim jih tüsho nü kheak tangzüngpü ching yüzah, Wuto ATUNGPUHNÜ thachoh, tüsho nü I yo kam.

⁹Inü nü kemüyihjih tüsho nü kheaknü thiyih müsühjih tüsho nü kheak müdangke mujujih.

¹⁰Inü yakthsükhi khim nü kheak phukihjih tüsho jingkhümpü yukjih. Inü nü atsüdakbe azhingzhing phuyujih tüsho amo-achak khimmihnü nü lüpdojih.

¹¹Inü nü kheak mürezhingzhingnü züt thsüjih: Inü khubo nü bin ching yukjih tüsho lak nü hung mükamde yukjih,

¹²tüsho inü nü nupung kheak nupung-nüpü tüsho nü nukubo kheak nüpü yukjih tüsho akheahakham kuthran nü ku kheak thranjih.

¹³Junangde nü suna tüsho shotoyinchinü züt thsüjih; nü khimbo ju atsüdak khimzhingzhing tüsho amo-achak anüpnüp khim tüsho yakthsükhi lakheah. Nü tsühyungbe ju atsüdak ayikangkang, mukhuke tüsho oliv müdangke lakheah. Nü khide akhamde kam tüsho kiulongthsüberü khülang thsüpü asürü.

¹⁴Tüsho nü akhamkhi hode nü mungthu trükshih bolung soride yü, tümütüsho inü atsüdak nü ki jihkhinü nü khiukdahde akhamde kam, Wuto ATUNGPUHNÜ thachoh.

¹⁵Tüshe nünü nü akheahakhamkhi ching mulonglam tüsho nü mungthu lakhinü müzammüram ahori. Nünü atsahhorü khürü kheak müzammüram thsüde nü arü yo kamshih.

¹⁶Nünü nü khimmih khürü lu tüsho nü thsungkheak akheahpü aphuaphu arüngakopungbo thsü, tüsho jurü kheak müzammüram thsü; hadürü müdünjiakheah yungsho küyimkishe adünjibe yung.

¹⁷Inü nü jihkhi atsüdak mürelungbo she lu, I yo suna tüsho shotoyinchinü athsükhi mürelung, tüsho nü thsungkheak athrürü sangthsübo thsü tüsho jurü kheak müzammüram thsü.

¹⁸Tüsho nünü jurü kheak phukihpü yakthsükhi khimbo lu, tüsho nünü I yo müdangke tüsho rhümthüneabe arü miki jih.

¹⁹Kheaküshe inü nü tsühyungpü jihkhi atsüdak ayikangkang, oliv müdangke tüsho mukhuke, rhümthüneabe nangde arü miki jih. Ha adünjikhi lah, Wuto ATUNGPUHNÜ thachoh.

²⁰Tüsho nünü I kilim zübejihkhi tsührübo tüsho tsührübebo lu tüsho sangthsübo kilim tsühyungpü nangde shuhmülanga jih. Nü müzammüramkhi musuh de?

²¹Nünü I tsührübo laksahdo tüsho sangthsübo kilim shuhmülanga jih.

²²Nünü athraneanbe rhimokhibo alala tüsho müzammüramkhi ching nünü nü bünkeang nü thiyih ching mürhede alakhi athunu nimungbo mülümkhit.

²³Ayokhe! Nü ayokhe, Wuto ATUNGPUHNÜ thachoh. Nünü mihbukmuyuk rhimokhi alala kheak yukrude,

²⁴nünü nü limro yean aban kheak sangthsü kingaünpü tüsho müzammüram dangpungbo thsü.

²⁵Limro ku aban kheak nünü kingaün dangpungbo thsü tüsho atsahhorü aban ki nü küdah alü müzammüramde nü akheahakham thsümünim.

²⁶Nünü nü shihkünkhi nü phünirü Ijiprü kheak müzammüram thsü, tüsho alü müzammüramkhinü I bukakhiukshih.

²⁷Jumonü nü azhihde I khah chungkih tüsho nü lomi nükde kamshih; inü nü rhimo-yakli kheahbah achih ngürü, Filistiarü, nü riri kilim jih.

²⁸Nünü Asiriarü kheak she müzammüram, tümütüsho nü reangmükeamde alakheah; tüsho ju dunglim she nü reangmükeamde alakheah.

²⁹Judüki nünü shothsümolorü lomi Babilonrü kheak müzammüram alü kam tüshe junü she nü reangmükeamde alakheah.

³⁰Wuto ATUNGPUHNÜ thachoh, nünü achih mühanrü müzammüramrü nangde harü alala rhimodo.

³¹Nünü limro ku aban kheak sadambo tüsho kiudunglimro aban ching kingaün dangpungbo thsü, tüshe nü a müzammüramrü ruk yungde alakheah, tümütüsho nünü adün mulu.

³²Nü müzammüramkhi niuberü! Nünü nihbe niubuhrü kheaknü jaksorü alü mürühchoh!

³³Müzammüramrü alala kilim athrürübonü sho jihchoh tüshe nünü nü muzhorü alala kilim sho jihchoh, tüsho müzammürampü alala chingnü nü kilim arüshihpü buknimchoh.

³⁴Jumonü nü müzammüramkhi ching püpürü liberü kheaknü büthsülah; tüsho shenü nü kilim sho müjihde, nünü sho jihdo; nü büthsülah.

³⁵Jumonü nü müzammüramrü, ATUNGPUH yu aniang!

³⁶Wuto ATUNGPUHNÜ ha thachoh: Nünü müzammüramrü nangde nü muzhorü tüsho nü yo athraneanbe sangthsübo kilim bünkeang huh, tüsho sangthsübo kilim nü tsührübo laksah-a jih.

³⁷Jumonü nü muzhorü, sherü kheak nü shih asühkhi ngükhea, sherü nünü muzhokhea tüsho thraneankhea, alala inü bemukhungbah. Arübo nü azhihde dangpung alala chingnü bemukhungbah tüsho arü ki nü bünkeang huhbah, tüsho arünü nü bünkeang ngübah.

³⁸Inü nü müzammüramrü tüsho thiyih bukrü liberü nangde mahkhapbah; tüsho mulong zhipzhip le mükthsü ching nü kheak thiyih handarübah.

³⁹Judüki inü nü muzhorü khah ching nü jihbah, tüsho arünü nü müzammürampung tüsho sangthsü kingaünpungbo alala thsümünimbah. Arünü nü khimmih züngkhia lubah tüsho atsüdak shoto zülu lubah nü bünkeang tüsho aleangkheak zojihbah.

⁴⁰Arünü nü azhihde arhunganim boto bedarübah, arünü nü kheak lungnü arubah tüsho arü nukshangbonü nü adütre kamde alipthünakbah.

⁴¹Arünü nü yambo takkheambah tüsho aliberübo mikinü nü thsümüchibah. Inü nü müzammüram tukloshihbah, tüsho kheaküa nünü nü muzhorü ki müjihchung.

⁴²Judüki nü azhihde I mulong zhipzhip keamlobah tüsho I mükthsü bukakhiuk nü kheaknü rholode atsobah; I azhihayihde akambah tüsho kheaküa bukmakhiuk.

⁴³Tümütüsho nü athunu nimungbo nünü mülümkhit tüshe harübo hode I mulong zhipzhipshih, tsükjide nünü arhimokhi inü nü ku kheak handarübah, Wuto ATUNGPUHNÜ thachoh. Nünü athraneanbe rhimokhibo püpü alala lung yukrude yüliyüra müthsü de?

⁴⁴Mihbüm abannü ha müchitnü Jirusalem dünkheak wuh-a thabah: “Berü nangde, tsührübe nangde.”

⁴⁵Nü a aniubuh tüsho anihbe tsührübo thraneankhi, nü be tsührü ah; tüsho nü a arü niubuhrü tüsho arü tsührübo thraneankhi, nü chi pürü niurü ah. Nü be ju Hitrü tüsho nü buh ju Amorrü lakheah.

⁴⁶Nü chi azopü ju Samaria lakheah, shepü anihbe tsührübebo lung dukulim lakhea; tüsho nü chi akheambe, anihbe tsührübe lung düjinglim lakhi ju Sodom lakheah.

⁴⁷Nünü arü limrobo ching lang atsahkhi yung tüsho arü athraneanbe rhimobo lang akheahkhikhi yung, tüshe nü limrobo alala ching nahde arü kheaknü nü amütsübe kam.

⁴⁸Tsükjide I lale, Wuto ATUNGPUHNÜ thachoh, nü chi Sodom tüsho anihbe tsührübebonü nü tüsho nü tsührübebonü arhimokhi mürhimo.

⁴⁹Kheakü ha nü chi Sodom neak lakheah: Alibe tüsho anihbe tsührübebo bukmüke, bukchihbukhean tüsho muzhomüyi mülakhi lakheah; arünü zhochihrü tüsho müthsümülarü murung.

⁵⁰Arünü lülüshishi tüsho I miki athraneanbe rhimo. Jumonü nünü angükhi nangde inü arü kheak rhimokheah.

⁵¹Samarianü nünü arhimokhi neakbo niukshakkhüh she müyihbeak. Nünü arü kheaknü alü athraneanbe rhimodo, tüsho nünü arhimokhibonü nü chi pürü thiyuro-lungki nangde kamshih.

⁵²Nü achih arümang, tümüde nünü nü chi pürü thsungkheak thiyumütsan khürü jihdo. Tümütüsho nü neakbo ju arü kheaknü alü mütsüdakde alakheah. Arübo nü kheaknü alü thiyurolungki akhiukdo. Jumonü achihang tüsho nü mungchih arümang, tümüde nünü nü chi pürü thiyuro-lungki akhiukshihdo.

⁵³Judüalalashe, inü Sodom tüsho anihbe tsührübebo, tüsho Samaria tüsho anihbe tsührübebo kuhi, tüsho arü lung nü kuhi jihlobah,

⁵⁴junangde nü achih ngübah tüsho nü mungchih ngükhinü nü chi pürü mulong shukheambah.

⁵⁵Tüsho nü chi pürü, Sodom lung anihbe tsührübebo tüsho Samaria lung anihbe tsührübebo atan künangde alakheanü ju lim rholobah; tüsho nü le nü tsührübebo nüsa atan künangde alakheanü ju lim rholobah.

⁵⁶Nü kükheangkhi nimung ching nünü nü mün chingnü nü chi Sodom mükheyuk,

⁵⁷nü mihbukmuyuk mülahkhityiki ah. Kheaküshe nü a Edom tsührübebo tüsho anihbe yamhingrü alala tüsho Filistia tsührübebo — nü mühirü alalanü nü mükhemükimchoh.

⁵⁸Nünü nü yüliyürakhi tüsho athraneanbe rhimobo hanbah, ATUNGPUHNÜ thachoh.

⁵⁹Wuto ATUNGPUHNÜ ha thachoh: Inü nü ki nü rhimo thülünnü arhimobah, tümütüsho nünü tangzüng thsümünimde I thiyuchihchim mükhemükimdo.

⁶⁰Tütüshe inü nü athunu nimungbo ching nü ki tangzüngkhi lümkhitbah, tüsho inü akheam müla tangzüng nü kheak zobah.

⁶¹Judüki nünü nü chi pürü nü kheaknü azopü tüsho akheambe nünü leangkhichoki nünü nü limrobo lümkhitbah tüsho achih ngübah. Inü arübo nü kilim tsührübebo nangde ajihbah, tüshe inü nü kheak tangzüngkhi yande yung.

⁶²Junangde inü nü kheak I tangzüng zobah, tüsho I ATUNGPUH de nünü mükheahbah.

⁶³Judüki inü küyimki nünü arhimokhi alala dünthsükhibanü, nünü alümkhitbah tüsho achihbah tüsho nü junokhi dünkheaknü küyimkishe nünü nü mün mükhimshuh, Wuto ATUNGPUHNÜ thachoh.