Read Yimchungru Naga Ezk 18 Bible Online

Ezk 18 - Yimchungru Naga bible

Ezk 18

¹ATUNGPUH yu I kilim arü:

²“Bebuhrünü kurungaso asan tsüh, tüsho tsührübo hü mütramlah” de ha müchityu Israel lomi dünkheak thakhi ha amütsan tümü a?

³Tsükjide I lale, Wuto ATUNGPUHNÜ thachoh, nüsanü ha müchityu Israel ching kheaküa mütha.

⁴Tümüde arhang lakhi me aban I yo ah, buhrü tüsho tsührü — ane chido I yo ah. Me küpünü neak yihbeakchonü ashebah.

⁵Mürangkhüh thiyuro-lungki mihtsürü khülang thiyuro tüsho alungki rhimorü lakhülaa —

⁶apinü müzüng arüngakopungbo ching müyimtsüh yungsho Israel yamkhün sangthsübo mükheahsho, apinü anihbuh yamhingrü niuberü mümünean yungsho aliberü khinu shihcham yüchoki anihbe kheak munungsho,

⁷apinü she mujuno, tüshe thiyuchihchimde alukhi shonip jihlochoh. Apinü jangkhijangra müthsü, tüshe akhümrü kilim api tsühyungpü jihchoh tüsho bünkeangrü kilim khimmih jihchoh.

⁸Apinü sholü lude münipjih yungsho sholü kihode mulu. Apinü amülim rhimopü chingnü akhah tuklochoh tüsho mihtsürü le mihtsürü dükeak tsüde khapjihchoh.

⁹Apinü I yakzan thsükhibo yanchoh tüsho thiyuro lade I yakzanbo zochoh. Ju mihtsürü thiyuro-lungki ah; api tsükjide alabah, Wuto ATUNGPUHNÜ thachoh.

¹⁰Thiyuthiyu api tsührü ahührü thiyih bukrü lah, shepünü harü rhimocho

¹¹(abuhnü harü khülang she mührimomo she): Apinü müzüng arüngakopungbo ching yimtsühchoh, apinü anihbuh yamhingrü niuberü müneanjihchoh.

¹²Apinü zhochihrü tüsho müthsümülarü junochoh. Apinü jangkhijangra rhimochoh. Apinü thiyuchihchimde alukhi müjihlo, apinü sangthsübo kilim kheahchoh. Apinü athraneanbebo rhimochoh.

¹³Apinü sholü lude nipjihchoh. Hadürü mihtsürü alaba de? Api müla! Tümütüsho apinü harü athraneanbe alala rhimodo, api tsükjide asheshihbah tüsho api thiyih anihbuh kheak labah.

¹⁴Tüshe thiyuthiyu ha buh tsührü khülang lah, shepünü nihbuh abuhnü neak yihbeakkhi alala ngü, tüsho apinü ngüa lalashe, anihbuhnü hadürü mürhimosho:

¹⁵Apinü müzüng arüngakopungbo ching mütsüh yungsho Israel yamkhün sangthsübo mükheah. Apinü nihbuh yamhingrü niuberü mümüneanjih.

¹⁶Apinü sheshe mujuno yungsho shozüng thsungkheak thiyuchihchim mulu. Apinü müjangkhijangra tüshe akhümrü kilim api tsühyungpü jihchoh tüsho bünkeangrü kilim khimmih jihchoh.

¹⁷Apinü amülim chingnü khah tuklochoh tüsho sholü yungsho sholü alü mulu. Apinü I yakzanbo zochoh tüsho I yakzan thsükhibo yanchoh. Api anihbuh abuh neak dün müshe; api tsükjide alabah.

¹⁸Tüshe abuh a nihbuh neak dün shebah, tümütüsho apinü jangkhijangra rhimodo, nihbuh keoniorü mülapyukjih tüsho api mihtsürü bolung tümü amülimanü rhimodo.

¹⁹Tütüshe nünü thachoh, “Tümüde tsührünü nihbuh abuh amülim mühanrung le?” Tümütüsho tsührü junü thiyuro tüsho alungki rhimodo tüsho kümkangde I yakzan thsükhibo zodo, api tsükjide alabah.

²⁰Neak yihbeakrü me ju ashebah. Tsührünü abuh amülim mühanrung, yungsho abuhnü tsührü amülim mühanrung. Thiyuro-lungkirü thiyuro-lungkikhi ju api kilim yukajakjihbah, tüsho mihbukmuyukrü mihbukmuyukkhi ju api yo thsübah.

²¹Tüshe mihbukmuyuk mihtsürü khülangnü nihbuhnü ayihbeakkhi neakbo alala chingnü rholosho tüsho I yakzan thsükhi alala zosho tüsho tümü thiyuro tüsho alungkianü rhimosho, api tsükjide alabah; api müshe.

²²Apinü alakmihkhi tümü she api azhihde mülümkhit. Tümütüsho apinü thiyuro-lungki rhimokhinü api alabah.

²³Mihbukmuyuk shekhi ching inü tümükhüh asühpü lade? Wuto ATUNGPUHNÜ thachoh. Ju müthri, küyimki arünü arü limro chingnü rholobah rhangdung labanü inü masühcho de?

²⁴Tüshe mürangkhüh thiyurolungki mihtsürü khülangnü nihbuh thiyuro-lungki chingnü rholo tüsho neak yihbeaksho tüsho mihbukmuyuk mihtsürünü arhimokhi rukhüh athraneanbe rhimosho, api alaba de? Api thiyuro-lungki rhimokhi tümü she mülümkhit. Tümütüsho api thiyuro mülakhinü mülimde lah tüsho apinü neak yihbeakkhinü, api ashebah.

²⁵Tütüshe nünü thachoh, “ATUNGPUH limro thiyuro yung.” Aniang, O Israel yamkhün: I limro thiyuro yung de? Nü limrobo thiyuro mülakhi yung de?

²⁶Thiyuro-lungki mihtsürü khülang nihbuh thiyurolungki chingnü rholosho tüsho neak yihbeaksho, ju dünkheak api ashebah; apinü ayihbeakkhi neak dünkheaknü api ashebah.

²⁷Tüshe mihbukmuyuk mihtsürü khülangnü anihbuhnü ayihbeakkhi mihbukmuyuk chingnü rholode tsosho tüsho tümü thiyuro tüsho alungkianü rhimosho, api rhangdung khümkhitbah.

²⁸Tümütüsho apinü alakmihkhi alala lümakheahchoh tüsho jurü chingnü rholode tsochoh, tsükjide api alabah; api müshe.

²⁹Tütüshe Israel yamkhünnü thachoh, “ATUNGPUH limro thiyuro yung.” I limrobo thiyuro yung de, O Israel yamkhün? Nü limrobo thiyuro mülakhi yung de?

³⁰Jumonü, O Israel yamkhün, inü nüsa mihbüm aban nihbuh limrobo yande mahkhapbah, Wuto ATUNGPUHNÜ thachoh. Mulong müthriang! Nünü alakmihkhi alala chingnü rholode tsoang; junangde neaknü nüsa mükeamshih.

³¹Nünü alakmihkhi alala chingnü tsokhitang, tüsho mulong aso tüsho me aso ngüang. Tümü thsükhi nü ashepü, O Israel yamkhün?

³²Tümüde inü khürükhüh shekhi ching masühchoh, Wuto ATUNGPUHNÜ thachoh. Mulong müthriang tüsho laang!