Read Yimchungru Naga Ezk 21 Bible Online

Ezk 21 - Yimchungru Naga bible

Ezk 21

¹ATUNGPUH yu I ki arü:

²Mihtsürü tsührü, nü miro Jirusalem azhihde abinang tüsho arüngyam azhihde thsangyuthsangraang. Israel lomi azhihde müchitang

³tüsho anihbe ki thaang: ATUNGPUHNÜ ha thachoh: Inü nü azhihde lah. Inü nuktrüp chingnü nukshang dukkhitbah tüsho nü kheaknü thiyuro lakhi tüsho mihbukmuyuk chido lipkhibah.

⁴Tümütüsho inü thiyuro lakhi tüsho mihbukmuyuk lipkhibah, mihbüm aban düjinglimnü dukulim khiungde azhihde I nukshang müsütyuklo.

⁵Judüki mihtsürü alalanü I ATUNGPUHNÜ nuktrüp chingnü nukshang dukkhitkheah de mükheahbah; ha murholo.

⁶Jumonü asheang, mihtsürü tsührü! Arü miki mulong thsümünimde tüsho khühde lungride asheang.

⁷Tüsho küyimki arünü nü ki, “Tümüde nü ashecho le?” de keokhisho, nünü athabah, “Thiyusheak arükhi dünkheak. Mihbüm aban mulong niuthünakbah tüsho khah kikbah; me keahkhibah tüsho mukhuk niukbah. Ha arüchoh! Ha tsükjide adünjibah,” Wuto ATUNGPUHNÜ thachoh.

⁸ATUNGPUH yu I ki arü:

⁹Mihtsürü tsührü, müchitang tüsho thaang, ATUNGPUHNÜ ha thachoh: Nukshang khülang, nukshang khülang azükhitkhi tüsho aphekhitkhi —

¹⁰Alaksahpü thsungkheak zükhitkhi, chinchobe nangde phürappü phekhit! Ju ching asühachihpü müla, tümüde I mihtsürübonü dühdükhi tüsho thsümüchikhi mükhemükimdo.

¹¹Nukshang ju phekhitpü akhudo, khah ching shuhpü lah; ha zükhita tüsho phekhita lah, alaksahrü khah ching yukjihpü thsakhama lah.

¹²Zhiang tüsho tüzhoang, mihtsürü tsührü; tümüde ha I mihtsürü azhihkhi lah; ha Israel limberü alala azhihkhi lah. Arübo I mihtsürü lungnü alaksahpü lah. Jumonü nü khüh yümang.

¹³Inü I mihtsürü rükakichoh, tüsho arünü mulong müthripü thsunglosho, ha alala arü kheak dünjibah.

¹⁴Dale jumonü, mihtsürü tsührü, müchitang tüsho nü khah damang. Nukshang alochode achungbah. Ha alaksahpü thsungkheak — tode alaksahpü nukshang khülang, arü kheak thrip abande rihdochoh.

¹⁵Junangde mulong niuthünakbah tüsho akeamkhi hihbah, inü alaksahpü thsungkheak arü chipiripitbo alala kheak nukshang hanmukhungdo. O! Ha chinchobe nangde phürappü thsülah, alaksahpü ha thrüa ludo.

¹⁶O nukshang, tsülim lipang, jushu huzulim, nü nukhünü abin limpeang.

¹⁷I she I khahbo dambah, tüsho I mulong zhipzhip keamlobah. I ATUNGPUHNÜ asukdo.

¹⁸ATUNGPUH yu I ki arü:

¹⁹Mihtsürü tsührü, Babilon kiulongthsüpuh nukshang yüpü limro mahne, ane chido lomi rukhüh chingnü tankihkhi amütsan thsang. Kiuto ching limro dübeakde yükhi amütsan khülang thsang.

²⁰Amonrü kiuto Rabba azhihde arüpü nukshang limro khülang amütsan tüsho püpü ju Juda tüsho chipi ayünkhi Jirusalem azhihde thsang.

²¹Tümüde Babilon kiulongthsüpuhnü kuhi kheahpü limdübeak ching, limro mahne dübeakkhi kheak tuklobah: Apinü hühzo mahnenü azan thsübah, apinü anihbuh sangthsübo keobah, apinü shihmüsan kheak kheahbah.

²²Api khah tsülim peang Jirusalem thsungkheak azan akhiukbah, küching apinü chipi-yümkheambe zoba, alaksahpü thiyukhüm jihpü, keochih düsheak zhipü, chipiripitbo yande chipi-yümkheambe zopü, alo wumujungpü tüsho sadambo thsübah.

²³Arünü thiyuchihchimkhi ju arükchih müchitkhi nangde alabah, tüshe apinü arü mülimkhi lümkhitshihbah tüsho arü ramde atsobah.

²⁴Jumonü Wuto ATUNGPUHNÜ ha thachoh: Tümütüsho nüsa mihtsürünü amikheaknü azhihde nüsa lümkhi ching nüsa mülimkhi handarü, nüsa rhimokhi alala ching nüsa neakbo akhiuka huh — tümütüsho nüsanü ha rhimokhinü, nüsa ramde atsobah.

²⁵O amüneankhi tüsho mihbukmuyuk Israel yakzanshuhrü, shepü nimung arüa la, shepü thsümüchi kim akheam khiunga la,

²⁶ha Wuto ATUNGPUHNÜ thachoh: Kuhingbe yihkhiang, kuthran yihkhitang. Ju ruk lakhi nangde ju müla: Abobe shuhkihbah tüsho shuhkih-a lakhi abobe kamshihbah.

²⁷Athsümünim! Athsümünim! Inü ha kiuto thsümünimbah! Tüshe ha kiuto thsümüchipü mokhitkhi marüyi khiungde müdünji; api kilim inü ju jihbah.

²⁸Tüsho nü, mihtsürü tsührü, müchitang tüsho thaang, Amonrü tüsho arü mükhemükimrü dünkheak, Wuto ATUNGPUHNÜ ha thachoh: Nukshang khülang, nukshang khülang, alaksahpü dukkhitdo, amuyupü phekhita tüsho chinchobe nangde phürappü lah!

²⁹Nüsanü angükhi michihbo tüsho müchitbo akeangyu, nüsa mihbukmuyuk tüsho amütsürü tüsho nüsa akheam thsümüchipü nimung arüchoh, nukshang ju nüsa hungbo kheak keampü lah.

³⁰Nukshang ju nuktrüp ching yukang. Nüsa thrünkhi dangpung ching nüsa asürüpung ching inü nüsa mahkhapbah.

³¹Inü I mulong zhipzhip nüsa kheak dungkihbah tüsho nüsa azhihde I bukakhiukkhi mo mütkihbah; inü nüsa bukmüke mihtsürü, athsümünimpü ching athsükhit mihtsürü khah ching jihbah.

³²Nüsa monü thsümünimbah, nüsa thiyih nüsa lomi ching bukbah, nüsa kheaküa mülümkhitlo; tümüde I ATUNGPUHNÜ asukdo.