Read Yimchungru Naga Ezk 22 Bible Online

Ezk 22 - Yimchungru Naga bible

Ezk 22

¹ATUNGPUH yu I ki arü:

²Mihtsürü tsührü, nünü mahkhapba shi, nünü ha thiyih bukkhi kiuto mahkhapba shi? Anihbe athraneanbe rhimobo alala huhang

³tüsho thaang: Wuto ATUNGPUHNÜ ha thachoh: O nihbe bolung ching thiyih bukkhi tüsho sangthsükhinü müneankhi kiuto, nü kim arüchoh.

⁴Nünü thiyih bukkhinü nü amülim kamdo tüsho nünü athsükhi sangthsünü nü müneando. Nünü nü nimungbo phünide handarüdo, tüsho nü kambo akheam arüdo. Jumonü inü nü trükshihbo ki mükhemükim tüsho lomi alala ki münedung kamshihbah.

⁵Phünide alarü tüsho limshude alarünü nü keangrübah, O neamneamrurunü mide alakhi, mungchih kiuto.

⁶Israel limberü alalanü nihbuh sühmüh ching kinchoh tüsho laksahdo.

⁷Kiuto ching shenü she buhrü tüsho berü wüntre müjih; nünü khiungkerü mülapyuk tüsho buhrü mülarü le khimoberü kheahmüchihdo.

⁸Nünü I amüsüh kukrukbo mükhemükimdo tüsho I amunibo müneando.

⁹Nüsa mihtsürü khürü asheshihpü akeangyu tharü lah. Arü khürünü sangthsü kingaünkhibo tsühchoh tüsho yüliyürarü lah.

¹⁰Khürünü nihbuh abuh niube ki yapchoh. Khürünü khinu shihcham yükhi liberü thsümünimchoh.

¹¹Khürünü nihbuh yamhingrü niube kheak athraneanbe yihbeakchoh, püpürünü nihbuh tsühmeakrü thsümünimchoh, tüsho püpürünü nihbuh chiniurü thsümünimchoh.

¹²Nüsa mihtsürü khürünü thiyih bukkhi buknim luchoh; nünü sholü alü luchoh tüsho nü yamhingrü kheaknü jangkhijangrakhinü alarü kamchoh. Tüsho nünü I mihabahdo, Wuto ATUNGPUHNÜ thachoh.

¹³Kheahang, nü ahühkhi tüsho alaksahkhi kheak inü I khah adanchoh.

¹⁴Inü nü keo nimung nü mulong tokhi laba de, yungsho nü khahbo sühmüh zahde alaba de? I ATUNGPUHNÜ asukdo, tüsho inü ju rhimobah.

¹⁵Inü nü trükshih bolung hiumüzütshihbah tüsho nü lomibo ching müzütshihbah, tüsho nü mümüsühkhi akheam thsüshihbah.

¹⁶Tüsho küyimki trükshihbo miki nü müneanbanü, I ATUNGPUH de nünü mükheahbah.

¹⁷ATUNGPUH yu I ki arü:

¹⁸Mihtsürü tsührü, Israelrübo I ki yihnüpü müla. Arübo abahkhi yinchi lah — mürümmuchu lung, yinchiliolio, yinchi, tüsho motru ching shotoyinchi khih takkhikhi athünak-yinchi nangde lah.

¹⁹Jumonü Atungpuh THRÜNPUHNÜ ha thachoh. Tümütüsho nüsa alala yihnüpü mülade kamdo, inü nüsa Jirusalem ching bemukhungbah.

²⁰Khürünü shotoyinchi, sunalung, yinchi, yinchithünak, tüsho yinchiliolio aniushihpung hanmukhunga, jurübo niushihpü mo kheak mütkhi nangde; inü I bukakhiukkhi tüsho mulong zhipzhip ching nüsa bemukhungbah, tüsho inü nüsa yuka niuthünakshihbah.

²¹Inü nüsa bemukhungbah tüsho I mulong zhipzhip monü nüsa kheak mütbah tüsho nü ju ching niuthünakbah.

²²Aniube ching shotoyinchi niuthünakkhi nangde, nü ju ching niuthünakbah tüsho I ATUNGPUHNÜ nü kheak mulong zhipzhip dungkihdo de nünü mükheahbah.

²³ATUNGPUH yu I ki arü:

²⁴Mihtsürü tsührü, Israelrü ki thaang: arü lo mümüsüh de thaang, jumonü I bukakhiukde ju ching thsümüchichoh.

²⁵Ju ching limberübo ju shiwüh chakthünakde arungkhi kekhüzü nangde lah; arünü mihtsürü rhangdung muyudo; arünü rahpungbo tüsho shoto ludo; arünü ju ching khimoberü hihde kamshih.

²⁶Amükeamrübonü I yakzan lakmihdo tüsho I yo amüsüh kukrukbo müneanjihdo; arünü amüsühkhitkhi tüsho mümüsühkhi dükeak müpüthsü, arünü amüsüh tüsho amümüsüh dükeak müthsangyu, tüsho arünü I amunibo akinashu müla, junangde arü bolung I müneanjih.

²⁷Ju ching lakhi atorübo ju shiwüh thonakbe, thiyih bukpü, thiyuro mülakhi alü ngüpü rhangdungbo thsümünimkhi rimrebo nangde lah.

²⁸Wukihrübonü arü thsung thsüde amüyenü mujudo, arükchih michih ngüde tüsho arü thsungkheak ATUNGPUHNÜ müthakhi akeangyu müchitde thachoh, “Atungpuh THRÜNPUHNÜ ha thachoh.”

²⁹Lomi mihtsürünü jangkhijangra tüsho khukshik rhimodo; arünü zhochihrü tüsho müthsümülarü juno, tüsho alim mahoride khiungkerü ki jangkhijangrado.

³⁰Tüsho chipi thsülopü tüsho lomi thsung thsüde chipi keamkhi ching zhippü arü bolung inü khürü yim, junangde inü ju müthsümünim; tüshe inü sheshe müyimkhit.

³¹Jumonü inü arü kheak I mulong zhipzhip dungkihkheah; arü rhimo dünkheak I bukakhiukkhi monü inü arü thsümünimbah; Atungpuh THRÜNPUHNÜ thachoh.