Read Yimchungru Naga Ezk 23 Bible Online

Ezk 23 - Yimchungru Naga bible

Ezk 23

²Mihtsürü tsührü, berü khülang tsührü aliberü mahne lakheah;

³ane athunu kim Ijip ching lachoki arü atsangkhitkhi dükheakabah tüsho müzammüramrü kam.

⁴Azopü mung Ohola tüsho anihbe niurü mung Oholiba lakheah. Ane chido inü lu, tüsho anenü tsührübo le tsührübebo zübejih. Ane mung, Ohola ju Samaria, tüsho Oholiba ju Jirusalem.

⁵Oholanü anihbe I yo lachoki müzammüram thsü; alibenü anihbe muzhorü Asiriarü, thirithsürübo mürüh,

⁶arübo mürümmuchu khim yih, kovünor tüsho wühkenorübo, arü alala akheahakham athrününgtsüngbo, khora kheak künkih-a binrü lakheah.

⁷Alibenü anihbe ju amokhitkhi Asiria mihtsürü kilim jih; tüsho alibenü mürührü sangthsübo aban kheak anihbe müneana lu.

⁸Alibenü Ijip ching müzammüram rhimokhi mutuklo; tümüde anünüchoki athrününgtsüng mihtsürübonü anihbe lung yap tüsho anihbe atsangkhit treangbo neamjih tüsho arü künkhi anihbe kheak dungkihjih.

⁹Jumonü inü alibenü amürühkhi anihbe muzhorü Asiriarü khah ching anihbe jih.

¹⁰Hanü anihbe bünkeang kamshih; arünü anihbe tsührübo le tsührübebo rama lu, tüsho arünü anihbe nukshangnü laksah. Anihbe kheak mahkhap lu tüsho alibe ju aliberü bolung münedung kam.

¹¹Anihbe niurü Oholibanü ha ngü, tütüshe anihbenü shih mürühkhi tüsho müzammüramkhi ching achi kheaknü alü athsümünim lakheah.

¹²Alibenü Asiriarü, kovünorbo tüsho thirithsü zülu banthsangde ayihrü wühkenorü, thirithsürü khora kheak binrü mürüh, arü alala akheahakham athrününgtsüng mihtsürübo lakheah.

¹³Tüsho alibe müneankhi inü ngü; ane chidonü limro rukhüh ching yü.

¹⁴Tüshe alibenü müzammüram judü lang thsü; alibenü athrürü mejak rhü kheak, Kaldearü trungdung mürümdo thsüa zokhi ngü,

¹⁵arü chimbo mükamde pangrümbe rüm tüsho arü kubo kheak akheahakham kuhingbebo lakheah; arü alala Kaldea ching asürükhi Babilon wühkenorübo nangde lah.

¹⁶Küyimki alibenü arü ngükhea, alibenü arü mürüh, tüsho arü kilim Kaldea ching yunithsürübo yüshih.

¹⁷Tüsho Babilonrünü muzhoachih yapkiu ching anihbe kilim arü, tüsho arü shih künkhinü anihbe thsümünimjih; tüsho anihbe arü kheaknü müneanshu, müküntsande arü kheaknü rholo.

¹⁸Küyimki alibenü amikheak akhiukde müzammüramkhea tüsho bünkeang kamkhea, inü achi kheaknü rholokhi nangde anihbe kheaknü inü müküntsande rholo.

¹⁹Tütüshe alibenü anihbe anünü nimungbo ching Ijip lomi ching müzammüramkhi lümkhitde müzammüram alü kamshih

²⁰tüsho ju ching anihbe muzhorü, shih mürühachihkhi donkibo, tüsho khorapung nangde alakhi kheak mürüh.

²¹Hanangde Ijiprünü nü anünü treangbo neamkhi nü makhamaleak rhimo nünü lümkhit.

²²Jumonü, O Oholiba, Atungpuh THRÜNPUHNÜ ha thachoh: Nünü müküntsande rholode arükhi, nü muzhorübo nü azhihde thurumusubah, tüsho thrip aban chingnü nü azhihde inü arü bedarübah:

²³Babilonrü tüsho Kaldearü alala, Pekod, Shoa tüsho Koa chingnü tüsho arü lung Asiriarü alala, akheahakham athrününgtsüngbo, kovünorbo tüsho arü lung wühkenorübo alala, atorübo tüsho thirithsürübo, arü alala khorabo kheak binlah.

²⁴Arünü nü azhihde dukulimnü khora-lolungbe, athsunglolungbe tüsho boto mihtsürü bebah arübah; arünü nü azhihde thrip aban chingnü tsung anini tüsho atoto, tüsho yinchi-kuthran lubah azhipbah, tüsho inü arü kilim mahkhappü jihbah, tüsho arünü arü yuzüng yande nü mahkhapbah.

²⁵Inü nü azhihde mükthsübah, junangde arünü bukmükede nü ki rhimobah. Arünü nü nupung tüsho nü nukubo lipkhibah, tüsho aninga larübo nukshangnü akeambah. Arünü nü tsührübo le tsührübebo rama lubah, tüsho nü lung aninga larübo monü aniuabahbah.

²⁶Arünü nü khimmihbo she züngkhia lubah tüsho nü yo mürelung atsübo lude atsobah.

²⁷Jumonü nünü Ijip lomi chingnü handarükhi nü makhamaleak rhimobo tüsho müzammüram kheamshihbah; nünü arü mümürheang, yungsho kheaküa Ijip mülümkhit.

²⁸Inü nü ju nünü mükheahnerü, müküntsande nü rholorü khah ching jihbah;

²⁹tüsho arünü nü ki thraneande akeobah, tüsho nünü arhimokhi alala lude atsobah, tüsho nü bünkeang tüsho pang keangkeang zojihbah, tüsho nü müzammüram mungchih lahkhitbah. Nü makhamaleak rhimo tüsho nü müzammüramnü

³⁰ha nü kheak handarü, tümütüsho nünü trükshihbo kheak müzammüram ahori, tüsho arü sangthsübo kheak nü müneana lu.

³¹Nünü nü chi limro ching yü; jumonü inü anihbe pung nü khah ching jihbah.

³²ATUNGPUHNÜ ha thachoh: Nünü nü chi pung asük tüsho amülih yungbah; nü mükhemükimbah tüsho münejihbah, ha mikhiuklah.

³³Nü müshangmuru tüsho mulong rozhaknü amibah. Mihtrebe tüsho athsümünim pung khülang ju nü chi Samaria pung ah;

³⁴nünü ju yungbah tüsho mütrünkungbah tüsho ayihthünakkhi müjakbah tüsho nü treangbo thsümünimbah; tümüde inü asukdo, Atungpuh THRÜNPUHNÜ thachoh.

³⁵Jumonü Atungpuh THRÜNPUHNÜ ha thachoh: Tümütüsho nünü I mihdo tüsho I nü dunglim nima bah, jumonü nü makhamaleak rhimo tüsho müzammüram dün thsünübah.

³⁶ATUNGPUHNÜ I ki tha: Mihtsürü tsührü, nünü Ohola tüsho Oholiba mahkhapba shi? Dale tüsho ane ki ane athraneanbe rhimobo thakhitang.

³⁷Tümüde anenü müzammüram yihbeakdo; tüsho ane khah kheak thiyih kihlah; ane sangthsübo lung anenü müzammüram yihbeakdo; tüsho anenü I kilim zübejihkhi tsührübo she arü kilim kingaündo.

³⁸Kheaküshe anenü I ki ha rhimodo: anenü ju nimungnü I arüngyam müneando tüsho I amunibo müneando.

³⁹Tümüde küyimki anenü ane sangthsübo khilim ane tsührübo laksahkheanü, ju nimung anenü I arüngyam ching müneanjihpü yüzah. Ha anenü I yam ching rhimokheah.

⁴⁰Anenü athrürübo kilim she limshu chingnü arüshihpü yunithsürü yüshih, tüsho arübo arü. Arü thsungkheak anenü kemüyihbah mükdükhambo muju, tüsho zülubonü züt thsü.

⁴¹Anenü atsüdak binkiu kheak bin, ju miki I yo arhümthüneabe tüsho müdangke kihkhi dükhüm khülang zo.

⁴²Anihbe mühide lümamükheahrü boto düsheak lakheah, ju lung alanaji mihtsürü ahihdo sunglo chingnü müshanga bedarü; tüsho arünü aliberübo binbo kheak bingkhümbo yukjih, tüsho ane ku kheak akheahakham kuthranbo thranjih.

⁴³Judüki inü tha, ah, alibe müzammüramkhinü keaka lah, tüshe arünü judü lang anihbe kheak müzammüram rhimochoh.

⁴⁴Tümüde khürünü müzammüramrü kheak yükhi nangde arünü ane kheak yüdo. Hanangde arünü yüliyüra liberü Ohola tüsho Oholiba kheak yü.

⁴⁵Tüshe thiyuro lakhi mahkhaprübonü ane ki müzammüram mülimkhi tüsho thiyih bukkhi thakhitjihbah; tümütüsho ane müzammüramrü ah tüsho ane khahbo kheak thiyih kihlah.

⁴⁶Tümüde Atungpuh THRÜNPUHNÜ ha thachoh: Ane treshihpü tüsho jangkhipü boto khülang bedarang.

⁴⁷Amukhungrünü ane kheak lungnü arubah tüsho arü nukshangbonü ane kiumülünbah; arünü ane tsührübo le tsührübebo laksahbah, tüsho ane yambo takabahbah.

⁴⁸Hanangde inü lomi ching makhamaleak yakli kheamshihbah, junangde aliberü alalanü rhüngrhünga lubah tüsho anenü rhimokhi nangde makhamaleak yakli müyihbeak.

⁴⁹Nükenü makhamaleak yakli thsungkheak shaklobah, tüsho nükenü sangthsü kingaünkhi amülim neak hanbah; tüsho I Atungpuh T H RÜ NPU H de nükenü amükheahbah.