Read Yimchungru Naga Ezk 25 Bible Online

Ezk 25 - Yimchungru Naga bible

Ezk 25

¹ATUNGPUH yu I ki arü:

²Mihtsürü tsührü, nü miro Amonrü kilim abinang tüsho arü azhihde müchitang.

³Amonrü ki thaang, Atungpuh T H RÜ NPU H yu aniang: Atungpuh THRÜNPUHNÜ ha thachoh, Tümütüsho I arüngyam müneana lachoki, tüsho Israel lomi thsümünima lachoki, tüsho Juda yamkhün ramtso ching yüchoki nüsanü “Aha!” de tha;

⁴jumonü inü nüsa aniakhiuklim mihtsürü kilim yamalo thsüpü jihchoh. Arünü nüsa bolung binkheampung thsübah tüsho nüsa phulung ching arü khimyambo thsübah; arünü nüsa sangaso tsühbah, tüsho arünü nüsa niuhke yungbah.

⁵Inü Rabba ju kemelbo yimtsühpung tüsho Amon ju mihnu boto zopung kamshihbah. Judüki nüsanü I ATUNGPUH de mükheahbah.

⁶Tümüde Atungpuh THRÜNPUHNÜ ha thachoh: Tümütüsho nüsanü nüsa khahbo dam tüsho nüsa jingbo adan tüsho Israel lomi azhihde nüsa mulong ching lungchihpü asühachih,

⁷jumonü nüsa azhihde I khah chungkhit, tüsho trükshihbo kilim yankhia lukhi nangde ajihbah. Inü nüsa mihtsürü bolungnü lipkhia bahbah tüsho lomibo chingnü nüsa dükheakshihbah; inü nüsa thsümünimbah. Judüki I ATUNGPUH de nüsanü mükheahbah.

⁸Atungpuh THRÜNPUHNÜ ha thachoh: Tümütüsho Moabnü tha, Juda yamkhün ju püpürü trükshihbo alala nangde lah,

⁹jumonü inü Moab aredung kiuto atsüdakbo — Beth Jeshimoth, Baal Meon tüsho Kiriathaim yanshihbah.

¹⁰Inü ha Amon lungnü aniakhiuklim mihtsürü kilim yamalo thsüpü jihbah. Hanangde trükshih bolung Amon kheaküa mülümkhit,

¹¹tüsho inü Moab kheak mahkhapbah. Judüki I ATUNGPUH de arünü mükheahbah.

¹²Atungpuh THRÜNPUHNÜ ha thachoh: Tümütüsho Edomnü Juda yamkhün azhihde royimde rhimodo tüsho arü kheak müshakde royimkhi rhimodo,

¹³jumonü Atungpuh THRÜNPUHNÜ ha thachoh, Inü Edom azhihde I khah chungkihbah, tüsho mihtsürü le shiwüh kheaknü lipkhia bahbah, tüsho inü ha thsümünimbah; Teman kiuto chingnü Dedan kiuto khiungde arübo nukshangnü akeambah.

¹⁴I mihtsürü Israel khah hode inü Edom kheak royimkhi labah; tüsho I bukakhiukkhi tüsho I mulong zhipzhip yande arünü Edom ching rhimobah; tüsho arünü I royimkhi ngübah, Atungpuh THRÜNPUHNÜ thachoh.

¹⁵Atungpuh THRÜNPUHNÜ ha thachoh: Tümütüsho mükheamkhi mükthsünü Filistiarünü royimkhi ching rhimodo tüsho mulong amütsünü athsümünim ching royimdo,

¹⁶jumonü Atungpuh THRÜNPUHNÜ ha thachoh, Inü Filistiarü azhihde I khah chungkihbah, Kerethrü lipkhia bahbah tüsho aningkhi keyean thsümünimbah.

¹⁷Inü mulong zhipzhip thsümüchinü arü kheak tode royimbah. Judüki inü arü kheak I royimkhi lachoki I ATUNGPUH de arünü mükheahbah.