Read Yimchungru Naga Ezk 26 Bible Online

Ezk 26 - Yimchungru Naga bible

Ezk 26

¹Kam thürükheak khülang, khinu ching nimung akhuhbe nimung, ATUNGPUH yu I ki arü:

²Mihtsürü tsührü, tümütüsho Tairnü Jirusalem dünkheak mutukzhakde tha, “Aha, mihtsürübo chipiripitlimro thsümünima lah; ha I ki khimshuhmülih-a lah; kheakü thsümünima lakhi inü athsülobah.”

³Jumonü, Atungpuh THRÜNPUHNÜ ha thachoh: Kheahang, inü nü azhihde lah, O Tair! Inü nü azhihde trükshih ahihdo, ketonü abükde arükhi nangde bedarübah.

⁴Arünü Tair chipibo thsümünimbah tüsho aheangsadambo lukkheambah. Inü ju chingnü alo müsüka lubah tüsho lung müthsün kamshihbah.

⁵Ha keang chutreakpung keto phulung kambah. Inü asukdo, Atungpuh THRÜNPUHNÜ thachoh. Ha trükshihbo thsungkheaknü yankhia lukhi kambah,

⁶tüsho anihbe kiutobo ching larübo nukshangnü alaksahbah. Judüki I ATUNGPUH de arünü mükheahbah.

⁷Tümüde Atungpuh THRÜNPUHNÜ ha thachoh: Inü Tair azhihde dukulimnü Babilon kiulongthsüpuh Nebukednezar, kiulongthsürübo kheaknü kiulongthsürü bedarübah, ju lung khorabo, khora-lolungbe, khoraberü tüsho bonungrü ahihdo bebah.

⁸Kiutobo tüsho lomi phulung larübo thirithsü ching laksahbah. Apinü nü azhihde ayanpü alo kiubah, wumujungbah, tüsho tsungbonü rhü thsübah.

⁹Apinü nü chipibo azhihde müyinnimde akingkheambe chungbah tüsho api wübonü nü aheangsadambo kingkheambah.

¹⁰Api khorabo ahihdo lakhinü asungthulungnü nü hingdobah. Khoraberü, lolungbejingbo, tüsho khora-lolungbebo chipi keamkhi kiuto ching yüchoki nü chipiripitbo niukbah.

¹¹Api khora biuobonü nü kiudunglimrobo jungbah. Apinü nü mihtsürübo nukshang kheak yihkihbah, tüsho nü yo amüküp dungjingbo alo kheak keambah.

¹²Arünü nü lakhitbo tüsho nü yo yinzüyindo kukruk lubah; arünü nü chipibo kingkheambah tüsho atsüdak nü yambo thsümünimbah. Nü lungbo tüsho arhütsang tüsho alo ke ching bahjihbah.

¹³Inü nü khün düsheak kheamshihbah; nü bingshang düsheak musolo.

¹⁴Inü nü lung müthsün kamshihbah; nü ju keang chutreakpü dangpung thsübah. Nü küyimkishe müthsülo, tümüde I ATUNGPUHNÜ asukdo, Atungpuh THRÜNPUHNÜ thachoh.

¹⁵Atungpuh THRÜNPUHNÜ Tair ki ha thachoh: Küyimki yurirü ashearaba, küyimki nü lung alaksahkhi yüba, nü keamkhinü keyean lobo müniukba de?

¹⁶Judüki keto yakzanshuhrübo alalanü arü kiulongthsü-binkiu chingnü akibah; arü shulünkhimbo tüsho arü yakkhokhi khimmihbo yihkhitbah. Arünü nihbuh zangrü ajankhinü khim thsübah alo kheak binbah; arünü kim aban ajanbah tüsho nü ki müyinsahbah.

¹⁷Tüsho arünü nü kurungkheak tüzhobah, tüsho nü ki thabah: Künangde ketobo chingnü nü dükheakde, O mungkhung kiuto, khülang ki keto kheak wuto lakheah, nü tüsho nü mihtsürü, sherünü ju ching larü alala treshih!

¹⁸Kheakü nü keamkhi nimung keyean lobo ajanchoh; nü thsümünimkhi kheak keto yean lomibonü müyinsahchoh.

¹⁹Tümüde Atungpuh THRÜNPUHNÜ ha thachoh: Küyimki inü mihtsürü mülakhi kiuto nangde athsümünimkhi kiuto kamshihba, küyimki inü nü kheak asük hande akihba, tüsho ke atobonü nü zündoba,

²⁰judüki adüso mihtsürü lung alokhün ching inü nü nimyukbah, tüsho inü nü jipü lün ching thsümünimkhi bolung alokhün ching yüzahrü lung alomi bukkhüp ching lashihbah, junangde nü mülalo yungsho rhangdung lakhi lomi ching dangpung müla.

²¹Inü nü mihtrebe khülang kamshihbah, tüsho nü kheaküa müla; yimyim she küyimkishe nü müngülo, Atungpuh THRÜNPUHNÜ thachoh.