Read Yimchungru Naga Ezk 28 Bible Online

Ezk 28 - Yimchungru Naga bible

Ezk 28

¹ATUNGPUH yu I ki arü:

²Mihtsürü tsührü, Tair yakzanshuhrü ki thaang, ATUNGPUHNÜ ha thachoh: Tümütüsho nü kükheanglah tüsho nünü tha, “ I thrünpuh khülang ah, inü ketobo phulung ching thrünpuhbo binpung binchoh,” tütüshe nünü nü lümkhi thrünpuh lümkhi kheak akeke she nü a mihtsürü khülang ah tüsho thrünpuh yung.

³Nü a Daniel kheaknü lümlung labe ah, junangde nü kheaknü tümü rama mülakhuk de lümchoh;

⁴nü lümlung tüsho nü anikhitkhinü nü lakhit hanmukhung, tüsho suna le shotoyinchibo nü rahpung-yam ching lumukhungdo.

⁵Nü shothsümolo ching lümlung ato hode nü lakhit alü thsüdo tüsho nü lakhit ching nü mulong kükheangde kamdo.

⁶Jumonü Atungpuh THRÜNPUHNÜ ha thachoh: Tümütüsho nünü nü lümkhi Thrünpuh lümkhi kheak akeakheah,

⁷jumonü inü nü azhihde jaksorü atrebe trükshih handarübah; arünü akhamkhi nü lümlung azhihde nukshangbo thokhitbah tüsho nü mungthu müneanbah.

⁸Arünü alokhün ching nü nimyukbah, tüsho keto phulung ching nü a thsümütsüde ashebah.

⁹Judü lang, “ I a thrünpuh khülang ah,” de nü laksahrü miki thaba de? Nü a le nü yurirübo khah ching mihtsürü ah tüsho thrünpuh yung.

¹⁰Khiungkerübo khah hode nü a tsütamübahrü shenü ashebah; tümüde inü asukdo, Atungpuh THRÜNPUHNÜ thachoh.

¹¹Kheaküshe ATUNGPUH yu I ki arü:

¹²Mihtsürü tsührü, Tair kiulongthsüpuh dünkheak tüzhoang, tüsho api ki thaang, Atungpuh THRÜNPUHNÜ ha thachoh: Nü khiukdahkhi lümlungnü mide tüsho jaktsü ching khiukdahkhi amütsan lakheah.

¹³Nü a Thrünpuh shahwün, Eden ching lakheah; shotolungbonü nü züt thsü: shotomürüm-lung, shotolung-müküp, tüsho shihshihlung, wurüklung, lungmüsang, tüsho asherühü lung, shotolung-bluk, lungphüyak, tüsho lungmürüm; tüsho sunanü athsükhibo ju nü binpungbo tüsho nü künkihpungbo lakheah. Nü thrünkhi nimung jurübo tsanglung,

¹⁴mujude-mokhitkhi cherub khülangnü inü nü binshih; nü a Thrünpuh amüsüh müzüng kheak lakheah; nü azhingzhing shotolung bolung tsah.

¹⁵Nü thrünkhi nimungnü nü kheak amülim ngükhi khiungde nü a nü limrobo ching thülünde lakheah.

¹⁶Nü shothsümolo suhdahkhi ching athsümünimnü nü mide la, tüsho nünü neak yihbeak; jumonü amünean kukruk nangde ATUNGPUH müzüng chingnü inü nü bah, tüsho akümbuh cherubnü azhingzhing shotolung bolungnü nü yanabah.

¹⁷Nü jak tsümo nünü kükheang; nü mungthu hode nü lümlung thsümünim. Inü nü alo ching bah; inü nü kiulongthsürübo miki nü kheak arü mükbo mürüngshihpü lahkhita zojih.

¹⁸Nü amülim hihmonü, nü shothsümolo thiyuro mülakhi ching, nünü nü arüngakopungbo münean. Jumonü inü mo nü kheaknü yihkhit; junü nü aniuabah, tüsho nü ngürü alala miki inü nü alo kheak awahbo kamshih.

¹⁹Mihtsürü bolung sherünü nü mükheahlanü nü kheak müyinsah; nü a mihtrebe kamdo tüsho lünnü mülalo.

²⁰ATUNGPUH yu I ki arü:

²¹Mihtsürü tsührü, nü miro Sidon lim abinang, tüsho ju azhihde müchitang,

²²tüsho thaang, Atungpuh THRÜNPUHNÜ ha thachoh: Inü nü azhihde lah, O Sidon, tüsho nü phulung ching inü müretahbah. Küyimki inü ju ching mahkhapba, tüsho ju ching I amüsüh akhiukba, arünü I ATUNGPUH de mükheahbah;

²³tümüde inü ju ching arüm-tukthsü yüshihbah tüsho ju wungdo ching thiyih bukshihbah, tüsho ju bolung ashekhi labah, thrip abannü nukshangnü ju azhihkhi alabah. Tüsho I ATUNGPUH de arünü mükheahbah.

²⁴Israel yamkhünnü kheaküa amükeakbe khingphu yungsho achinkhitbe ayang arü bahyukde arhimorü arü yamhingrü bolung müngü. Tüsho I ATUNGPUH de arünü mükheahbah.

²⁵Atungpuh THRÜNPUHNÜ ha thachoh: Küyimki inü arü hiumüzütpung mihtsürü bolungnü Israel yamkhün bemukhungba, tüsho trükshihbo miki I amüsüh arü kheak akhiukba, judüki inü I yamlarü Jakob kilim jihkhi arü nihbuh lo kheak arünü alabah.

²⁶Arünü ju ching tsüde alabah, tüsho thüyambo thsübah tüsho kurungasolubo thsübah. Arü bahyukde arhimorü arü yamhingrü alala kheak inü mahkhapchoki, arü tsüde alabah. Tüsho I ATUNGPUH arü Thrünpuh de arünü mükheahbah.