Read Yimchungru Naga Ezk 29 Bible Online

Ezk 29 - Yimchungru Naga bible

Ezk 29

¹Kam thürü, khinu thürü, nimung thürükheak mahne nipü, ATUNGPUH yu I ki arü:

²Mihtsürü tsührü, Ijip kiulongthsüpuh Pharao azhihde nü miro anguhang tüsho api le Ijip alala azhihde müchitang;

³asukang, tüsho thaang, Atungpuh THRÜNPUHNÜ ha thachoh: Inü nü azhihde lah, Ijip kiulongthsüpuh Pharao, shiwüh ato ayung phulung lakhinü thachoh, “ Nile ju I yo; ha I thsungkheak inü thsü.”

⁴Inü khoyang nü münjak ching yukjihbah, tüsho ayung chingnü thüngühbo nü phülap kheak lüpkihshihbah. Inü nü ayung chingnü thokhitbah, ayung ching yo thüngüh alala nü phülapbo kheak lüpkihshihbah.

⁵Inü nü tüsho ayung ching thüngühbo alala sunglo ching jipa bahbah, nü a mükeak ching keambah, tüsho mushuhmukhung tüsho kiuyuka mübah. Alomi shiwühbo tüsho thüning wuhnubo kilim inü nü tsühyungpü jihdo.

⁶Judüki Ijip ching larü alalanü I ATUNGPUH de mükheahbah tümütüsho nü a Israel yamkhün ki anüh tso khülang lakheah;

⁷küyimki arü khahnü nü thrüa lukhea, nü yihrüp, tüsho arü dubuhbo tsütrüp; tüsho küyimki arünü nü kheak angükhea, nü yihrüp, tüsho arü jingbo alala nimnimshih.

⁸Jumonü Atungpuh THRÜNPUHNÜ ha thachoh: Inü nü kheak nukshang khülang handarübah, tüsho mihtsürü le shiwüh bolungnü nü lipkhia bahbah;

⁹tüsho Ijip lomi ju azhikkhi tüsho athsümünimkhi labah. Judüki I ATUNGPUH de arünü mükheahbah. Tümütüsho nünü tha, “ Nile ju I yo, tüsho inü ju thsükheah,”

¹⁰jumonü, inü nü tüsho ayungbo azhihde lah, tüsho inü Ijip lomi shahde thsümünimbah tüsho, Migdol chingnü Sene, Ethiopia aredungyean khiungde azhihshihbah.

¹¹Mihtsürü jingnü ha mütsahho, tüsho shiwühnü ha mütsahho; ha kam yirü mülade alabah.

¹²Inü azhikkhi lomi bolung ching Ijip lomi azhikkhi kamshihbah; tüsho thsümünima lakhi lung anihbe kiutobo kam yirü azhikkhi labah. Inü Ijiprübo ju trükshih bolung hiumüzütshihbah, tüsho lomi bolung ching müzütshihbah.

¹³Kheaküshe Atungpuh THRÜNPUHNÜ ha thachoh: Kam yirü akheam ching inü Ijiprübo arü hiumüzütkhi mihtsürü bolungnü bemukhungbah;

¹⁴tüsho inü Ijip kuhi jihlobah, tüsho arü atankih lapung, Pathros lomi ching belode arübah; tüsho ju ching arü akheamkhibe kiulongthsü labah.

¹⁵Ha kiulongthsü bolung khide akheamkhibe labah, tüsho küyimkishe trükshih kurungkheak mushuhkihlo, tüsho inü arü khide aninishihbah, junangde arünü küyimkishe trükshihbo kurungkheak yakzan mushuhlo.

¹⁶Ijiprü ju küyimkishe Israel yamkhün angükihpung müthsülo; küyimki arünü arung thsungkheak arü kilim rholobanü, ju amülim ah de alümkhitlobah. Judüki Israelnü I Atungpuh T H RÜ NPU H de mükheahbah.

¹⁷Kam mukukheak thüne ching, akhuhbe khinu, atan nipü ATUNGPUH yu I ki arü:

¹⁸Mihtsürü tsührü, Babilon kiulongthsüpuh Nebukednezar nü Tair azhihde api bonungrü müküpde rhimoshihchoh; mihbüm aban ku rakrak kamdo tüsho dubuh sühkhido; tütüshe api le anihbuh bonungrünü ju azhihde mihkhah bahkhi dün Tair chingnü tümü she müngü.

¹⁹Jumonü Atungpuh THRÜNPUHNÜ ha thachoh: Inü Ijip lomi ju Babilon kiulongthsüpuh Nebukednezar kilim jihbah; tüsho apinü ju lakhit hana lubah, jangkhia tüsho yankhia lubah; tüsho ju api bonungrü thsungkheak mihkhahmo labah.

²⁰Inü apinü arhimokhi dün khinusho nangde api kilim Ijip lomi jihdo, tümütüsho arünü I thsungkheak rhimodo, Atungpuh THRÜNPUHNÜ thachoh.

²¹Ju nimung inü Israel juh akhiukshihbah, tüsho inü arü bolung nünü athashihbah. Judüki I ATUNGPUH de arünü mükheahbah.