Read Yimchungru Naga Ezk 30 Bible Online

Ezk 30 - Yimchungru Naga bible

Ezk 30

¹ATUNGPUH yu I ki arü:

²Mihtsürü tsührü, müchitang tüsho thaang, Atungpuh THRÜNPUHNÜ ha thachoh: Tüzhoang, “ I nimung thsungkheak are!”

³Tümüde nimung thüninde lah, ATUNGPUH nimung thüninde lah; ha amo-khüpkhi nimung labah, trükshih thsungkheak kim lah.

⁴Nukshang khülang Ijip kheak arübah, tüsho thsünükhi Ethiopia ching labah, küyimki alaksahkhi Ijip ching keamba, tüsho lakhit hande atsoba tüsho ju khimtanbo thomülünba.

⁵Ethiopia, Libya, Ludia, Arabia, Kub alala, tüsho müship lomi mihtsürü alala Ijiprü lung nukshangnü akeambah.

⁶ATUNGPUHNÜ ha thachoh: Sherünü Ijip rungchonü akeambah tüsho kükheangküyang sühmüh keamkhibah; Migdol chingnü Sene khiungde arübo ju ching nukshangnü akeambah, Atungpuh THRÜNPUHNÜ thachoh.

⁷Arübo püpürü azhik lomi bolung azhikkhi labah tüsho athsümünimkhi kiuto bolung arü kiutobo labah.

⁸Küyimki inü Ijip kheak mo takkihba, tüsho ju rungrü alala thsümünima laba, I ATUNGPUH de arünü mükheahbah.

⁹Ju nimung, mulong tomihkhi Ethiopia müzünpü I kinü yunithsürü sangkungbo chingnü awukhiukbah; tüsho Ijip thsümünimpü nimung arü kheak thsünü arübah; tümüde ha arüchoh!

¹⁰Atungpuh THRÜNPUHNÜ ha thachoh: Inü Ijip mihhihkhi Babilon kiulongthsüpuh Nebukednezar khah hode akheam thsüshihbah.

¹¹Api tüsho api lung amihtsürübo, trükshihbonü khide atrekhi, lomi thsümünimpü bemukhungbah; tüsho arünü Ijip azhihde arü nukshangbo dukkhitbah, tüsho alaksahkhinü lomi mishihbah.

¹²Inü ayungbo kungshihbah tüsho lomi ju mihbukmuyuk khah ching yinbah; inü lomi tüsho ju ching lakhi lüpdükhi kheak athsümünim khiungkerübo khah hode handarübah; I ATUNGPUHNÜ asukdo.

¹³Atungpuh THRÜNPUHNÜ ha thachoh: Inü sangthsübo thsümünimbah tüsho Memphis ching mejakbo kheamshihbah; Ijip lomi ching yakzanshuhrü mülalo; junangde inü Ijip lomi ching atrepü yukjihbah.

¹⁴Inü Pathros azhik khülang kamshihbah, tüsho Zoan kheak mo takkihbah, tüsho Thebes kheak mahkhapbah.

¹⁵Inü Pelusium kheak I mulong zhipzhip dungkihbah, Ijip chipi adüküng, tüsho Thebes mihhihkhi kheamshihbah.

¹⁶Inü Ijip kheak mo takkihbah; Pelusium ju thsünü ato ching labah; Thebes lakashungbah tüsho animung Memphisnü azhih-rithsü shorubah.

¹⁷On tüsho Pi-beseth athunu mihtsürü nukshangnü akeambah; tüsho kiutobo ramtso ching yübah.

¹⁸Küyimki inü Ijip sangkap yihshakba, tüsho kükheangküyang sühmüh akheam kamshihbanü Tapanhes ching animung mitingbah; kiuto ju amonü akhüpdobah, tüsho kiuto mihtsürübo ramtso ching yübah.

¹⁹Hanangde inü Ijip kheak mahkhapbah. Judüki I ATUNGPUH de arünü mükheahbah.

²⁰Kam thürükheak khülang, akhuhbe khinu, nimung thüne nipü, ATUNGPUH yu I ki arü:

²¹Mihtsürü tsührü, inü Ijip kiulongthsüpuh Pharao bin yihshakdo; dükünglode nukshang shuhpü thsüde angushihpü mürümlo yungsho arümbenü mürümdo.

²²Jumonü Atungpuh THRÜNPUHNÜ ha thachoh: Inü Ijip kiulongthsüpuh Pharao azhihde lah, tüsho api bin adüküngbe tüsho azhakkhi chido yihshakbah; tüsho inü akhah chingnü nukshang keamkhishihbah.

²³Inü Ijiprübo trükshih bolung hiumüzütshihbah, tüsho lomibo ching arübo müzütshihbah.

²⁴Inü Babilon kiulongthsüpuh bin düküngshihbah, tüsho I nukshang akhah ching yukjihbah; tüshe inü Pharao bin yihshakbah, tüsho ashepü yurirü nangde api miki anihbuhnü ashearabah.

²⁵Inü Babilon kiulongthsüpuh bin düküngshihbah, tüshe Pharao binbo keambah. Inü Babilon kiulongthsüpuh khah ching I nukshang yukjihchoki, I ATUNGPUH de arünü mükheahbah. Apinü Ijip lomi azhihde ju shuhkihbah,

²⁶tüsho inü Ijiprü trükshih bolung hiumüzütshihbah tüsho lomibo ching arübo müzütshihbah. Judüki I ATUNGPUH de arünü mükheahbah.