Read Yimchungru Naga Ezk 31 Bible Online

Ezk 31 - Yimchungru Naga bible

Ezk 31

¹Kam thürükheak khülang ching, khinu asampü, akhuhbe nimung, ATUNGPUH yu I ki arü:

²Mihtsürü tsührü, Ijip kiulongthsüpuh Pharao tüsho api boto mihtsürü ki thaang: Nü tokhi nangde she la le?

³Asiria lümakheahang, Lebanon cedar khülang, akhahbo atsü tüsho alamdokhi murung, tüsho tode amo khiungde achangkhi.

⁴Kebonü ju toshih, asüknü ju shangde asürüshih, ayungbo bukshihde ju mühi khim, thulu sangdungbo alala kilim yungzübo yüshih.

⁵Ke suhdahkhinü thulu sangdungbo alala kumung changde yükih; sangkhahbo tode ashangshang kam.

⁶Sangkhahbo ching wuhnubo alalanü asap shuchoh; ha dübeakkhi khüpnü mükeak shiwühbo alalanü anunu anujih; tüsho ha alamme khüp trükshihbo alala la.

⁷Ha atolim tüsho adübeakbo changkhi akhamde lakheah; tümüde ayingbo ju suhdahkhi ke ching yüzah.

⁸Thrünpuh wündo ching cedar ha mazhihkhuk, yungsho tsünsangnü adübeakbo marihkhuk yungsho yütosangnü adübeakbo makekhuk — Thrünpuh wündo sang tümünü ha akhamkhi marihkhuk.

⁹Inü akhahbo suhdahde ha akhamde thsü, Thrünpuh shahwün Eden ching sangdung alala bolung asühmühkhi lah.

¹⁰Jumonü Atungpuh THRÜNPUHNÜ ha thachoh: Tümütüsho ha changde rünkih tüsho amobo lung yükih tüsho achangkhinü mulong kükheangde kam,

¹¹inü ju trükshihbo yakzanshuhbuh khah ching jih; apinü ju ki rimthsümünim thülün rhimo. Inü ju bahyuk.

¹²Khide atrebe trükshihbo ching khiungkerübonü ju kiushak tüsho bahbah tso. Müzüngbo kheak tüsho jindükhünbo ching akhahbo keamkhi, tüsho jindükhün lo asükbo ching zhaka yaplah; tüsho mihtsürü alala ha alamme khüpnü bahbah tso.

¹³Wuhnubo alalanü lunga yapkhi sangdung ching la, tüsho thulu shiwühbo alala ju khahbo ching la.

¹⁴Jumonü keyean sangbonü nihbuh küdah thsüde müshangkihlo, amobo hode mushuhkih. Ke tsüde aduhkhi sang tümü she ha ruk achangkhi mukhiung; tümüde arübo alokhün ching yüzahrü, ashepü mihtsürü lung shepü arübo akhua lah.

¹⁵Atungpuh THRÜNPUHNÜ ha thachoh: Ha Ashe-lomi ching yüzah nimung inü tüzhode asük kumung khimdo, tüsho wudoabah; inü ayungbo tukloshih, tüsho ke atobo mütsanmüküh. Inü Lebanon amonü mitingdo khüpdo, tüsho thulu sangdungbo alala keamabah.

¹⁶Inü alokhün ching yüzahrü lung Ashelomi ching nimyukchoki, akeamkhi düsheaknü trükshihbo ajanbah; tüsho Eden sangdungbo alala Lebanon ching mokhitkhi tüsho atsüdak ke duhkhi alala Ashe-lomi ching shukheambah.

¹⁷Ha alamme khüp larü, trükshih bolung müshiprü she nukshangnü alaksahrü lung bepü Ashe-lomi ching yüzahbah.

¹⁸Eden sangdung bolung nü nangde müretahkhi tüsho toshangkhi küpü a? Kheakü nü a Eden sangdungbo lungnü abobe lomi ching bede yüzahbah; nü ju nukshangnü alaksahkhi tsütamübahrü bolung yapbah. Ha Pharao tüsho api boto alala ah, Atungpuh THRÜNPUHNÜ thachoh.