Read Yimchungru Naga Ezk 33 Bible Online

Ezk 33 - Yimchungru Naga bible

Ezk 33

¹ATUNGPUH yu I ki arü:

²O mihtsürü tsührü, nü mihtsürübo ki asukang tüsho arü ki thaang, Mürangkhüh inü lomi kheak thirithsü handarüsho tüsho lomi mihtsürünü arü bolung khülang arü aheangrü zosho;

³tüsho aheangbuhnü lomi kheak thirithsü arükhi ngübah hulipungpung mütsho tüsho mihtsürübo ki kurhangyu thasho;

⁴judüki khürünü hulipungpung düsheak sobah mukurhangsho, tüsho thiriri arübah arü lude tsosho, arü thiyih ju arü nihbuh ku kheak labah.

⁵Arünü hulipungpung düsheak sodo tüsho mukurhang; arü thiyih ju arü ku kheak labah. Tüshe arünü kurhangyu lukhülaa, arünü arü rhangdungbo khümkhita labah.

⁶Tüshe aheangrünü thiriri arükhi ngübah hulipungpung mümütsho, junangde mihtsürübo mukurhangsho, tüsho thiriri arübah arü khürü lude tsosho, arü mülimkhi ching arübo lude tsodo, tüshe arü thiyih ju inü aheangbuh khah chingnü akheangbah.

⁷Jumonü, mihtsürü tsührü, Inü nü Israel yamkhün thsungkheak aheangrü khülang kamshihdo; inü nü kilim jihkhi kurhangyu arü kilim yüshang.

⁸Inü mihbukmuyuk ki, “ O mihbukmuyukbo nüsa tsükjide ashebah” de thasho, tüsho mihbukmuyukbo arü limrobo chingnü rholopü nünü kurhangyu masuksho, mihbukmuyuk ju arü mülimkhi ching shebah, tüshe arü thiyih inü nü khah chingnü akheangbah.

⁹Tüshe nünü mihbukmuyuk ki arü limrobo chingnü rholopü kurhangyu thasho, mihbukmuyuk ju arü mülimkhi ching shebah, tüshe nü a nü rhangdung khümkhitbah.

¹⁰Mihtsürü tsührü, kheakü nünü Israel yamkhün ki thaang, Nüsanü ha thado: “ Isanü alakmihkhibo tüsho isa neakbonü isa kheak ajapchoh, tüsho jurü hode isa sühkeakeade kamchoh; dale küde thsah isa lakhukpü?”

¹¹Arü ki thaang, I lale, Atungpuh THRÜNPUHNÜ thachoh, mihbukmuyuk shekhi ching I asühpü müla, tüshe mihbukmuyuknü arü limrobo chingnü rholobah rhangdung lakhi ching lah; nüsa amütsü limrobo chingnü rholoang, rholoang; tümüde nü ashepü, O Israel yamkhün?

¹²Tüsho mihtsürü tsührü, nünü nü mihtsürübo ki thaang, Mihtsürü atsünü neak yihbeakchoki api rhimo atsünü anihbuh mükhümkhit; tüsho mihbukmuyukrünü mihbukmuyuk rhimo tuklosho api müthsümüchi, tüsho mihtsürü atsünü neak yihbeakpü tankihsho api rhangdung maningshih.

¹³Inü thiyuro-lungkirü ki tsükjide arü alabah de thatha she, arünü arü nihbuh thiyuro-lungki ching kinsho tüsho amülim yihbeaksho, arü thiyuro-lungki rhimo küpü she mülümkhit; tüshe arünü ayihbeakkhi amülim ching arübo shebah.

¹⁴Kheaküshe, inü mihbukmuyuk ki, “ Nüsa tsükjide ashebah” de thatha she, mürangkhüh arünü arü neak chingnü rholosho tüsho yakzan lungki tüsho alim tümüanü rhimosho —

¹⁵mihbukmuyuknü thiyuchihchimkhi zolosho, arünü jangkhijangrakhi jihlosho, tüsho rhangdung yuzüng ching tsahsho, amülim müyihbeaksho — tsükjide arü alabah, arü müshe.

¹⁶Arünü ayihbeakkhi neakbo küpü she arü azhihde mülümkhitjih; arünü küpü yakzan lungki a tüsho alimanü rhimodo, arü tsükjide alabah.

¹⁷Tütüshe nü mihtsürübonü arü thiyuro mülalashe thachoh, “A TU N GPU H limro thiyuro yung.”

¹⁸Küyimki thiyuro-lungkirünü api thiyurolungki chingnü rholoba, tüsho amülim yihbeakba, ju thsungkheak api shebah.

¹⁹Tüsho küyimki mihbukmuyuknü api mihbukmuyuk chingnü rholoba tüsho yakzan lungki tüsho alim tümüanü rhimosho, junü api labah.

²⁰Tütüshe nüsanü thachoh, “ATUNGPUH limro thiyuro yung.” O Israel yamkhün, inü nüsa alala nüsa limrobo ayannü mahkhapbah!

²¹Isa ramtsokhi kam thürükheak mahne ching, khinu thürü, phüngü nipü, khürü Jirusalem chingnü atsokhitrü I kilim arü tüsho tha, “ Kiuto lunga lah.”

²²Kheakü arelim atsorü arüpü müngüh ATUNGPUH khah I kheak lakheah; tüshe yapsu I kilim atsorü arüchoki apinü I mün khimshuhjih; jumonü I mün khimshuh-a lakheah, tüsho inü masukkhukpü thsüde mülade alakheah.

²³ATUNGPUH yu I ki arü:

²⁴Mihtsürü tsührü, ha abahkhi Israel lomi ching larünü thade lah, “Abraham ju mihtsürü khülang lang alakheah, tütüshe api a alo yamrüplurüp lu; tüshe isa hihlah; tsükjide müküh-a lupü isa kilim yamalo jih-a lah.”

²⁵Jumonü arü ki thaang, Atungpuh THRÜNPUHNÜ ha thachoh: Nüsanü thiyih bede shih tsühchoh, tüsho sangthsübo ki nüsa mükbo züngkihchoh, tüsho thiyih bukchoh; dale nüsanü alo ju amükühba de?

²⁶Nüsanü nüsa nukshangbo kheak düthsün angüchoh, nüsanü athraneanbe yihbeakchoh, tüsho nüsa mihbüm abannü nihbuh yamhingrü niuberü thsümünimchoh; dale nüsanü alo mükühba de?

²⁷Ha arü ki thaang, Atungpuh THRÜNPUHNÜ ha thachoh: I lale, tsükjide sherü abahkhi lo ching lanü nukshangnü akeambah;

²⁸inü lomi ju azhik tüsho abahkhi khülang kamshihbah, tüsho kükheangkhi yu akheam thsübah; tüsho Israel müzüngbo ju shenü mütsahhopü thsüde zhikrangkhündo alabah.

²⁹Junangde arünü athraneanbe yihbeakkhi hode inü lomi azhik tüsho abahkhi kamshihchoki I ATUNGPUH de arünü mükheahbah.

³⁰Mihtsürü tsührü, nü mihtsürü chipi ki tüsho thüyam ripitbo kheak larübo mihbüm abannü khülangnü khülang ki thaachihchoh, “Arang tüsho ATUNGPUH kilimnü tümü yu arüchonü aniang.”

³¹Mihtsürübo arüchoki arünü nü kilim arüchoh, tüsho arünü I mihtsürü nangde nü miki binchoh, tüsho arünü nü yubo anichoh, tüshe arünü jurübo mürhimo. Tümüde thiyu-ake arü münküpbo kheak lah, tüshe arü mulong a arü alü thsüpü kheak lah.

³²Nü a arü ki muzhoachih khün thsürü nangde lah, shepü düsheak atsü la tüsho akingbe tsüde ahoricho; nünü athakhi arünü sochoh, tüshe arünü ju mürhimo.

³³Küyimki ha dükde adünjibanü, arü bolung wukihrü khülang lakheah de arünü mükheahbah.